Башланув 46 - Мукъаддес Китап

Якъуп Мысыргъа кочип кете

¹ Исраиль бутюн озь мал-мулькюнен ёлгъа чыкъты. Беэр-Шева шеэрине келип, о, бабасы Исхакънынъ Алласына къурбан чалды.

² Геджеси тюшюнде Алла Исраильге: – Якъуп! Якъуп! – деди. – Мен мындам, – деди о.

³ – Мен – Аллам, бабанънынъ Алласыдырым, – деди Алла. – Мысыргъа бармагъа къоркъма. Анда Мен сенден буюк халкъ асыл этерим.

⁴ Мен сеннен Мысыргъа барарым, Мен де сени андан чыкъарырым. Юсуф озь къолунен козьлеринъни къапатыр.

⁵ Сонъ Якъуп Беэр-Шевадан кетти. Фыравун оны алып кельмек ичюн ёллагъан арабалар устюнде Исраильнинъ огъуллары бабалары Якъупны, балаларыны ве апайларыны алып кеттилер.

⁶ Ханаан топрагъында ишлеп тапкъан мал-мулькюни ве айванларны озьлеринен алдылар. Шай этип, Якъуп ве бутюн онынъ эвлятлары Мысыргъа кельдилер.

⁷ Якъуп озюнен берабер огъулларыны ве торунларыны, къызларыны ве къыз торунларыны, – бутюн эвлятларыны Мысыргъа кетирди.

⁸ Мысыргъа кельген Исраиль огъулларынынъ адлары будыр: Якъуп ве онынъ огъуллары. Якъупнынъ биринджи огълу Рубен.

⁹ Рубеннинъ огъуллары: Ханокъ, Паллу, Хецрон ве Къармий.

¹⁰ Шимеоннынъ огъуллары: Емуэл, Ямин, Охад, Якин, Цохар ве ханаанлы къызнынъ огълу Шаул.

¹¹ Левийнинъ огъуллары: Гершон, Кехат ве Мерарий.

¹² Ехуданынъ огъуллары: Эр, Онан, Шела, Перец ве Зерах, амма Эр ве Онан Ханаан топрагъында ольдилер. Перецнинъ огъуллары: Хецрон ве Хамул.

¹³ Йиссакъарнынъ огъуллары: Тола, Пува, Йов ве Шимрон.

¹⁴ Зевулуннынъ огъуллары: Серед, Элон ве Яхлеэл.

¹⁵ Бу – Паддан-Арамда догъгъан, Дина къызынен берабер, Леанынъ Якъупкъа тапкъан огъулларыдыр. Онынъ огъуллары ве къызлары эписи олып отуз учь джандыр.

¹⁶ Гъаднынъ огъуллары: Цифион, Хаггий, Шуний, Эцбон, Эрий, Ародий, Арелий.

¹⁷ Ашернинъ огъуллары: Йимна, Йишва, Йишвий ве Бриа. Оларнынъ къызкъардашы Серах. Брианынъ огъуллары: Хевер ве Малкиэл.

¹⁸ Бу – Лаван Леа къызына берген Зилпанынъ огъуллары. О, Якъупкъа он алты бала догъды.

¹⁹ Якъупнынъ апайы олгъан Рахельнинъ огъуллары: Юсуф ве Биньямин.

²⁰ Мысыр топрагъында Юсуфнынъ Менашше ве Эфраим огъуллары догъдылар. Оларны онъа Поти-Пера деген Он шеэриндеки баш руханийнинъ Аснат къызы тапты.

²¹ Биньяминнинъ огъуллары: Бела, Бекер, Ашбел, Гера, Нааман, Эхий, Рош, Муппим, Хуппим ве Ард.

²² Бу – Якъупнынъ Рахельден олгъан несили – он дёрт джан.

²³ Даннынъ огъуллары: Хушим.

²⁴ Нафталийнинъ огъуллары: Яхцеэл, Гуний, Ецер ве Шиллем.

²⁵ Бу – Лаван Рахель къызына берген Билханынъ огъуллары. О, Якъупкъа еди бала догъды.

²⁶ Якъупнен берабер, ондан асыл олгъанлар, келинлеринден гъайры, Мысыргъа эписи олып алтмыш алты джан кельдилер.

²⁷ Мысырда догъгъан Юсуфнынъ огъуллары эки джаннен берабер, Мысыргъа кочькен Якъупнынъ эвлятлары эписи олып етмиш джандыр.

Якъуп фыравунны багъышлай

²⁸ Юсуфкъа, Гошенге ёлны косьтермек ичюн, Якъуп озюнден эвель Ехуданы ёллады. Олар Гошен топрагъына кельгенде,

²⁹ Юсуф озь арабасыны ектиртти ве, бабасы Исраильни къаршыламакъ ичюн, Гошенге кетти. Оны корьген сонъ, бойнуна сарылды ве онынъ бойнунда чокъ вакъыт агълады.

³⁰ Исраиль Юсуфкъа: – Энди, сенинъ юзюнъни, сен даа сагъ олгъанынъны корьген сонъ, манъа ольмек мумкюн, – деди.

³¹ Юсуф агъа-къардашларына ве бутюн бабасынынъ эвине: – Мен барып, фыравунгъа бу хаберни айтайым: «Манъа Ханаан топрагъындан агъа-къардашларым ве бабамнынъ къорантасы кельдилер. Олар къой-эчки бакъып, чобанлыкъ этелер.

³² Олар къой-эчкилернен туварларны ве оларда олгъан бутюн барлыкъ-вариетни алып кельдилер», – деди.

³³ – Эгер фыравун сизлерни чагъырып, ненен огърашкъанынъызны сораса,

³⁴ сизлер: «Биз сенинъ къулларынъ, яшлыгъымыздан айванасравджылыкънен огърашамыз, эм биз, эм бабаларымыз», – деп айтынъыз. О заман сизни Гошен топрагъында ерлештирирлер. Эр къой чобаны мысырлылар ичюн арамдыр.