Башланув 25 - Мукъаддес Китап

Ибраимнинъ Кетурадан олгъан эвлятлары

¹ Ибраим даа бир кере эвленди, апайынынъ ады Кетура эди.

² О, Ибраимге Зимран, Ёкъшан, Медан, Мидьян, Ишбакъ ве Шуах адлы огълан балаларны тапты.

³ Ёкъшаннынъ Шева ве Дедан адлы балалары олды. Деданнынъ огъуллары: Ашшурим, Летушим ве Леуммимдир.

⁴ Мидьяннынъ огъуллары будыр: Эфа, Эфер, Ханокъ, Авида ве Элдаа. Олар эписи Кетуранынъ эвлятларыдыр.

⁵ Ибраим бутюн олгъан барлыгъыны огълу Исхакъкъа берди.

⁶ Джариелеринден олгъан огъулларына исе Ибраим, даа сагъ олгъанда, бахшышлар берип, оларны огълу Исхакътан четке, шаркъкъа, шаркъ топракъларына ёллады.

Ибраимнинъ олюми ве дефн этильмеси

⁷ Эписи олып, Ибраим 175 йыл яшады.

⁸ О, баягъы яшта олгъан къарт олып, яшайышкъа тойып кечинди ве баба-деделерине къошулды.

⁹ Огъуллары Исхакъ ве Исмаил Ибраимни Мамренинъ къаршысында, Цохар огълунынъ хитли Эфроннынъ тарласындаки Макъпела къобасында дефн эттилер.

¹⁰ Бу тарланы Ибраим Хетнинъ огъулларындан сатын алгъан эди. Анда Ибраим ве онынъ апайы Саре дефн этильгенлер.

¹¹ Ибраим кечинген сонъ, Алла онынъ огълу Исхакъны багъышлады. Исхакъ Беэр-Лахай-Рои янында яшай эди.

Исмаилнинъ эвлятлары

¹² Мына Ибраимнинъ огълу Исмаил (оны Ибраимге Саренинъ хызметчиси мысырлы Хагъар тапты) ве онынъ эвлятлары акъкъында ривает.

¹³ Буюгинден башлап кичкенесине баргъандже, Исмаил огъулларынынъ адлары будыр: Невайот (Исмаилнинъ биринджи догъгъан огълу), Кедар, Адбеэл, Мивсам,

¹⁴ Мишма, Дума, Масса,

¹⁵ Хадад, Тема, Етур, Нафиш ве Кедма.

¹⁶ Бу Исмаилнинъ огъуллары ве он эки халкъ башлыкъларынынъ адлары. Оларнынъ адлары койлерининъ ве къасабаларынынъ адлары олдылар.

¹⁷ Исмаил эписи олып, 137 йыл яшады. Сонъ о кечинди ве баба-деделерине къошулды.

¹⁸ Онынъ эвлятлары Ашшургъа тараф Мысыр огюнде олгъан Хавиладан башлап Шургъадже ерлештилер. Олар озь агъа-къардашларынен душманлыкъта яшай эдилер.

Исав ве Якъупнынъ догъувы

¹⁹ Мына Ибраимнинъ огълу Исхакъ ве онынъ эвлятлары акъкъында ривает. Ибраимнинъ Исхакъ адлы огълу олды.

²⁰ Исхакъ къыркъ яшында олгъанда, о, Паддан-Арамдан олгъан арамлы Бетуэлнинъ къызы Рефикъагъа эвленди. Рефикъа, арамлы Лаваннынъ къызкъардашы эди.

²¹ Апайы бала тапып оламагъаны ичюн, Исхакъ РАББИге дува этти. РАББИ Исхакънынъ дувасыны эшитти, ве апайы Рефикъа юклю олды.

²² Онынъ ичинде олгъан огъуллары талашып башладылар, ве Рефикъа: «Бу манъа не ичюн олды?» – деп тюшюнди ве барып, РАББИден сорады.

²³ РАББИ онъа бойле деди: – Къурсагъынъда эки миллет бар. Ичинъден эки тюрлю халкъ пейда оладжакълар. Олардан бир халкъы башкъасындан кучьлюдже оладжакъ, ве кичкенесине буюги хызмет этеджек.

²⁴ Онъа догъмагъа вакъыт кельди. Мына, къурсагъында эгизлер эди.

²⁵ Биринджиси бутюн къырмызы ве юньлю урба киби чыкъты; онынъ адыны Исав къойдылар.

²⁶ Артындан, Исавнынъ табаныны къолунен тутып, къардашы чыкъты. Онъа Якъуп деген ад къойдылар. Олар догъгъанда, Исхакъ алтмыш яшында эди.

Исав озюнинъ биринджилигини сата

²⁷ Балалар буюдилер. Исав уста авджы, тарла адамы олды. Якъуп исе чадырларда яшагъан юваш адам олды.

²⁸ Ав этини бегенип, Исхакъ Исавны севе эди. Рефикъа исе Якъупны севе эди.

²⁹ Бир кунь Якъуп аш пиширгенде, Исав тарладан болдурып-узюлип къайтты.

³⁰ Исав Якъупкъа: – Манъа анавы къырмызыдан ашамагъа берчи, – деди. – Мен болдурдым. (Бунынъ ичюн онъа Эдом деген лагъап бердилер.)

³¹ Якъуп Исавгъа: – Сен манъа биринджи догъгъан акъкъынъны сат, – деди.

³² – Мен ачтан олерим, – деди Исав. – Биринджи догъгъанымнынъ акъкъындан манъа не файда?

³³ – Башта емин эт, – деди Якъуп. Исав емин этти ве Якъупкъа биринджи догъгъанынынъ акъкъыны сатты.

³⁴ Сонъ Якъуп Исавгъа отьмек ве берджимек шорбасыны берди. Исав ашап ичти ве сонъ турып кетти. Бойле этип, Исав биринджи догъгъанынынъ акъкъыны козь огюне биле алмады.