Башланув 35 - Мукъаддес Китап

Рабби Якъупны Бет-Эль шеэринде багъышлай

¹ Алла Якъупкъа бойле деди: – Барып, Бет-Эльге кет ве анда ерлеш. Анда агъанъ Исавдан къачкъанынъда санъа корюнген Аллагъа къурбан ери яп.

² Якъуп озь эвиндекилерине ве онен олгъан эписи адамларына бойле деди: – Сизде олгъан эписи башкъа аллаларны ташлап кетинъиз, элялланынъыз ве урбаларынъызны денъиштиринъиз.

³ Биз Бет-Эльге кетермиз. Анда башым белягъа къалгъанда манъа джевап берген ве мен юрген ёлларда янымда олгъан Аллагъа къурбан ери япаджагъым.

⁴ Олар Якъупкъа эписи башкъа аллаларыны бердилер, къулакъларындаки купелерни де чыкъарып онъа бердилер. Якъуп оларны эписини Шекем шеэри янында олгъан эмен тереги тюбюнде комип къойды.

⁵ Сонъ олар ёлгъа чыкътылар. Этрафтаки шеэрлернинъ сакинлери Алладан къоркъкъанлары ичюн, Якъупнынъ огъулларыны къуваламадылар.

⁶ Якъуп эписи адамларынен Ханаан топрагъындаки Луз шеэрине, я да Бет-Эль шеэрине кельди ве

⁷ анда къурбан ери къурды. О, бу ернинъ адыны Эль-Бет-Эль деп къойды. Якъуп агъасындан къачкъанда, Алла онъа мында пейда олгъан эди.

⁸ Сонъ Рефикъанынъ даясы Девора кечинди. Оны Бет-Эльнинъ янында эмен тереги тюбюнде дефн эттилер. Якъуп бу эменнинъ адыны Агълав Тереги деп къойды.

⁹ Якъуп Паддан-Арамдан къайткъан сонъ, онъа Алла корюнди ве оны багъышлады.

¹⁰ Алла: – Сенинъ адынъ Якъуп. Лякин илериде адынъ Якъуп олмайджакъ, адынъ «Исраиль» оладжакътыр, – деди. Бойле этип, Алла Якъупнынъ адыны Исраиль къойды.

¹¹ Сонъ даа бойле деди: – Мен – Къудретли Алладырым! Догъып арт ве чокъ сайылы ол! Сенден халкъ, пек чокъ халкълар асыл оладжакъ, падишалар да сенден асыл оладжакълар!

¹² Ибраимге ве Исхакъкъа берген топракъларны Мен санъа берерим, сенден сонъ оладжакъ эвлятларынъа да берерим.

¹³ Якъупкъа шуны айтып, Алла о ерден кетти.

¹⁴ Якъуп анда бир ташны абиде этип тиклеп къойды ве устюне шарапнен зейтюн ягъы тёкти.

¹⁵ Бу ернинъ, онен Алла лакъырды эткен ернинъ адыны Якъуп Бет-Эль деп къойды.

Рахельнинъ олюми

¹⁶ Бет-Эльден чыкъып кетип, Эфрат шеэри янына кельгенлеринде, Рахель бала тапты. Онынъ догъувы агъыр эди.

¹⁷ Рахель догъып къыйналгъанда, эбанай онъа: – Къоркъма, – деди. – Сенинъ даа бир огълунъ олды.

¹⁸ Рахель кечинеяткъанда, сонъки нефесинен огълунынъ адыны Бен-Они къойды, лякин бабасы онъа Биньямин деген ад берди.

¹⁹ Рахель кечинди. Оны Эфрат шеэрине, я да Вифлеем шеэрине кеткен ёлнынъ боюнда дефн эттилер.

²⁰ Якъуп онынъ къабрининъ устюне баш таш къойды. Рахельнинъ баш ташы шу куньгедже тура.

²¹ Исраиль ёлуны девам этти ве чадырларыны Мигдал-Эдер артында ерлештирди.

Якъупнынъ огъуллары

²² Исраиль о топракъта олгъанда, Рубен бабасынынъ джариеси Билханен ятты, ве бабасы бу акъкъында эшитти. Якъупнынъ он эки огълу бар эди.

²³ Леанынъ огъуллары: Якъупнынъ биринджи огълу Рубен, ондан сонъ Шимеон, Левий, Ехуда, Йиссакъар ве Зевулун.

²⁴ Рахельнинъ огъуллары: Юсуф ве Биньямин.

²⁵ Рахельнинъ хызметчиси Билханынъ огъуллары: Дан ве Нафталий.

²⁶ Леанынъ хызметчиси Зилпанынъ огъуллары: Гъад ве Ашер. Бу – Якъупнынъ Паддан-Арамда догъгъан огъуллары.

Исхакънынъ олюми

²⁷ Якъуп Мамреде, Кирьят-Арбада, яни Хевронда яшагъан бабасы Исхакъкъа кельди. Мында бир заманда Ибраим ве Исхакъ вакътынджа яшай эдилер.

²⁸ Исхакъ 180 йыл яшады.

²⁹ О, баягъы къарт олып, яшайышкъа бутюнлей тойып кечинди ве баба-деделерине къошулды. Огъуллары Исав ве Якъуп оны дефн эттилер.