Башланув 38 - Мукъаддес Китап

Ехуда ве Тамар

¹ О заман Ехуда озь агъа-къардашларындан кетип, Хира адлы бир адулламлы янында яшамакъ ичюн ерлешти.

² Анда Шуа адлы бир ханаанлынынъ къызыны корип, Ехуда онъа эвленди ве онен ятты.

³ О, юклю олды ве огълан бала тапты; Ехуда онынъ адыны Эр деп къойды.

⁴ О, кене юклю олды ве огълан бала тапты; онынъ адыны Онан деп къойды.

⁵ Сонъ даа бир огълан бала тапты ве онынъ адыны Шела деп къойды. Апайы бала тапкъанда, Ехуда Кезив шеэринде эди.

⁶ Ехуда озюнинъ биринджи догъгъан огълу Эрге апай алып берди, онынъ ады Тамар эди.

⁷ Лякин Ехуданынъ биринджи догъгъан огълу Эр РАББИнинъ козю огюнде яман эди, ве РАББИ оны ольдюрди.

⁸ Ехуда Онангъа: – Агъанънынъ апайына кирип, онъа къайын киби эвлен ве агъанъа эвлят берип, онынъ несилини сакълап къал, – деди.

⁹ Лякин Онан оладжакъ эвлят онынъки сайылмайджагъыны биле эди ве онынъ ичюн дудусынен яткъанда, агъасына эвлят бермемек ичюн, урлугъыны ерге тёке эди.

¹⁰ Онынъ япкъанлары РАББИнинъ козю огюнде яманлыкъ эди, ве О, оны ольдюрди.

¹¹ Сонъ Ехуда келини Тамаргъа: – Огълум Шела осип буюгендже, бабанънынъ эвинде тул апай олып яша, – деди. О: «Буюклерининъ артындан кичигим де ольмегейди», – деп тюшюнди. Тамар, бабасынынъ эвине къайтып, анда яшап башлады.

¹² Чокъ вакъыт кечти ве Шуанынъ къызы, Ехуданынъ апайы кечинди. Матем куньлери кечкен сонъ, Ехуда досту адулламлы Хиранен Тимна шеэрине, озюнинъ къойларыны къыркъкъан адамларгъа кетти.

¹³ Тамаргъа: «Ана, къайнатанъ Тимна шеэрине озь къойларыны къыркъмагъа кете», – деген хабер кетирдилер.

¹⁴ Тамар туллукъ урбаларыны чыкъарып, бетини орьтюнен къапатты ве сармаланып, Тимна ёлунда яткъан Энаим шеэрининъ араба къапусы огюнде отурды. О, Шела осип буюгенини, амма оны онъа эвлендирмегенлерини коре эди.

¹⁵ Тамар бетини къапаткъаны ичюн, Ехуда онъа бакъып, оны фаише деп белледи.

¹⁶ Онынъ янына барды ве: – Мен сеннен ятаджагъым, – деди. Бу, онынъ келини олгъанындан онынъ хабери ёкъ эди. – Сен меннен яткъанынъ ичюн манъа не береджексинъ? – деп сорады Тамар.

¹⁷ – Санъа къой-эчкилеримден бир улакъны ёлларым, – деди Ехуда. – Ёлламагъанынъдже пей къалдырырсынъмы? – деди Тамар.

¹⁸ – Санъа насыл пей къалдырайым? – деп сорады Ехуда. – Сыджымынен мууринъни ве къолунъдаки таякъны, – деди онъа Тамар. Ехуда онъа бутюн сорагъанларыны берди ве онен ятты. Тамар ондан юклю олды.

¹⁹ Сонъ Тамар кетип, бетиндеки орьтюни чыкъарып, кене озюнинъ туллукъ урбаларыны кийди.

²⁰ Ехуда, апайдан пейини алмакъ ичюн, адулламлы достунен улакъны ёллагъанында, досту оны тапмады

²¹ ве о ернинъ сакинлеринден: – Ёлнынъ четинде отургъан Энаимдеки фаише къайда? – деп сорады. Лякин онъа: – Анда фаише ёкъ эди, – деп джевап бердилер.

²² Досту Ехудагъа къайтты ве: – Мен оны тапмадым. О ернинъ сакинлери: «Мында фаише ёкъ эди», – дедилер, – деди.

²³ Ехуда: – Айды, шейлерни озюне къалдырсын, тек устюмизден кульмесинлер. Мына, мен онъа бу улакъны ёлладым, амма сен оны тапмадынъ, – деди.

²⁴ Учь ай къадар кечкен сонъ, Ехудагъа: – Келининъ Тамар ороспулыкъ эткен. О, ороспулыкътан энди юклю, – дедилер. – Оны тышкъа чыкъарынъыз да, – деди Ехуда, – якъынъыз!

²⁵ Лякин Тамарны тышкъа чыкъаргъанларда, о, къайнатасына бойле деп айтмаларыны риджа этти: – Бу кимнинъ шейлери олса, мен ондан юклюдирим. – Ве: – Бу муурь, сыджым ве таякъны бакъса, кимнинъ олгъаныны билесинъми? – деди.

²⁶ Ехуда шейлерини таныды ве: – О, менден акълы, – деди. – Мен оны огълум Шелагъа бермедим. Ехуда онен бир даа ятмады.

²⁷ Тамар бала тапкъанда, къурсагъында эгизлер олгъаны ачылды.

²⁸ Догъып башлагъанында ве тышары къолчыкъ чыкъкъанында, эбанай онъа къырмызы йипчик багълады ве: – Бу биринджи чыкъты, – деди.

²⁹ Лякин бала къолуны арткъа чекип алды, ве иште, онынъ къардашы чыкъты. – Сен насыл этип биринджи чыкътынъ? – деп сорады эбанай. Онынъ ичюн баланынъ адыны Перец деп къойдылар.

³⁰ Сонъ къолунда къырмызы йипи олгъан агъасы да чыкъты. Онынъ адыны Зерах деп къойдылар.