4 Падишалар 24 - Мукъаддес Китап

¹ Ехоякимнинъ куньлеринде Вавилон падишасы Невукъаднеццар онъа къаршы чыкъты, ве Ехояким онъа бойсунды. Учь йыл девамында онъа бойсунды, сонъ онъа къаршы котерильди.

² РАББИ онъа къаршы къасдийлилернинъ, арамлыларнынъ, моавлыларнынъ ве аммонлыларнынъ айдутлар сюрюлерини йиберди. РАББИ къуллары пейгъамберлернен эвельден айткъаны киби, О, шу сюрюлерни Ехуданы ёкъ этмек ичюн йиберди.

³ Бутюн бу шейлер РАББИнинъ эмирине коре Ехуданынъ башына тюшти, чюнки Менашшенинъ япкъан гуна ишлери ичюн РАББИ Ехудадан вазгечти.

⁴ Менашше къабаатсыз къан тёкип, Ерусалимни къабаатсыз къангъа толдургъан, шунынъ ичюн РАББИ оны багъышламагъа истемеди.

⁵ Ехояким акъкъында башкъа шейлер, онынъ япкъан шейлери акъкъында Ехуда падишаларынынъ тарихы китабында язылгъандыр.

⁶ Ехояким кечинип, баба-деделерине къошулды. Онынъ ерине огълу Ехоякин падиша олды.

⁷ Мысыр падишасы бир даа озюнинъ мемлекетинден чыкъмады, чюнки Вавилон падишасы Мысыр дерьясындан башлап Фират дерьясына баргъандже Мысыр падишасынынъ бутюн ерлерини тартып алды.

Ехуданынъ падишасы Ехоякин

⁸ Ехоякин падиша олгъанда, 18 яшында эди. О, Ерусалимде учь ай девамында падишалыкъ этти. Анасы – ерусалимли Элнатаннынъ къызы Нехушта эди.

⁹ Ехоякин РАББИнинъ огюнде бабасы киби ярамай шейлер япып яшады.

¹⁰ О куньлерде Вавилон падишасы Невукъаднеццарнынъ аскерлери Ерусалимге якъынлашты ве шеэрни алкъагъа сардылар.

¹¹ Аскерлери шеэрни сарып алгъан вакъытта, Вавилон падишасы Невукъаднеццар шеэрге кельди.

¹² Ехуда падишасы Ехоякин озю, анасы да, хызметчилери де, мырзалары ве везирлери де Вавилон падишасы Невукъаднеццарнынъ огюне чыкъты. Вавилон падишасы секизинджи йыл падишалыкъ эткенде, Ехоякинни запт этти.

¹³ Невукъаднеццар РАББИ Сарайынынъ ве падиша сарайынынъ хазинесинден бутюн къыйметли шейлерни алып кетти. РАББИнинъ сёзлерине коре, Исраиль падишасы Сулейман РАББИнинъ Сарайы ичюн яптыргъан бутюн алтын шейлерни кесип алды.

¹⁴ О, Ерусалимде яшагъан эр бир адамны, эр бир мырзаны ве джесюр ордуны – он бинъ адамны – сюргюн этти. Шеэрден бутюн зенаатчы ве демирджилерни чыкъарды. Факъыр-фукъаре халкътан гъайры кимсе къалмады.

¹⁵ Ехоякинни де Вавилонгъа сюргюн этти. Падишанынъ анасыны, къадынларыны, везирлерини ве мемлекетнинъ буюк мырзаларыны Ерусалимден Вавилонгъа сюргюн этти.

¹⁶ Вавилон падишасы еди бинълик бутюн ордуны, бинъ зенаатчы ве демирджини, дженкте иштирак эткен эписи джесюр адамларны Вавилонгъа сюргюн этти.

¹⁷ Вавилон падишасы Ехоякиннинъ ерине онынъ эмджеси Маттаньяны падиша япты, адыны Цидкиягъа денъиштирди.

Ехуданынъ падишасы Цидкия

¹⁸ Цидкия падиша олгъанда, 21 яшында эди. О, Ерусалимде 11 йыл девамында падишалыкъ этти. Анасы – Ливна шеэринден олгъан Йирмеянынъ къызы Хамутал.

¹⁹ Цидкия РАББИнинъ огюнде, Ехояким киби, ярамай шейлер япып яшады.

²⁰ РАББИ Ерусалим ве Ехудагъа гъазаплангъаны ичюн, оларны Озюнден ред этти. Цидкия исе Вавилон падишасына къаршы котерильди.