4 Падишалар 25 - Мукъаддес Китап

Ерусалимнинъ йыкъылувы

¹ Цидкия докъузынджы йыл падишалыкъ эткенде, онунджы айынынъ онунджы кунюнде Вавилон падишасы Невукъаднеццар бутюн ордусынен Ерусалимге кельди ве оны сарып алды. Шеэрнинъ чевре-четине уджюм обаларыны обалады.

² Шеэр Цидкия падишалыгъынынъ 11-инджи йылына къадар алкъада къалды.

³ Айнынъ докъузынджы кунюнде шеэрдеки ачлыкъ пек къуветленди, халкъта отьмек уфагъы биле къалмады.

⁴ Душман шеэрге сокъулды. Геджеси аскерлернинъ эписи падиша багъчасынынъ янындаки эки дивар арасында араба къапусындан чыкъып къачтылар. Къасдийлилер шеэрнинъ этрафында турса да, падиша Арава ёлунен къачып кетти.

⁵ Къасдийлилер ордусы падишанынъ пешинден къувалап, Ерихон тегизликлеринде артындан етти. Падишанынъ бутюн ордусы къачып дагъылды.

⁶ Къасдийлилер падишаны тутып, Вавилон падишасына Ривла шеэрине кетирдилер. Анда суд эттилер.

⁷ Падишанынъ козю огюнде огъулларыны къылычнен ольдюрдилер. Сонъ Цидкиянынъ козьлерини ойдылар, аягъыны-къолуны бакъыр зынджырнен багълап, Вавилонгъа алып кеттилер.

Рабби Сарайынынъ бербат этилюви

⁸ Бешинджи айнынъ единджи кунюнде, Вавилон падишасы Невукъаднеццар 19-ынджы йыл падишалыкъ эткенде, Ерусалимге Вавилон падишасынынъ хызметчиси олгъан къаравуллар башлыгъы Невузарадан кельди.

⁹ О, РАББИнинъ Сарайыны, падишанынъ эвини ве Ерусалимдеки эвлернинъ эписини якъты. Эр бир буюк эвни атеште якъты.

¹⁰ Къаравуллар башлыгъынен кельген къасдийли ордусы Ерусалимнинъ диварларыны йыкъты.

¹¹ Сонъ къаравулларнынъ башлыгъы Невузарадан шеэрде къалгъан халкъны да, Вавилон падишасы тарафына кечкен адамларны да, башкъа къалгъан адий халкъны да шеэрден сюргюн этти.

¹² Къаравулларнынъ башлыгъы ялынъыз энъ фукъаре халкънынъ бир къач адамларыны топракъны ишлемек ве багъчаджылыкъ япмакъ ичюн къалдырды.

¹³ Къасдийлилер РАББИнинъ Сарайы янындаки бакъыр колонналарны, буюк аякъларны ве РАББИнинъ Сарайындаки «Денъиз» адландырылгъан бакъыр хавузны парлап, бакъырыны Вавилонгъа алып кеттилер.

¹⁴ Ибадетте къулланылгъан легенлер, куречиклер, мельте макъаслары, лотоклар ве бутюн бакъыр савутларны алдылар.

¹⁵ Къаравулларнынъ башлыгъы алтындан ве кумюштен япылгъан чанакъ ве комюр табакъларыны алды.

¹⁶ Эки дане колоннанынъ, бир дане «Денъиз»нинъ, РАББИнинъ Эви ичюн Сулейман яптыргъан аякъларнынъ бакъыры, бутюн бу бакъыр шейлернинъ агъырлыгъы эсапсыз эди.

¹⁷ Бир колоннанынъ юксеклиги докъуз метр эди. Устюнде бир бакъыр капитель бар эди. Капительнинъ юксеклиги бир бучукъ метр эди. Капительнинъ чевре-четинде нарлар ве агъ да – эписи бакъырдан эди. Экинджи колонна, биринджиси киби, агълы эди.

Ехудалыларны Вавилонгъа сюргюн этелер

¹⁸ Къаравулларнынъ башлыгъы руханийлернинъ башлыгъы Сераяны, экинджи руханий Цефаньяны ве къапуда къаравул тургъан учь адамны алды.

¹⁹ Шеэрден аскерлернинъ башлыгъы олгъан бир везирни, шеэрде тапылгъан падишанынъ беш меслеатчысыны, халкъны аскерликке яздыргъан баш арбий языджысыны ве шеэрде булунгъан халкъ арасындан алтмыш адамны да алды.

²⁰ Къаравулларнынъ башлыгъы Невузарадан оларны алып, Ривла шеэрине, Вавилон падишасына кетирди.

²¹ Вавилон падишасы оларны Хамат топракъларындаки Ривлада ольдюрди. Бойледже, ехудалылар озь топракъларындан сюргюн этильди.

Ехуданынъ ёлбашчысы Гедалья

²² Вавилон падишасы Невукъаднеццар Ехуда мемлекетинде къалдыргъан халкънынъ башлыгъы оларакъ Шафан огълу Ахикъамнынъ огълу Гедальяны къойды.

²³ Орду башлыкълары ве оларнынъ адамлары, Вавилон падишасы оларгъа башлыкъ оларакъ Гедальяны къойгъаныны эшитип, Гедальягъа Мицпа шеэрине кельдилер. Нетанья огълу Исмаил, Къареах огълу Ёханан, нетофалы Танхуметнинъ огълу Серая, маакъалынынъ огълу Яазанья ве оларнынъ адамлары кельдилер.

²⁴ Гедалья оларнынъ ве адамларынынъ алдында ант этип: «Къасдийли башлыкълардан къоркъманъыз. Топракъта ерлешинъиз ве Вавилон падишасына хызмет этинъиз, сизде эписи яхшы олур», – деди.

²⁵ Единджи айында падиша союндан олгъан Элишама огълу Нетанья огълу Исмаил он адамнен келип, Гедальяны урып ольдюрди. Онынънен берабер Мицпада олгъан ехудалыларны ве къасдийлилерни де ольдюрди.

²⁶ Сонъ бутюн халкъ – кичиги-буюги ве орду башлыкълары – аякъкъа къалкъты ве Мысыргъа кеттилер, чюнки къасдийлилерден къоркъа эдилер.

Ехоякиннинъ зиндандан азат этилюви

²⁷ Эвил-Меродакъ Вавилоннынъ падишасы олды. Озь падишалыгъынынъ биринджи йылында, Ехуда падишасы Ехоякиннинъ сюргюнликтеки 37-нджи йылында, 12-нджи айында, айнынъ 27-нджи кунюнде, о, Ехуданынъ падишасы олгъан Ехоякинни зиндандан чыкъарды.

²⁸ Онен яхшы лакъырды этти ве онынъ тахтыны башкъа Вавилонгъа кельген падишаларнынъ тахтындан юксек къойды.

²⁹ Ехоякин озь зиндан урбаларыны денъиштирди ве бутюн яшайышы девамында падишанынъ софрасындан ашады.

³⁰ О, яшайышы боюнджа падишадан эр кунь даимий ашамалыкъ-ичмелик алды.