Башланув 40 - Мукъаддес Китап

Юсуф эсирлернинъ тюшлерини тарифлей

¹ Бираз вакъыт кечкен сонъ, Мысыр падишасынынъ сакиси ве фурунджысы озьлерининъ эфендиси Мысыр падишасынынъ козю огюнде къабаат ишледилер.

² Фыравун озь эки везири олгъан баш сакиге ве баш фурунджыгъа ачувланды

³ ве оларны сакъчылар башлыгъынынъ эвинде олгъан зиндангъа къапатты. Бу зинданда Юсуф да къапалгъан эди.

⁴ Сакъчыларнынъ башлыгъы Юсуфны оларгъа хызмет этмеге тайинледи. Везирлер сакъчыларнынъ къолунда бир къач вакъыт олдылар.

⁵ Куньлерден биринде зиндангъа къапалгъан Мысыр падишасынынъ сакиси ве фурунджысы тюшлер корьдилер. Эр бири озь тюшюни корьди. Экиси бир геджеде корьдилер. Эр бири хусусий мана ташыгъан тюш корьди.

⁶ Саба эрте оларгъа Юсуф кельди ве оларнынъ къасеветленгенлерини корьди.

⁷ Юсуф онен берабер эфендисининъ сакъчылары къолунда отургъан фыравуннынъ везирлеринден: – Сизинъ чырайларынъыз бугунь не ичюн кедерли? – деп сорады.

⁸ Олар онъа: – Биз тюш корьдик, амма оларны тарифлемеге адам ёкъ, – дедилер. Юсуф оларгъа: – Тарифлер Алладан дегильми? Манъа икяе этсенъиз, – деди.

⁹ Баш саки Юсуфкъа озь тюшюни икяе этти. О, Юсуфкъа: – Мен тюшюмде огюмде олгъан юзюм чубугъыны корьдим.

¹⁰ Чубукъ устюнде учь пытакъ. Устьлеринде бурьлер пейда олды, олар филиследилер, чечеклер ачылды, ве емишлер пиштилер.

¹¹ Къолумда фыравуннынъ къадеси эди. Мен юзюмни алып, фыравуннынъ къадесине сыкътым ве къадени фыравуннынъ къолуна бердим, – деди.

¹² Юсуф онъа: – Онынъ тарифи будыр: учь пытакъ – учь куньдир.

¹³ Учь кунь ичинде фыравун башынъны юксельтир ве сени озь еринъе къайтарыр. Эвельде, саки олгъан вакътынъда киби, фыравуннынъ къадесини онынъ къолуна берерсинъ.

¹⁴ Ялварам, санъа яхшы олгъанда, мени хатырла ве манъа эйилик яп: меним акъкъымда фыравунгъа айт ве мени бу зиндандан чыкъар.

¹⁵ Мени еудийлернинъ топрагъындан хырсызладылар. Эм мында, мени зиндангъа ташламакъ ичюн, бир шей япмадым, – деди.

¹⁶ Баш фурунджы, яхшы тариф олгъаныны корип, Юсуфкъа: – Мен де тюш корьдим, – деди. – Мына, башымнынъ устюнде беяз отьмекке толу учь сепет.

¹⁷ Энъ юкъары сепет ичинде фурунджы фыравунгъа пиширген тюрлю емектир. Оны башым устюндеки сепеттен къушлар чокъуй эдилер.

¹⁸ Юсуф джевап берип: – Мына онынъ тарифи. Учь сепет – учь куньдир.

¹⁹ Учь кунь ичинде фыравун башынъны сенден юксельтип, сени терек устюне асаджакътыр. Сонъ къушлар сенинъ вуджудынъны чокъуйджакълар, – деди.

²⁰ Учюнджи куню фыравуннынъ догъгъан куню эди. О, озюнинъ эписи хызметчилери ичюн зияфет берди ве озь хызметчилери арасында баш сакининъ башыны ве баш фурунджынынъ башыны юксельтти.

^21-22 Юсуф тарифлегени киби, фыравун баш сакини эвельки ерине къайтарды, ве саки фыравуннынъ къолуна къадени берди. Баш фурунджыны исе асты.

²³ Амма баш саки Юсуфны акъылына кетирмеди. О, оны унутты.