Башланув 49 - Мукъаддес Китап

Якъуп озь огъулларыны багъышлай

¹ Якъуп огъулларыны чагъырып, бойле деди: – Топлашынъыз, сизлернен келеджекте не оладжагъыны сизге хабер этеджегим.

² Якъупнынъ огъуллары, топланынъыз, бабанъыз Исраильни динъленъиз!

³ Рубен! Сен меним биринджи догъгъан огълум, меним такъатымсынъ, акъайлыгъымнынъ ильк козьайдыны, дегер ве къудретнинъ юкъары нокътасысынъ.

⁴ Сен сувлар дайын къутургъан оласынъ. Эндиден сонъ энъ буюк олмайджакъсынъ, чюнки сен бабанънынъ тёшегинде яттынъ ве тёшегини арамладынъ.

⁵ Шимеон ве Левий керчектен де агъа-къардашлардыр; оларнынъ къылычлары – мераметсиз алетлердир!

⁶ Оларнынъ япкъан ишлерине мен къошулмайым, топлашувларына шуретим даркъалмасын. Олар гъазапларында акъайларны ольдюрдилер, бош истеклерине коре бузавларны сойдылар.

⁷ Оларнынъ гъазабы, шефкъатсыз олгъаны ичюн, лянет олсун, афакъанлары, дешетли олгъаны ичюн, лянет олсун! Якъупнынъ огъуллары арасында оларны болерим, Исраиль огъуллары арасында дагъытып сеперим.

⁸ Ехуда! Агъа-къардашларынъ сени макътарлар. Сенинъ къолунъ душманларынънынъ бойнунда олур. Агъа-къардашларынъ санъа къатланаджакълар.

⁹ Ехуда огълум, сен яш арслансынъ, гъаниметинънинъ устюнден котерилесинъ. О, арслан дайын, ер устюнде пысып отурды – оны раатсыз этмеге кимнинъ джесарети етер?

¹⁰ Ехуданынъ къолундан акимиет таягъы тюшмез, аякъларынынъ янындан акимдарнынъ таягъы кетмез. Сонъ Шило келеджек, ве халкълар онъа боюн эгеджеклер.

¹¹ О, эшегини юзюм чубугъына багълай, эшек баласыны энъ яхшы юзюм чубугъына багълай. Урбаларыны шарап ичинде юва, кийимлерини – салкъымларнынъ къанында.

¹² Козьлери шараптан къара, тишлери сюттен бем-беязлар.

¹³ Зевулун денъиз ялысында яшар, гемилер искелеси олур. Сынъыры Сидон шеэринедже олур.

¹⁴ Йиссакъар юклер арасында узанып яткъан сагълам эшек.

¹⁵ Раатлыкъ яхшы олгъаныны ве бу топракъ хош кельгенини корип, сыртыны юк тюбюне эгди ве къул олды.

¹⁶ Дан озь халкъына акимдарлыкъ этеджек, Исраильнинъ башкъа къабилелери киби оладжакъ.

¹⁷ Дан ёлда яткъан йылан олур, атлы аттан йыкъылып кетсин деп, атнынъ аягъыны чакъкъан, ёл четиндеки зеэрли йылан оладжакъ.

¹⁸ РАББИм, Сенинъ къуртарувынъа умют этем!

¹⁹ Гъадны бир сюрю ёлбасар басаджакълар, о исе, оларны басып, пешлеринден къувалайджакъ.

²⁰ Ашернинъ ашы берекетли олур, о, падишанынъ софрасына ляйыкъ ашларны еткизеджек.

²¹ Нафталий – сербест сыгъын кибидир. О, аджайип балалар асыл эте.

²² Юсуф – махсулдар терекнинъ пытагъыдыр, чокъракъ устюнден оськен махсулдар терекнинъ пытагъыдыр. Онынъ пытакълары дивар устюнден осип кетелер.

²³ Окъчулар онъа душманлыкъ этип ве окълар атып, уджюм эттилер.

²⁴ Лякин онынъ яйы даима къавий къала эди. Къолларынынъ къавийлиги – Якъупнынъ Кучьлю Алласындандыр, Чобаннынъ адындан ве Исраильнинъ Къаясындандыр,

²⁵ баба-деделеринънинъ Алласындандыр! О, санъа ярдым этер! О – Къудретли Алла, О, сени юкъарыдаки коклернинъ багъышлавларынен, ашагъыдаки буюк теренликнинъ багъышлавларынен, эмчек ве къурсакънынъ багъышлавларынен багъышлар!

²⁶ Бабанънынъ багъышлавлары эбедий дагъларнынъ багъышлавларындан ве къадимий тёпелернинъ яхшылыкъларындан буюктир. Олар Юсуфнынъ башында, агъа-къардашларынынъ арасындан сечилип алынгъан Юсуф башынынъ тёпесинде олсун.

²⁷ Биньямин – йыртыджы къашкъыр, саба о, туткъаныны ашай, акъшам исе гъаниметини боле.

²⁸ Будыр – исраиллилернинъ он эки къабилеси ве бабаларынынъ оларгъа айткъан шейлери. Оларнынъ бабасы Исраиль оларны багъышлады, эр бирини айры багъышлады.

²⁹ Сонъ Якъуп огъулларына бойле эмир берди: – Мен о бир дюньягъа, озь халкъыма кетем. Мени хитли Эфроннынъ тарласында олгъан къобада баба-деделеримнен берабер дефн этинъиз.

³⁰ Бу къоба Ханаан топрагъында, Мамренинъ янында, Макъпела тарласындадыр. Бу къобаны ве тарланы Ибраим мезар ери оларакъ хитли Эфрондан сатын алды.

³¹ Анда Ибраим ве онынъ апайы Саре дефн этильгенлер, анда Исхакъ ве апайы Рефикъа дефн этильгенлер, анда мен Леаны да дефн эттим.

³² Бу тарла ве устюндеки къоба Хет огъулларындан сатын алынгъандыр.

³³ Огъулларына эмирини берген сонъ, Якъуп аякъларыны тёшегине къойды ве кечинип, озь халкъына, о бир дюньягъа кетти.