Башланув 26 - Мукъаддес Китап

Исхакънынъ Герар шеэринде яшайышы

¹ Ибраимнинъ куньлеринде олгъан биринджи ачлыкътан гъайры, мемлекетте даа бир ачлыкъ олды. Исхакъ Герар шеэрине, фелестинлилернинъ падишасы Авимелекке кетти.

² Исхакъкъа РАББИ пейда олды ве бойле деди: – Мысыргъа барма, Мен санъа айтаджакъ мемлекетте ерлеш.

³ Бу мемлекет бою долашып юр. Мен сеннен олурым ве сени багъышларым: санъа ве сенинъ эвлятларынъа эписи бу топракъларны берерим ве бабанъ Ибраимге берген антымны ерине кетиририм.

⁴ Эвлятларынъны кок йылдызлары дайын чокъ сайылы этерим, оларгъа эписи бу топракъларны берерим. Эвлятларынъ ярдымынен ер юзюндеки эписи халкълар яхшылыкъ кореджеклер.

⁵ Чюнки Ибраим Меним айткъанларымны динъледи ве онъа буюргъан эмирлеримни, низамнамелеримни ве къанунларымны беджере эди.

⁶ Исхакъ Герар шеэринде ерлешти.

⁷ О ернинъ адамлары ондан апайы акъкъында сорагъанларда, о: – О, меним къызкъардашымдыр, – деди. «Бу ернинъ адамлары мени Рефикъанынъ дюльберлиги ичюн ольдюрирлер», – тюшюнип, Исхакъ Рефикъа онынъ апайы олгъаныны айтмагъа къоркъты.

⁸ Лякин анда яшагъанына баягъы вакъыт кечкен сонъ, фелестинлилернинъ падишасы Авимелек пенджереге бакъып, Исхакъ апайы Рефикъанен ойнашкъаныны корьди.

⁹ Авимелек Исхакъны чагъыртты ве онъа: – Керчектен де, о, сенинъ апайынъдыр. Насыл олып да, сен: «О, меним къызкъардашымдыр», – дединъ? – деди. – Мени онынъ ичюн ольдюрирлер, деп тюшюндим, – деди онъа Исхакъ.

¹⁰ – Сен бизнен япкъанынъ недир? – деди Авимелек. – Халкъымдан бири апайынънен яткъан олса, сен бизни къабаатлы этер эдинъ!

¹¹ Сонъ Авимелек бутюн халкъкъа эмир берди: – Бу адамгъа я да онынъ апайына токъунгъан эр ким ольдюриледжектир.

¹² О топракъта Исхакъ ашлыкъ сачты, ве о йылы онынъ берекети юз къат чокъ олды. Онъа РАББИ берекет берди.

¹³ Исхакъ зенгин олып, даа зияде зенгин адам олмагъандже, эп зенгинлеше эди.

¹⁴ Исхакънынъ сюрюнен къой-эчкилери, туварлары, эм къуллары чокъ олдылар. Фелестинлилер оны пахыллап башладылар.

¹⁵ Олар даа Ибраим сагъ олгъанда, Ибраимнинъ къуллары къазгъан эписи къуюларны йыкъып, топракъкъа толдургъанлар.

¹⁶ Сонъ Авимелек Исхакъкъа: – Кет бизим арамыздан. Сен чокъ къудретли олдынъ, – деди.

¹⁷ Исхакъ андан кетти, Герар вадийинде чадырларынен ерлешти ве анда яшап башлады.

¹⁸ Даа бабасы Ибраим сагъ олгъанда къазылгъан ве Ибраим кечинген сонъ фелестинлилер йыкъкъан сув къуюларыны Исхакъ кене къазды, бу къуюларны кене бабасы берген адларнен адландырды.

¹⁹ Исхакънынъ къуллары вадийде ер къазгъанда, анда сув чокърагъыны таптылар.

²⁰ Амма Герар чобанлары Исхакънынъ чобанларынен: «Бу бизим сувумыз», – деп къавгъа эттилер. Къую «Къавгъа» деп адландырылды, чюнки чокъракъ ичюн Исхакънен къавгъа олды.

²¹ Башкъа къую къаздылар, онынъ ичюн де къавгъа олды, ве онъа «Душманлыкъ» деген ад къойдылар.

²² О заман Исхакъ мындан даа узакъ кетти ве башкъа къую къазды. Бу къую ичюн энди къавгъа олмады, ве Исхакъ: «РАББИ бизге бол ер берди, ве биз ер юзюнде чокълашаджакъмыз», – деп, онъа «Бол Ер» деген ад къойды.

²³ Андан Исхакъ Беэр-Шевагъа барды.

²⁴ О геджеси онъа РАББИ корюнди ве бойле деди: – Мен бабанъ Ибраимнинъ Алласыдырым. Къоркъма, Мен сеннен. Мен сени багъышларым, къулум олгъан бабанъ Ибраимнинъ хатири ичюн эвлятларынъны чокъ сайылы этерим.

²⁵ Анда Исхакъ къурбан ерини къурды ве РАББИге дува этти. Сонъ Исхакъ чадырыны къойды, ве онынъ къуллары къую къазып башладылар.

Исхакъ Авимелекнен анълашма тизе

²⁶ Сонъ Исхакъкъа Герардан везири Ахуззатнен ве аскербашы Пикъолнен берабер Авимелек кельди.

²⁷ – Мени козьден чыкъарып къувгъан сонъ, манъа неге кельдинъиз? – деп сорады олардан Исхакъ.

²⁸ – Сеннен РАББИ олгъаныны биз ачыкъ-айдын корьдик, – дедилер олар. – Онынъ ичюн бойле айттыкъ: арамызда емин олсун. Айды, анълашма тизейик.

²⁹ Бизге ич бир тюрлю яманлыкъ этмейджегинъе емин эт. Биз санъа бир тюрлю яманлыкъ япмайып, тек яхшылыкъ япа эдик ве сени эсен-аман тынч йибердик. Шимди РАББИнинъ багъышлавы сеннен.

³⁰ Исхакъ оларгъа зияфет япты, ве олар ашап-ичтилер.

³¹ Саба эрте турып, бири-бирлерине емин эттилер. Сонъ Исхакъ оларны йиберди, ве олар ондан эсен-аман кеттилер.

³² Шу куню де Исхакънынъ къуллары онъа келип, къазгъан къуюларындан сув чыкъкъаныны хабер эттилер.

³³ Исхакъ бу къуюнынъ адыны Шива деп къойды. Онынъ ичюн бу куньгедже шу шеэрнинъ ады – Беэр-Шева.

Исавнынъ апайлары

³⁴ Исав къыркъ яшында олгъанда, хитли Беэрийнинъ къызы Ехудитни ве хитли Элоннынъ къызы Басематны апай этип алды.

³⁵ Олар экиси Исхакъ ве Рефикъа ичюн агъырлыкъ эте эдилер.