Амос 7 - Мукъаддес Китап

Сарынчкъа, атеш ве саркъма акъкъында руя

¹ РАББИ-ТААЛЯ манъа шуны косьтерди: Мына, падишанынъ пайына тюшкен пичен вакътындан сонъ, отлар янъыдан ешерип башлагъанда, РАББИ сарынчкъаны ёллады.

² Сарынчкъалар мемлекеттеки отны ашап битиргенде, мен бойле дедим: – РАББИ-ТААЛЯ! Ялварам, багъышла! Якъупнынъ халкъы бунъа насыл даяныр? Кичик бир халкътыр о!

³ РАББИ фикирни денъиштирди. – Бу шей япылмайджакъ, – деди РАББИ.

⁴ РАББИ-ТААЛЯ манъа шуны косьтерди: Мына, РАББИ-ТААЛЯ адамларны джезаламагъа атешни ёллады. Атеш терен денъизни ве топракънынъ бир къысмыны якъып битирди.

⁵ О заман мен бойле дедим: – РАББИ-ТААЛЯ, ялварам, токътат буны! Якъупнынъ халкъы бунъа насыл даяныр? Кичик бир халкътыр о!

⁶ РАББИ фикирни денъиштирди. – Бу шей де япылмайджакъ, – деди РАББИ-ТААЛЯ.

⁷ О, манъа даа буны косьтерди: Мына, Рабби саркъма ярдымынен къурулгъан диварда тура, къолунда да бир къуршун саркъма бар.

⁸ РАББИ менден: – Амос, сен не коресинъ? – деп сорады. Мен: – Бир саркъманы, – дедим. Бунъа Рабби бойле деди: – Мына, Мен халкъым Исраильнинъ ортасына бир саркъма къояджагъым. Бир даа оларны багъышламайджагъым.

⁹ Исхакънынъ ибадет тёпелери ёкъ этиледжек, Исраильнинъ азиз ерлери йыкъыладжакъ, Еровоамнынъ эвине къаршы Мен къылычнен чыкъаджагъым.

Амос ве Амацья

¹⁰ Бет-Эльдеки руханий Амацья Исраиль падишасы Еровоамгъа бойле хабер ёллады: – Амос Исраиль халкъынынъ ортасында санъа къаршы халкъны котере. Топракъ онынъ бу къадар сёзлерини котерип оламаз.

¹¹ Амос бойле дей: «Еровоам къылычнен ольдюриледжек, Исраиль исе, мытлакъа, озь топрагъындан сюргюн этиледжек».

¹² Амацья Амоскъа бойле деди: – Пейгъамбер! Бар, тез Ехуда топрагъына къайт. Анда ашап яша, анда да пейгъамберлик эт.

¹³ Бир даа Бет-Эльде пейгъамберлик этме. Бу шеэр – падиша ибадет эткен азиз ердир ве падишалыкънынъ сарайыдыр.

¹⁴ Амос Амацьягъа бойле джевап берди: – Мен пейгъамбер дегилим, пейгъамберлик япмагъа да – меним зенаатым дегиль. Мен айванасравджым ве хурма тереклерини осьтюрем.

¹⁵ Лякин РАББИ мени къой-эчкилерден алды ве манъа: «Бар, Меним халкъыма Исраильге пейгъамберлик эт», – деди.

¹⁶ Шимди РАББИнинъ сёзюне къулакъ ас. Сен: «Исраильге къаршы пейгъамберлик этме, Исхакъ эвине къаршы бир сёз айтма», – дейсинъ.

¹⁷ Шунынъ ичюн РАББИ бойле дей: – Апайынъ шеэрнинъ бир ороспусы оладжакъ, огъулларынънен къызларынъ къылычнен ольдюриледжек, сенинъ топрагъынъ ольчю йипинен пай этиледжек, сен исе арам ерде оледжексинъ. Исраиль исе мытлакъа озь мемлекетинден сюргюн этиледжек.