4 Падишалар 9 - Мукъаддес Китап

Ехуны ягънен сюртип, Исраильнинъ падишасы япалар

¹ Эль-Яса пейгъамбер, пейгъамберлернинъ бирисини чагъыртып, онъа: – Белинъни багъла, шу зейтюн ягъынен толу савутны ал да, Рамот-Гиладгъа бар.

² Анда кельген сонъ, Нимший огълу Ехошафатнынъ огълу Ехуны тап. Оны агъаларынынъ сырасындан айырып, ичери одагъа кирсет.

³ Зейтюн ягъынен толу савутны ал да, онынъ башына тёк ве бойле айт: «РАББИ бойле дей: Сени ягънен сюртип, Мен сени Исраиль падишасы этем». Сонъ къапуны ач да, беклемейип къач, – деди.

⁴ Сонъ яш пейгъамбер Рамот-Гиладгъа кетти.

⁵ Анда кельди. Анда орду башлыкълары отура эдилер. Яш: – Орду башлыгъы, санъа лафым бар, – деди. – Арамыздан кимнен лаф этеджексинъ? – деп сорады Еху. Пейгъамбер: – Сеннен, орду башлыгъы, – деди.

⁶ Еху турып эвге кирди. Яш пейгъамбер онынъ башына зейтюн ягъыны тёкти ве: – Исраильнинъ Алласы олгъан РАББИ бойле дей: Сени ягънен сюртип, Мен сени РАББИнинъ халкъы олгъан Исраильнинъ падишасы япам.

⁷ Сен эфендинъ Ахавнынъ союны ёкъ этеджексинъ. Шунынънен меним къулларым пейгъамберлернинъ тёкюльген къанлары ичюн ве РАББИнинъ эписи къулларынынъ къанлары ичюн Мен Изевельден акътыман аладжагъым.

⁸ Ахавнынъ бутюн сою гъайып оладжакъ. Мен Ахавнынъ союнда эр бир акъайны: къул олсун, азат олсун, – Исраильде оларнынъ эписини ёкъ этеджегим.

⁹ Ахавнынъ союны Неват огълу Еровоамнынъ ве Ахия огълу Баашанынъ сою киби япарым.

¹⁰ Изевельни исе Йизреэлдеки топракъта копеклер ашар, кимсе оны дефн этмез, – деди де, къапуны ачып къачып кетти.

¹¹ Еху эфендисининъ хызметчилерине чыкъып, ондан: – Эписи яхшымы? – деп сорадылар. – Не ичюн санъа бу дели кельди? – Сиз бу адамны билесинъиз, онынъ айткъаны да сизге белли, – деди Еху.

¹² Олар: – Ялан, айт бизге, – дедилер. О, оларгъа эписини айтып: – Бу яш манъа айтты: «РАББИ бойле дей: Сени ягънен сюртип, Мен сени Исраильнинъ падишасы этем», – деди.

¹³ Сонъ олар ашыкъып турдылар, эр бири урбасыны алып, мердивен басамакъларына тёшеди, бору чалдылар ве: – Еху падиша олды! – деп илян эттилер.

Ёрамнынъ ольдюрилюви

¹⁴ Сонъ Нимший огълу Ехошафатнынъ огълу Еху Ёрамгъа къаршы фитнеджилик япты. Ёрам бутюн исраилли ордусынен берабер Рамот-Гилад янында Арамнынъ падишасы Хазаэлге къаршы тура эди.

¹⁵ Арамнынъ падишасы Хазаэлнен дженк эткенде, арамлылар Ёрам падишаны яраладылар, ве Ёрам яраларыны тюзельтмек ичюн, Йизреэлге къайтты. Еху: – Эгер бунъа разы олсанъыз, кимсе шеэрден Йизреэлге хабер этмеге къачып кетмесин, – деди.

¹⁶ Сонъ арабагъа отурып, Йизреэлге кетти. Ёрам анда ятмакъта эди. Ехуда падишасы Ахазья да анда эди, чюнки о хаста Ёрамны ёкълап кельген эди.

¹⁷ Йизреэлнинъ къуллесинде къаравул тура эди. О, келеяткъан Ехунынъ ордусыны корьди ве: – Мен орду корем! – деди. Ёрам: – Бир атлы адамны ал да, оларнынъ къаршысына йибер. «Эписи яхшымы?» – деп сорасын, – деди.

¹⁸ Атлы, ордунынъ къаршысына чыкъты ве: – Падиша: «Эписи яхшымы?» – деп сорай, – деди. Еху исе: – Сенинъ не ишинъ бар? Меним пешимден кет, – деди. Къаравул буларны корип: – Атлы оларгъа етти, амма артына къайтмай, – деди.

¹⁹ Экинджи атлыны йибердилер. О да ордугъа келип: – Падиша: «Эписи яхшымы?» – деп сорай, – деди. Еху кене: – Сенинъ не ишинъ бар? Меним пешимден кет, – деди.

²⁰ Къаравул буларны корип: – О, оларгъа етти, амма артына къайтмай. Арабаджы Нимший огълу Еху киби атларны айдай. О, дели киби айдай, – деди.

²¹ Ёрам: – Арабама ат екинъиз, – деди. Арабасыны ектилер. Исраиль падишасы Ёрам ве Ехуда падишасы Ахазья эр бири озь арабасында Ехуны къаршыламагъа чыкътылар ве онынънен йизреэлли Навотнынъ тарласында расткелиштилер.

²² Ёрам Ехуны корип: – Еху, эписи яхшымы? – деп сорады. Еху исе: – Сенинъ ананъ Изевель ороспулыкъ ве чокътан-чокъ этне япып юргенде, неси яхшы оладжакъ? – деди.

²³ Ёрам арабасыны артына айландырды да, къачып кетти. О, Ахазьягъа: – Ахазья, хаинлик! – деп къычырды.

²⁴ Еху исе яйыны чекип, окъны Ёрамнынъ омузлары арасына саплады. Окъ онынъ юрегинден кечти, ве о арабасы ичине йыкъылды.

²⁵ Еху Бидкъар везирине: – Оны ал да, йизреэлли Навотнынъ тарласына ат. Хатырлайсынъмы, биз экимиз онынъ бабасы олгъан Ахавнынъ артындан арабаларда кеткенде, РАББИ онынъ акъкъында бойле хабер эвельден бильдирди:

²⁶ «Биль ки, тюневин Мен керчектен Навотнынъ ве огъулларынынъ къаныны корьдим. Бу тарлада сенден акътыман алырым, – дей РАББИ». Шимди, РАББИ айткъаны киби, оны ал да, бу тарлагъа ат, – деди.

Ахазьянынъ ольдюрилюви

²⁷ Ехуда падишасы Ахазья бутюн буларны корип, Бет-Хагъгъангъа догъру чапып кетти. Еху онынъ пешинден къувалап буюрды: – Оны да урунъыз! Ахазьяны, Ивлеам янындаки Гур тёпесине арабасында котерилеяткъанда яраладылар. О, Мегиддо ерине къачып кетти, анда да ольди.

²⁸ Къуллары онынъ олюсини Ерусалимге алып кеттилер, анда озь къабринде, баба-деделеринен бирликте, Давут Шеэринде дефн эттилер.

²⁹ Ахав огълу Ёрам 11-инджи йыл падишалыкъ эткенде, Ахазья Ехуданынъ падишасы олды.

Изевель къыраличесининъ ольдюрилюви

³⁰ Еху Йизреэлге якъынлашты. Изевель бундан хабер алып, козьлерини сурьмеледи, башыны яраштырды ве пенджереге бакъып отурды.

³¹ Еху шеэрнинъ къапусындан киргенде, Изевель: – Эй, озь эфендисини ольдюрген Зимрий, эписи яхшымы? – деп сорады.

³² Еху пенджереге башыны котерип: – Ким меним тарафымда? Ким? – деп сорады. Пенджереден онъа эки-учь везир бакъты.

³³ Еху: – Оны котерип ашагъы атынъыз, – деди. Изевельни котерип аттылар. Онынъ къаны диваргъа ве атларгъа сачрады, ве атлар оны таптадылар.

³⁴ Еху эвге кирип, ашады-ичти, сонъ: – Анавы лянетлини алып джыйынъыз ве дефн этинъиз. Насыл да олса, о, падишанынъ къызыдыр, – деди.

³⁵ Изевельни дефн этмеге кеттилер, лякин къафасы, аякълары ве эллеринден гъайры бир шейини тапмадылар.

³⁶ Къайтып келип, Ехугъа айтып бердилер. О исе: – Къулу олгъан тишбели Ильяснен айткъан РАББИнинъ сёзлери ерине кельди: «Изевельнинъ джеседини Йизреэлнинъ янында тарлада копеклер ашайджакъ.

³⁷ Йизреэлнинъ янында тарлада Изевельнинъ бедени кубре дайын ятаджакъ, шу джесет Изевельнинъ олюси олгъаныны кимсе бильмейджек», – деди.