Агълав йырлары 4 - Мукъаддес Китап

Йыкъылгъан Ерусалим Алеф

Алеф

¹ Вай-вай-вай! Алтын бозулды, энъ яхшы алтын къара олды; азиз ташлар эр сокъакъ бою тёкип-сачылды.

Беит

Беит

² Сион огъуллары энъ яхшы темиз алтын киби къыйметли эди; насыл этип, оларнынъ къыймети балчыкъ бардакъкъа, чёльмекчининъ япкъанына тенъ олды?

Гимел

Гимел

³ Шакъаллар биле меме берип, кучелеклерини эмиздирелер, халкъымнынъ къызы исе, сахрадаки девекъушу киби, мераметсиз олды.

Далет

Далет

⁴ Къундакъ балаларнынъ тили сувсузлыкътан тамакъларына япыша; балалар отьмек сорай, береджек сою ёкъ.

Хе

Хе

⁵ Бир вакъыт яхшы ашларны ашагъанлар шимди сокъакъларда бакъымсыз юрелер; бир вакъыт паалы урба кийип оськенлер шимди кубре обаларында яталар.

Вав

Вав

⁶ Халкъымнынъ джезасы Содомнынъ гунасы ичюн джезадан буюктир; Содом бирден гъайып олды, адам къолу онъа токъунмады.

Зайин

Зайин

⁷ Аллагъа багъышлангъанлар къардан темиз, сюттен беяз эдилер; тенлери – гульден ал-гульгюлидир, корюнишлери кок якъут киби темиз эди.

Хет

Хет

⁸ Шимди исе бетлери комюрден къара, сокъакъларда оларны танымайлар; терилери кемиклерине япышты, терекнинъ къабугъы киби, къуру олды.

Тет

Тет

⁹ Къылычнен ольдюрильгенлер ачлыкътан ольгенлерден бахтлыдыр; тарла берекети олмагъанындан чекишип, ирип кетелер.

Ёд

Ёд

¹⁰ Мераметли къадынлар озь балаларыны пиширелер; сабийлер ашкъа чевирильди, халкъым гъайып ола.

Каф

Каф

¹¹ РАББИ бутюнлей гъазабыны тёкти, къызгъын ачувыны ёллады; темелини якъып ташлагъан атешни Сионда туташтырды.

Ламет

Ламет

¹² Ер юзюнинъ падишалары, дюньяда яшагъан эр кес Ерусалимнинъ къапудан душман киреджегине инанмай эдилер.

Мим

Мим

¹³ Бунынъ эписи – пейгъамберлернинъ гунасы, руханийлернинъ къабааты ичюн джезадыр, чюнки олар шеэрнинъ ортасында догъру адамларнынъ къаныны тёктилер.

Нун

Нун

¹⁴ Шимди, кёрлар киби, сокъакълар бою юрелер, къаннен арамлангъанлары ичюн, урбаларына биле токъунмагъа олмаз.

Самек

Самек

¹⁵ «Кетинъиз мындан, арамлар!» – деп къычыралар оларгъа; «Кетинъиз! Кетинъиз мындан! Токъунманъыз!» ве олар салланып къачалар. Халкълар арасында: «Олар мында къалмасын!» – дейлер.

Пе

Пе

¹⁶ РАББИ Озю оларны къачакъ этти, энди оларгъа бакъмайджакъ; олар руханийлерни урьмет этмедилер, къартларгъа мерамет косьтермедилер.

Айин

Айин

¹⁷ Козьлеримиз кёр олды, ярдымны бошуна бекледик; къаравул къуллесинден бакъып, бизни къорчалайджакъ халкъны бекледик, олар исе бизни къорчалап оламады.

Саде

Саде

¹⁸ Олар сакъланып, бизлерни тутмакъ ичюн беклейлер, сокъакълар бою юрмеге къоркъамыз; сонъумыз якъынлашты, куньлеримиз битти, бизим сонъумыз кельди.

Коф

Коф

¹⁹ Бизни къувалагъанлар кок къарталларындан чабик эди; дагълар бою артымыздан къуваладылар, сахрада бизге къапкъан къойдылар.

Реш

Реш

²⁰ Омюримизнинъ нефеси, РАББИнинъ Месихи чукъурда тутулды; бизлер исе: «Халкъларнынъ арасында, онынъ колеткесинде яшайджакъмыз», – дедик.

Шин

Шин

²¹ Уц топрагъында яшагъан Эдом къызы, шенълен ве къуван! Санъа да къаде келеджек, сархошланып, союнаджакъсынъ.

Тав

Тав

²² Эй, Сион къызы! Гуналарынъ ичюн джеза битти, Рабби сени бир даа сюргюн этмейджек. Эдом къызы исе! Къабаатларынъ ичюн Рабби сени джезалайджакъ, гуналарынъны мейдангъа чыкъараджакъ.