Амос 5 - Мукъаддес Китап

Тёвбе этмеге чагъырув

¹ Эй, Исраиль эви, Меним сизлер ичюн агълав йырымны динъленъиз:

² – Исраиль къыз йыкъылды, бир даа турып оламаз. О, озь топрагъында къалдырылды, оны турсатаджакъ кимсе ёкъ.

³ РАББИ-ТААЛЯ бойле дей: – Исраильде бир шеэрден бинъ адам дженкке чыкъса, юз адам сагъ къаладжакъ, юз адам дженк этмеге чыкъса, он адам сагъ къаладжакъ.

⁴ Шунынъ ичюн РАББИ Исраиль эвине бойле дей: – Манъа къайтынъыз, ве сагъ къалырсынъыз.

⁵ Бет-Эльге кетменъиз, Гилгалгъа кирменъиз, Беэр-Шева шеэрине кечменъиз. Гилгал шеэри сюргюн этиледжек, Бет-Эль шеэри гъайып оладжакъ.

⁶ РАББИге къайтынъыз, ве сагъ къалырсынъыз. Ёкъса О, атеш киби, Юсуф эвине атыладжакъ ве Бет-Эльни якъып ёкъ этеджек. Янгъынны сёндюреджек кимсе олмаз.

⁷ Эй, адалетни зеэрге чевиргенлер, акъикъатны ерге ургъанлар!

⁸ Алла Улькер ве Орион йылдыз такъымларыны яраткъан. О, зифт къаранлыкъны саба ярыгъына чевире, куньдюзни геджеге айландыра, денъиз сувларыны чагъырып, оларны ер юзюне тёке. Онынъ Ады – РАББИдир!

⁹ О, кучьлю адамны бирден йыкъа, къалелерни ёкъ эте.

¹⁰ Сиз исе адалетли суд эткенлерни нефрет этесиз, догърусыны айткъанларны кореджек козюнъиз ёкъ.

¹¹ Сиз фукъарелерни таптайсынъыз, олардан богъдай бергисини аласынъыз. Шунынъ ичюн паалы таш эвлер къурарсыз, лякин анда яшамазсыз, гузель юзюм багъларыны сачарсыз, лякин оларнынъ шарабыны ичмезсиз.

¹² Къанунсыз ишлеринъиз не къадар чокъ, гуналарынъыз не къадар буюк олгъаныны билем. Сиз инсафлы адамларгъа душманлыкъ япасыз, къапар аласыз ве фукъарелерни адалетли суд этмейсиз!

¹³ Шунынъ ичюн акъыллы адам бойле вакъыт агъзыны ачмаз, чюнки заман ямандыр.

¹⁴ Яманлыкъны япманъыз, амма эйиликке ынтылынъыз. О вакъыт сиз сагъ къалырсыз, ве Ордуларнынъ РАББИ-Таалясы сизнен олур, Онынъ сизнен олгъаныны айткъанынъыз догъру оладжакъ.

¹⁵ Яманлыкъны кореджек козюнъиз олмасын, лякин эйиликни севинъиз, шеэр араба къапусы янында адалетли суд этинъиз. Бельки о вакъыт РАББИ, Ордуларнынъ Алласы, Юсуфнынъ эвинден сагъ къалгъанларгъа мерамет косьтерир.

¹⁶ Шунынъ ичюн РАББИ-Тааля, Ордуларнынъ Алласы, бойле дей: – Бутюн мейданларда къычырып агълайджакълар, эписи сокъакъларда: «Ах, вай-вай-вай!» – дейджеклер, койлюлерни матем тутмагъа, такъмакъчыларны такъмакъламагъа чагъыраджакълар.

¹⁷ Бутюн юзюм багъларында къычырып агълайджакълар, чюнки Мен аранъыздан джезанен кечеджегим, – дей РАББИ.

¹⁸ РАББИнинъ куню келювини истегенлерге беля олсун! РАББИнинъ куню сизге неге керектир? О ярыкъ дегиль, къаранлыкъ оладжакътыр.

¹⁹ О вакъыт бири насыл арсландан къачар да, огюне аюв чыкъар, эвине къайтып къолунен диваргъа таяныр да, къолуны йылан тишлер.

²⁰ РАББИнинъ куню ярыкъны дегиль, къаранлыкъны кетиреджек. О – гъамлы къаранлыкътыр, бир парылды биле ёкъ.

²¹ Байрамларынъызны кореджек козюм ёкъ, оларны ред этем, азиз топлашувларынъызны къабул этмейим.

²² Манъа бутюнлей якъыладжакъ къурбанларны ве ашлыкъ бахшышларыны кетирсенъиз, Мен олардан разы олмайджагъым, бакъылгъан бузавларынъыздан чалгъан аманлыкъ къурбанларынъызны къабул этмейджегим.

²³ Йырлар шаматасыны Менден узакъ тутунъыз, арфаларынъызнынъ сесини динълемейджегим.

²⁴ Лякин адалет, сув киби, акъсын, акъикъат да, къурумайджакъ озен киби, олсун.

²⁵ Эй, Исраиль эви, къыркъ йыл сахрада Манъа къурбан ве ашлыкъ бахшышларыны кетирдинъизми?

²⁶ Сиз падишанъыз Сикъкъутнынъ ве Киййуннынъ путларынъызны, озюнъиз ичюн япкъан аллаларынъызнынъ йылдызыны алып ташыдынъыз.

²⁷ Шунынъ ичюн Мен сизни Дамасктан узакъ ерге сюргюн этеджегим, – дей РАББИ. Онынъ Ады – Ордуларнынъ Алласыдыр!