Агълав йырлары 5 - Мукъаддес Китап

Мерамет ичюн дува

¹ Я РАББИ, бизнен не олгъаныны унутма! Бакъ да, масхаралыгъымызны корь.

² Мал-мулькюмиз – душманларымызгъа кечти, эвлеримиз ябанджыларгъа тюшти.

³ Оксюз, бабасыз къалдыкъ; аналарымыз – тул къадынлар кибидир.

⁴ Сувумызгъа кумюш беремиз; акъча берип, одунларымызны аламыз.

⁵ Къувалайыджымыз артымыздан къувалай, раатлыкъ бильмезден чалышамыз.

⁶ Мысыргъа къол узатамыз, ашлыкъ ичюн Ашшургъа ялварамыз.

⁷ Бабаларымыз гуна япты ве ёкъ олды, оларнынъ къабаатлары ичюн биз джезаланамыз.

⁸ Къуллар бизге башлыкъ этелер, оларнынъ къолундан къуртараджакъ ёкъ.

⁹ Отьмек ичюн джан бермеге азырмыз, сахрада бизни къылыч къоркъуза.

¹⁰ Якъыджы ачлыкътан теримиз соба киби сыджакъ.

¹¹ Сионда апайларамызнынъ, Ехуда шеэрлеринде къызларымызнынъ намусына токъуналар.

¹² Душманлар башлыкъларымны астылар, акъсакъалларны урьмет этмейлер.

¹³ Дегирмен ташларнен йигитлер ун чекелер, агъыр одун юкю ташып, яш огъланлар сюрюнелер.

¹⁴ Шеэр къапуларында акъсакъаллар отурмай, йигитлер энди йырламай.

¹⁵ Юрегимизнинъ къуванчы битти, оюнларымыз агълавгъа чевирильди.

¹⁶ Таджымыз башымыздан тюшти; бизге беля; гуна яптыкъ!

¹⁷ Шунынъ ичюн юреклеримиз сызлай, козьлеримиз бунарланды.

¹⁸ Сион дагъы бакъымсыз къалды, устюнде тилькилер юрелер.

¹⁹ Я РАББИ, Сен эбедиен падишалыкъ этесинъ! Тахтынъ несиллерден несиллерге турар!

²⁰ Не ичюн бизни бутюнлей унутасынъ? Нечюн бизни о къадар чокъ вакъыткъа къалдырасынъ?

^21-22 Я РАББИ, бизни бутюнлей терк эткен олсанъ да, бизге къарардан зияде ачувлангъан олсанъ да, эвель куньлеримизни къайтар, бизни Озюнъе чевир, ве биз къайтармыз.