4 Падишалар 2 - Мукъаддес Китап

Ильяснынъ кокке котерилюви

¹ РАББИ Ильясны фуртуна ичинде коклерге чыкъармагъа истеген вакъытта, Ильяс Эль-Ясанен берабер Гилгалдан чыкъып кетеята эди.

² Ильяс Эль-Ясагъа: – Сен мында къал. Мени исе РАББИ Бет-Эльге ёллай, – деди. Лякин Эль-Яса онъа джевап къайтарып: – РАББИнинъ огюнде ве сенинъ огюнъде ант этем: мен сени бир озюнъни къалдырмам! – деди, ве олар экиси де Бет-Эльге кеттилер.

³ Бет-Эльдеки пейгъамберлернинъ шегиртлери Эль-Ясанынъ огюне чыкътылар ве ондан: – Бугунь РАББИ сенинъ эфендинъни сенден аладжагъы акъкъында хаберинъ бармы? – деп сорадылар. Эль-Яса: – Меним де хаберим бар. Индеменъиз! – деди.

⁴ Ильяс Эль-Ясагъа: – Сен мында къал. Мени исе РАББИ Ерихонгъа ёллай, – деди. Эль-Яса исе: – РАББИнинъ огюнде ве сенинъ огюнъде ант этем: мен сени бир озюнъни къалдырмам! – деди, ве олар экиси де Ерихонгъа бардылар.

⁵ Ерихондаки пейгъамберлернинъ шегиртлери Эль-Ясагъа якъынлашып, онъа: – Бугунь РАББИ эфендинъни сенден аладжагъы акъкъында хаберинъ бармы? – дедилер. О исе: – Меним де хаберим бар. Индеменъиз! – деди.

⁶ Ильяс Эль-Ясагъа: – Сен мында къал. Мени исе РАББИ Иордан озенининъ янына ёллай, – деди. Эль-Яса исе: – РАББИнинъ огюнде ве сенинъ огюнъде ант этем: мен сени бир озюнъни къалдырмам! – деди, ве олар экиси де кеттилер.

⁷ Олар экиси Иордан озенининъ янында тургъанда, элли пейгъамбер келип, оларнынъ къаршысында узакъта турдылар.

⁸ Ильяс озюнинъ усть урбасыны алып сарды ве сувгъа урды. Сув экиге болюнип айырылды, ве олар экиси къурудан кечтилер.

⁹ Олар кечкенден сонъ, Ильяс Эль-Ясагъа: – Мен сенден айырылмаздан эвель, сен ичюн не япайым, сора! – деди. Эль-Яса онъа: – Сенде олгъан рух менде эки къат зияде олсун! – деди.

¹⁰ Ильяс: – Къыйын шей истейсинъ. Эгер мени аладжакъларыны корьсенъ, истегенинъни алырсынъ. Эгер де корьмесенъ – ёкъ, – деди.

¹¹ Олар ёлдан кетип лаф этеяткъанда, бирден атешли арабагъа екильген атешли атлар пейда олды. Олар Ильясны Эль-Ясадан айырдылар, ве Ильяс фуртуна ичинде коклерге котерильди.

¹² Эль-Яса исе бакъып: – Бабам, бабам! Исральнинъ арабасы ве атлылары! – деп къычырды. Бундан сонъ о, Ильясны башкъа корьмеди ве, озь урбаларына япышып, оларны экиге йыртты.

¹³ Сонъ Ильяснынъ устюнден тюшкен урбасыны котерип, артына къайтты ве Иорданнынъ ялысында турды.

¹⁴ Ильяснынъ устюнден тюшкен урбасыны алып, сувгъа урды ве: – Ильяснынъ Алласы олгъан РАББИ къайда? О Озю къайда? – деп сорады. Сувгъа урды, ве сув экиге болюнип айырылды. Эль-Яса кечип кетти.

¹⁵ Узакъта тургъан Ерихондаки пейгъамберлернинъ шегиртлери онынъ япкъаныны корип: – Ильяснынъ руху Эль-Ясагъа энген, – дедилер. Сонъра онынъ къаршысына келип, ергедже бель буктилер,

¹⁶ Эль-Ясагъа: – Мына бизде, къулларынъда, элли адам бар. Къуветли адамлар. Олар кетип, эфендинъни къыдырсынлар. Бельки, РАББИнинъ Руху оны котерип, дагъларнынъ я да вадийлернинъ биринде тюшюргендир, – дедилер. Лякин Эль-Яса: – Ёкъ, йиберменъиз оларны, – деди.

¹⁷ Лякин олар вазгечмейип ялвара бердилер, Эль-Яса тап утанды ве: – Айды, йиберинъиз оларны, – деди. Элли адамны йибердилер, олар Ильясны учь кунь къыдырдылар, амма тапалмадылар.

¹⁸ Сонъ къайтып кельдилер. Эль-Яса о вакъыт Ерихонда эди. Олардан о: – Мен сизлерге: «Барманъыз», – демедимми? – деп сорады.

Эль-Яса пейгъамбернинъ муджизелери

¹⁹ Сонъ шеэрнинъ сакинлери Эль-Ясагъа: – Мына эфендим, корип турасынъ ки, шеэримизнинъ ерлешкен ери яхшы, амма суву яхшы дегиль, шунынъ ичюн топрагъы да берекетсиз, – дедилер.

²⁰ Эль-Яса: – Манъа бир янъы савут беринъиз, ичине туз къоюнъыз, – деди. Онъа савут кетирдилер.

²¹ Эль-Яса сув башына чыкъып, анда тузны септи ве: – РАББИ бойле дей: «Мен шимди бу сувларны темизледим. Эндиден сонъ бу сувдан не олюм, не де берекетсизлик олур», – деди.

²² Бундан сонъ сув темиз олды ве бугуньге къадар, Эль-Ясанынъ дегени киби, ойле де темиз къала.

²³ Эль-Яса андан чыкъып, Бет-Эльге кетти. О ёлдан кеткенде, кичик балалар шеэрден чыкъып, оны мыскъыллап башладылар ве: – Кет, тазбаш! Кет, тазбаш! – деп къычырыштылар.

²⁴ Эль-Яса айланып, оларны корьди ве РАББИни чагъырып, оларны къаргъады. Ормандан эки аюв анасы чыкъып, балаларнынъ къыркъ эки данесини парчаладылар.

²⁵ Мындан Эль-Яса Къармел дагъына кетти, андан Самарие шеэрине къайтты.