Башланув 16 - Мукъаддес Китап

Исмаилнинъ догъувы

¹ Ибрамнынъ апайы Сарей онъа бала тапмай эди. Онынъ Хагъар адлы мысырлы хызметчи къызы бар эди,

² ве Сарей Ибрамгъа: – Бакъса, РАББИ манъа бала тапмакъ къысмет этмей. Хызметчи къызымнен ят, бельки, мен ондан бала корерим, – деди. Ибрам Сарейни динъледи.

³ Ибрамнынъ апайы Сарей озь хызметчи къызыны, мысырлы Хагъарны акъайы Ибрамгъа апай этип берди. Ибрам о заман Ханаан топрагъында энди он йылдан берли яшай эди.

⁴ Ибрам Хагъарнен ятты, ве Хагъар юкке къалды. Юкке къалгъаныны корип, Хагъар саибесине олгъан сайгъысыны джойып башлады.

⁵ Сонъ Сарей Ибрамгъа бойле деди: – Манъа япкъан акъсызлыгъында сен къабаатлысынъ. Мен сенинъ къолларынъа озь хызметчимни бердим, о, исе юкке къалгъан сонъ, манъа олгъан сайгъысыны джойды. Бизим ишимизни РАББИ суд этсин.

⁶ – Мына, хызметчинъ сенинъ къолунъда, – деди Ибрам Сарейге. – Онен не истесенъ, оны яп. Сарей Хагъарны ойле азарлап башлады ки, тап Хагъар ондан къачып кетти.

⁷ РАББИнинъ Мелеги оны сахрадаки сув чокърагъы янында тапты. Бу сув чокърагъы Шургъа кеткен ёлда ерлешкен эди.

⁸ Мелек ондан: – Хагъар, Сарейнинъ хызметчиси! Сен къайдан кельдинъ ве къайда кетесинъ? – деп сорады. – Мен саибем олгъан Сарейден къачам, – деди Хагъар.

⁹ РАББИнинъ Мелеги онъа: – Саибенъе къайт да, онынъ япкъанларына сабыр эт, – деди.

¹⁰ РАББИнинъ Мелеги онъа даа бойле деди: – Сенинъ эвлятларынъны о къадар чокъ этерим ки, тап онынъ микъдарыны саймакънынъ чареси олмаз.

¹¹ Даа РАББИнинъ Мелеги онъа бойле деди: – Мына, сен юклюсинъ. Сен огълан бала тападжакъсынъ ве онъа Исмаил деген ад къояджакъсынъ, чюнки РАББИ сенинъ чеккен азабынъны корьди.

¹² О, кийик эшек дайын оладжакъ: о, эр кеске къаршы, эр кес де онъа къаршы оладжакътыр. О, агъаларынен душманлыкъта яшайджакъ.

¹³ Онен лакъырды эткен РАББИге Хагъар Эл-Рои деген ад берди. О: «Керчектен де, мында мени Корьгенни корьдим», – деди.

¹⁴ Онынъ ичюн бу чокъракъ Беэр-Лахай-Рои деп адлана. О, Къадеш ве Беред арасында ерлешкендир.

¹⁵ Хагъар Ибрамгъа огълан бала тапты, ве Ибрам онъа, Хагъардан олгъан огълуна, Исмаил деген ад берди.

¹⁶ Хагъар Ибрамгъа Исмаилни тапкъанда, Ибрам 86 яшында эди.