Амос 3 - Мукъаддес Китап

Якъупнынъ бутюн эвине укюм

¹ Эй, Исраиль огъуллары, бу сёзлерни динъленъиз! РАББИ сизге, Мысырдан чыкъаргъан бутюн халкъкъа шойле дей:

² – Ер юзюндеки эписи халкълардан Мен тек сизни сайладым. Шунынъ ичюн къабаатларынъыз ичюн сизни джезалайджагъым.

³ Эки адам озьара келишмейип, берабер кетерми?

⁴ Мына-мына атылып ашайджакъ айванны тапкъан арслан орманда окюрерми? Бир шей тутмагъан яш арслан озь къобасындан сес ыкъарырмы?

⁵ Тузакъта ем олмаса, къуш ердеки къапкъангъа тюшерми? Ичине бир шей тюшмеден, къапкъан ерден къыбырдармы?

⁶ Шеэрде телюке сигналыны бору чалгъанда, халкъ къоркъмазмы? РАББИнинъ разылыгъы олмайып, бир шеэрнинъ башына беля тюшерми?

⁷ РАББИ-ТААЛЯ Озь ниетлерини къуллары пейгъамберлерге ачмагъандже, бир шей япмаз.

⁸ Арслан окюрсе, ким титремез? РАББИ-ТААЛЯ айтса, ким пейгъамберлик этмез?

⁹ Ашдод шеэрининъ къавийлештирильген сарайларында ве Мысыр топрагъынынъ къавийлештирильген сарайларында яшагъанларгъа буны бильдиринъиз: – Самарие дагъларында топланынъыз, ичиндеки чокътан-чокъ къалабалыкъ ве амансызлыкъкъа бакъынъыз.

¹⁰ – Олар яхшылыкъны япмагъа бильмейлер, – дей РАББИ. – Озь сарайларыны хырсызлангъан ве зорбалыкънен алынгъан шейлерге толдуралар.

¹¹ Шунынъ ичюн РАББИ-ТААЛЯ бойле дей: – Душманлар топрагъынъызнынъ этрафыны сараджакъ, байлыгъынъызны тартып аладжакъ, сарайларынъызны чайпайджакъ.

¹² РАББИ бойле дей: – Бир чобан арсланнынъ агъзындан айваннынъ эки кемигини я да къулагъынынъ парчасыны къуртаргъаны киби, Самариеде яшагъан Исраиль огъуллары да ойле къуртарыладжакъ. Оларда тек тёшекнинъ кошеси, диваннынъ аягъы къаладжакъ.

¹³ – Динъленъиз ве Якъупнынъ эвине къаршы шаатлыкъ этинъиз, – дей РАББИ-ТААЛЯ, Ордуларнынъ Алласы.

¹⁴ – Бир кунь Мен Исраильни гуналары ичюн джезалайджагъым, Бет-Эльдеки къурбан ерлери ичюн де джезалайджагъым. Къурбан ерининъ бойнузлары кесиледжек ве ерге тюшеджек.

¹⁵ Эм къышлыкъ, эм язлыкъ эвлерини йыкъаджагъым, фильтишнен яраштырылгъан эвлер гъайып оладжакъ, ве даа чокътан-чокъ эвлер ёкъ оладжакъ, – дей РАББИ.