Башланув 30 - Мукъаддес Китап

¹ Рахель Якъупкъа бала тапып оламагъаныны корип, татасыны пахыллап башлады ве Якъупкъа: – Манъа бала бер, – деди. – Эгер бермесенъ, мен олерим.

² Якъуп Рахельге ачувланып, онъа: – Мен санъа бала бермеген Алла дегилим! – деди.

³ – Мына меним хызметчим Билха, – деди Рахель. – Онен ят. Ондан балалы олайым деп, о, манъа бала тапсын.

⁴ Рахель хызметчиси Билханы онъа апай оларакъ берди, ве Якъуп онен ятты.

⁵ Билха юклю олып, Якъупкъа огълан бала тапты.

⁶ – Алланынъ козю догъру, – деди Рахель. – Керчектен де О, мени эшитип, манъа огълан бала берди. Онынъ ичюн огъланнынъ адыны Дан къойды.

⁷ Рахельнинъ хызметчиси Билха кене юклю олды ве Якъупкъа даа бир огълан тапты.

⁸ – Алланынъ кучюнен мен татамнен курештим ве гъалип чыкътым, – деп, Рахель огъланнынъ адыны Нафталий къойды.

⁹ Леа исе, озю бала тапмакъны токътаткъаныны корип, Зилпаны алып, Якъупкъа апай оларакъ берди.

¹⁰ Сонъ Леанынъ хызметчиси Зилпа Якъупкъа огълан бала тапты.

¹¹ – Не къадар къысмет! – деп, Леа баланынъ адыны Гъад къойды.

¹² Сонъ Леанынъ хызметчиси Зилпа Якъупкъа экинджи огълан баланы тапты.

¹³ – Бу меним бахтыма! Энди апайлар мени бахтлы деп саярлар, – деди Леа ве баланынъ адыны Ашер къойды.

¹⁴ Бир заманда, богъдай орулгъан вакъытта Рубен барып, тарлада мандрагор махсулларыны тапты ве оларны анасы Леагъа кетирди. Рахель Леагъа: – Огълунъ кетирген мандрагорлардан манъа берсе, – деди.

¹⁵ – Акъайымны менден тутып алгъанынъ аз олдымы санъа? – деди Леа. – Энди огълум кетирген мандрагорларны да алмагъа истейсинъми? – Эгер огълунънынъ мандрагорларыны манъа берсенъ, – деди Рахель, – акъайым бугунь гедже сеннен ятар.

¹⁶ Акъшам Якъуп тарладан къайткъанда, Леа онынъ къаршысына чыкъып: – Бугунь манъа кир. Мен сени огълум кетирген мандрагорларгъа сатын алдым, – деди. О геджеси Якъуп Леанен ятты.

¹⁷ РАББИ Леаны эшитти. Леа о геджеси кене юклю олды ве Якъупкъа бешинджи огълан баланы тапты.

¹⁸ – Бу, – акъайыма хызметчимни бергеним ичюн манъа Алланынъ мукяфатыдыр, – деп, Леа баланынъ адыны Йиссакъар къойды.

¹⁹ Леа кене юклю олды ве Якъупкъа алтынджы огълан баланы тапты.

²⁰ – Алла манъа аджайип бахшыш берди. Энди акъайым манъа урьмет этеджек, чюнки мен онъа алты огълан бала таптым, – деди Леа ве огълунынъ адыны Зевулун къойды.

²¹ Сонъ Леа къыз бала тапты ве онынъ адыны Дина къойды.

²² Сонъ Алла Рахельни хатырлады, оны эшитти ве къурсагъыны бала-чагъалы этти.

²³ Рахель юклю олды ве огълан бала тапып: – Алла меним масхаралыгъымдан азат этти, – деди.

²⁴ Рахель баланынъ адыны Юсуф къойды ве: – РАББИ манъа даа бир огълан бала берсин, – деди.

Якъуп ве Лаван арасындаки анълашма

²⁵ Рахель Юсуфны догъгъан сонъ, Якъуп Лавангъа бойле деди: – Манъа озь ериме, озь топрагъыма кетмеге разылыкъ бер; мен къайтайым.

²⁶ Апайларымнен балаларыма да меннен кетмеге разылыкъ бер. Мен олар ичюн санъа хызмет эттим. Насыл чалышкъанымны озюнъ билесинъ.

²⁷ – Сенинъ козюнъде урьмет къазангъан олсам, мени динъле, – деди онъа Лаван. – Фалда чыкъкъанына коре, РАББИ мени сенинъ хатиринъ ичюн багъышлады.

²⁸ Озюнъе насыл мукяфат истесенъ, санъа берерим.

²⁹ – Насыл чалышкъанымны ве мен олгъанда айванларынъ насыл яхшы олгъанларыны озюнъ билесинъ, – деди Якъуп. –

³⁰ Мен кельгенде, айванларынъ аз эди, энди исе чокъ олды! Меним келювимнен РАББИ сени багъышлады. Лякин озь эвим ичюн мен не вакъыт чалышаджагъым?

³¹ – Не берейим санъа? – деди Лаван. – Манъа сенден бир шей керекмей, – деди Якъуп. – Айткъанымны япсанъ, мен кене сенинъ къой-эчкилеринъни бакъарым ве къорчаларым.

³² Бугунь эписи къой-эчкилерни айланып чыкъайым да, олардан эписи бенекли ве чубар айванларны, къозулардан эписи къара сойларыны, улакълардан да эписи чубар ве бенекли сойларыны айырып алырым. Бу меним мукяфатым олур.

³³ Сонъра мукяфатымны бакъмагъа кельгенинъде, санъа догърулыгъым джевап берер: менде бенексиз ве чубар олмагъан улакъны, я да къара олмагъан къозуны корьсенъ, демек, мен оны сенден хырсызладым.

³⁴ – Келиштик, – деди Лаван. – Айткъанынъ дайын олсун.

³⁵ О куню Лаван сырлы ве чубар текелерни, эписи бенекли ве чубар эчкилерни, эписи беяз лекели ве эписи къара къозуларны айырып алды ве огъулларына берди,

³⁶ оларны Якъуптан учь куньлюк ёлгъа ёллады. Якъуп Лаваннынъ къалгъан къой-эчкилерини бакъа эди.

³⁷ Якъуп тазе сельби, бадем ве платаннынъ пытакъларыны алып, оларнынъ къабугъыны кесип, беяз агъач ёлакъларыны ачты.

³⁸ Сыдырылгъан пытакъларны сув ашлавларына, сув ичкен къой-эчкилерининъ огюне къойды. Къой-эчкилер мында ичмеге келе эдилер ве къача эдилер.

³⁹ Къой-эчкилер къачкъанда, ёлакълы пытакъларгъа бакъа ве сырлы, бенекли ве чубар къой-эчкилер догъа эдилер.

⁴⁰ Якъуп къозуларны айыра, къой-эчкилерни исе Лаваннынъ сырлы ве эписи къара къой-эчкилерине къаршы къоя эди. Озюнинъ сюрюлерини о айры тута эди, оларны Лаваннынъ къой-эчкилеринен берабер къошмай эди.

⁴¹ Эр вакъыт, сагълам къой-эчкилер къачкъанда, айванлар пытакъларгъа бакъып къачсынлар деп, Якъуп ашлавларгъа, къой-эчкилернинъ козьлери огюне пытакъларны къоя эди.

⁴² Зайыф къой-эчкилер къачкъанда исе, къоймай эди. Бойлеликнен, зайыф айванлар Лаваннынъки, сагълам айванлар исе Якъупнынъки ола эдилер.

⁴³ Якъуп пек зенгин адам олды, онынъ пек чокъ къой-эчкилери, хызметчи къызлары ве къуллары, девелери ве эшеклери бар эдилер.