Башланув 10 - Мукъаддес Китап

Нух огъулларынынъ эвлятлары

¹ Мына Нух огъуллары олгъан Шем, Хам ве Яфетнинъ эвлятлары акъкъында ривает. Сув ташкъынындан сонъ оларнынъ балалары олдылар.

² Яфетнинъ огъуллары: Гомер, Магог, Мадай, Яван, Тувал, Мешек ве Тирас.

³ Гомернинъ огъуллары: Ашкеназ, Рифат ве Тогъарма.

⁴ Яваннынъ огъуллары: Элиша ве Таршиш, Киттим ве Доданим.

⁵ Булардан ялы боюнда ве адаларда яшагъан миллетлер пейда олдылар; эр кеснинъ озь ери, озь тили ве озь миллетнинъ къабилелери бар эдилер.

⁶ Хамнынъ огъуллары: Хуш, Мицраим, Пут ве Ханаан.

⁷ Хушнынъ огъуллары: Сева, Хавила, Савта, Раама ве Савтекъа. Рааманынъ огъуллары: Шева ве Дедан.

⁸ Хушнынъ даа Нимрод деген огълу олды. О, ер юзюнде биринджи пельван эди.

⁹ РАББИнинъ юзю огюнде о, къудретли авджы эди. Онынъ ичюн къудретли авджылар акъкъында: «О, Нимрод киби, РАББИнинъ юзю огюнде къудретли авджы», – деп айталар.

¹⁰ Башта онынъ падишалыгъына Вавилон, Эрек, Акъкъад ве Шинар мемлекетинде олгъан Къалне деген шеэрлер кире эдилер.

¹¹ Бу мемлекеттен чыкъып, о, Ашшур мемлекетине кетти ве анда Ниневе, Реховот-Ир ве Къалах шеэрлерни къурды.

¹² Эм де Ниневе ве Къалах арасында Ресен деген шеэрни къурды; бу буюк шеэр эди.

¹³ Мицраимден лудлылар, анамлылар, лехавлылар, нафтухлылар,

¹⁴ патруслылар, къаслухлылар (булардан фелестинлилер чыкътылар) ве къафторлылар асыл олдылар.

¹⁵ Ханаандан Сидон (Ханааннынъ биринджи догъгъан огълу) ве Хет,

¹⁶ эм де евуслылар, аморлылар, гиргашлылар,

¹⁷ хивлилер, аракълылар, синлилер,

¹⁸ арвадлылар, цемарлылар ве хаматлылар дюньягъа кельдилер. Сонъундан ханаанлыларнынъ къабилелери кенъ дагъылдылар.

¹⁹ Ханаанлыларнынъ сынъырлары Сидондан башлап Герар тарафына Гъазагъадже, ве Содом, Гомора, Адма ве Цевоим тарафына Лашагъадже эдилер.

²⁰ Бу, къабилелерине ве тиллерине коре, топракъларында ве миллетлеринде олгъан Хамнынъ эвлятлары.

²¹ Шемнинъ де балалары бар эди. О, Эвер огъуллары эписининъ бабасы-дедеси, Яфетнинъ буюк агъасы эди.

²² Шемнинъ огъуллары булардыр: Элам, Ашшур, Арпакъшад, Луд ве Арам.

²³ Арамнынъ огъуллары булардыр: Уц, Хул, Гетер ве Маш.

²⁴ Арпакъшаднынъ Шелах деген огълу бар эди, Шелахнынъ исе Эвер деген огълу бар эди.

²⁵ Эвернинъ эки огълу олды: бирисининъ ады Пелег эди, чюнки тамам о, олгъан заманда ер айырылгъан эди. Къардашынынъ ады исе Ёкътан эди.

²⁶ Ёкътаннынъ Алмодад, Шелеф, Хацармавет, Ерах,

²⁷ Хадорам, Узал, Дикла,

²⁸ Овал, Авимаэл, Шева,

²⁹ Офир, Хавила ве Ёвав деген огъуллары бар эди. Булар эписи Ёкътаннынъ огъулларыдыр.

³⁰ Оларнынъ яшагъан топракълары Мешадан башлап шаркъ дагъы олгъан Сефаргъа баргъандже эди.

³¹ Бу, къабилелерине ве тиллерине коре, топракъларында ве миллетлерине коре олгъан Шемнинъ эвлятлары.

³² Нух огъулларындан башта эвлятлар, эвлятлардан исе миллетлер айырылдылар. Бу, Нух огъулларындан пейда олгъан къабилелердир. Булардан, сув ташкъынындан сонъ, ер юзюндеки миллетлер чыкътылар.