Агълав йырлары 3 - Мукъаддес КитапЙирмеянынъ къасевети Алеф Алеф 1 Мен – къасевет корьген адамым, РАББИ гъазапнен мени урды. 2 О мени къувды, ярыкъкъа дегиль, къаранлыкъкъа алып кетти; 3 манъа чевирилип, бутюн кунь къолуны менден алмай. Беит Беит 4 Тенимнен теримни ёкъ этти, кемиклеримни къырды; 5 мени алкъагъа алды, чевре-четиме аджджы беля къойды; 6 чокътан ольген адамны киби, мени къаранлыкъ ерде ерлештирди. Гимел Гимел 7 Чевре-четиме дивар къойды, чыкъып оламайым, агъыр зынджырнен багълады; 8 мен къычырып, ярдымгъа чагъыргъанда, дуваларымны къабул этмеди; 9 ёлларымны ташларнен къапатты, туткъан ёлларымны къыйыш япты. Далет Далет 10 О, сакъланып беклеген аюв киби, гизли ерде отургъан арслан киби олды; 11 меним ёлумны къапатты, мени парчалады, ярдымсыз къалдырды; 12 яйыны чекти, окълары ичюн мени нишан этип къойды. Хе Хе 13 Окълугъындан окъларыны алып, бюйреклериме атты; 14 бутюн халкъ огюнде масхара олдым, мени эр кунь йырларнен мыскъыллайлар. 15 Рабби манъа аджджы отьлер ашатты, зафра ичирди. Вав Вав 16 Тишлеримни ташларнен къырды, мени ерге таптады, 17 джанымнынъ раатлыгъы гъайып олды, аманлыкъ не олгъаныны унуттым. 18 «Кучюм битти, РАББИге олгъан умютим кесильди», – дедим. Зайин Зайин 19 Чеккен азабымны ве раатсызлыгъымны, зафра киби аджджы алымны акъылынъда тут. 20 Буны акъылыма кетиргенимде, джаным сыкъыла. 21 Юрегиме джевап берип, бунъа умют этем: Хет Хет 22 «РАББИнинъ буюк севгиси битмеди, Онынъ мерамети гъайып олмады; 23 олар эр саба янъыдан келелер; Сенинъ ишанчлыгъынъ буюктир!» 24 «РАББИ – меним къысметим, – дей джаным. – Онынъ ичюн Онъа ишанаджагъым!» Тет Тет 25 РАББИге ишангъанларгъа, Оны къыдыргъан джангъа О, яхшылыкънен бакъа. 26 РАББИден сабырнен къуртулыш беклемек – яхшыдыр! 27 Яшлыкътан сабыр этмеге огренген адамгъа яхшы олур! Ёд Ёд 28 Рабби адамны тербиелегенде, о, индемейип, бир озю къалсын; 29 бетинен ерге тюшип: «Бельки, умютим кесильмеди», – деп тюшюнсин; 30 оны ургъанларгъа янагъыны чевирсин, айыпкъа толсун. Каф Каф 31 Рабби эр вакъыт юзь чевирмез; 32 беля ёлласа да, буюк севгисинен мерамет де эйлер. 33 Инсан огъулларыны джезаламагъа, оларгъа дерт бермеге севмей. Ламет Ламет 34 Ер юзюнде бутюн къапатылгъанларны аякъларнен таптагъанларда, 35 Юдже Алланынъ огюнде адамны адалетсиз суд эткенлерде, 36 адамнынъ давасыны янълыш чезгенлерде, Рабби буны корьмезми, аджеба?! Мим Мим 37 Рабби буюрмаса, адам бир шей айтып, беджерирми? 38 Яманлыкъ да, яхшылыкъ да Юдже Алланынъ эмиринден олгъанда, 39 яшагъанлар не ичюн агъланалар? Эр кес озь гуналары ичюн агълансын! Нун Нун 40 Туткъан ёлларымызны сынап огренейик ве РАББИге къайтайыкъ; 41 коклердеки Аллагъа юреклеримизни чевирейик, Онъа къолларымызны котерейик; 42 «Биз Санъа къаршы чыкътыкъ, инатландыкъ, ве Сен бизни багъышламадынъ», – айтайыкъ. Самек Самек 43 Ачувланып, бизни къувалайсынъ, аджымайып, ольдюресинъ; 44 дуваларымыз Санъа етмесин деп, булутларнынъ артында сакъланасынъ; 45 халкълар арасында чёплюк ве ташлантылар олдыкъ. Пе Пе 46 Бутюн душманларымыз бизге къаршы агъызларыны ачтылар; 47 къоркъугъа ве чукъурларгъа тюштик, беля-къазагъа огърадыкъ; 48 халкъым гъайып олгъаны ичюн козьяшларым дерья киби акъа. Айин Айин 49 Козьяшларым токътамаздан акъа, эр вакъыт агълайым; 50 РАББИ коклерден бакъып, корьмегендже, токътатмайджагъым; 51 шеэримнинъ бутюн къызларына бакъкъанда, юрегим яна. Саде Саде 52 Бир тюрлю себеп олмайып, душманларым мени, бир къуш киби, авлайлар; 53 мени сагъ алымда чукъургъа ташладылар, устюме таш аттылар; 54 сувлар башыма къадар котерильди, «Гъайып олдым», – деп тюшюндим. Коф Коф 55 Я РАББИ, терен чукъурдан Сени Адынънен чагъырдым. 56 Сен сесимни эшиттинъ, «Къулагъынъны къапатма, къуртар, ярдым эт манъа», – дедим. 57 Сени чагъыргъанымда, якъынлаштынъ, ве: «Къоркъма!» – дединъ. Реш Реш 58 Рабби, Сен меним ишимни чездинъ, джанымны сатын алып, къуртардынъ. 59 Я РАББИ, чекишкенимни корьдинъ, давамны адалетли суд эт. 60 Оларнынъ бутюн ачувларыны, манъа къаршы къара ниетлерини корьдинъ. Шин Шин 61 Я РАББИ, оларнынъ мыскъылларыны эшиттинъ, манъа къаршы къара ниетлерини бильдинъ; 62 душманларым мени яманлайлар, эр кунь мени мыскъыллайлар; 63 бакъ, отурсалар да, турсалар да, эр вакъыт йырлап, мени кулелер. Тав Тав 64 Джезала оларны, я РАББИ, къоллары япкъанларына коре бер акъларыны; 65 акъылларыны ал, оларны къаргъа; 66 ачувнен къувала, ер юзюнден ёкъ эт оларны, я РАББИ! |
© Институт перевода Библии, 2016
Institute for Bible Translation, Russia