4 Падишалар 10 - Мукъаддес Китап

Ахав эвлятларынынъ ольдюрилюви

¹ Ахавнынъ Самарие шеэринде етмиш огълу бар эди. Еху мектюплер язып, Самариеге, Йизреэл башлыкъларына, акъсакъалларына ве Ахав балаларынынъ тербиеджилерине ёллады. Мектюплерде бойле язылгъан эди:

² «Бу мектюпни алгъан сонъ, эфендинъизнинъ огъуллары, арабалары, атлары, пекитильген шеэр ве силялары сизлерде олгъаны ичюн,

³ эфендинъизнинъ огъулларындан энъ яхшысыны эм ляйыгъыны сечип алып, оны бабасынынъ тахтына отуртынъыз. Эфендинъизнинъ сою ичюн дженк этинъиз».

⁴ Мектюпни окъугъан сонъ, олар пек къоркътылар ве: – Ана, эки падиша онъа къаршы турып оламадылар, биз насыл этип къаршы турайыкъ? – дедилер.

⁵ Сонъ падиша эвининъ башлыгъы, шеэр башы, акъсакъаллар ве тербиеджилер Ехугъа бойле хабер йибердилер: «Биз – сенинъ къулларынъмыз. Бизге не буюрсанъ, шуны япармыз. Озюмизге падиша этип, кимсени къоймамыз. Санъа не яхшы олса, шуны яп».

⁶ Еху экинджи мектюп язды. Мектюпте бойле язылгъан эди: «Эгер сиз меним тарафымны тутсанъыз, меним сёзюме бойсунсанъыз, ярын шу вакъытта манъа, Йизреэлге эфендинъизнинъ огъулларынынъ башларынен келинъиз». Падишанынъ етмиш огълу оларны тербиелеген энъ буюк адамларнен берабер эдилер.

⁷ Мектюп кельген сонъ, олар падишанынъ етмиш огълуны алып, оларны ольдюрдилер. Башларыны сепетлерге къойдылар ве Йизреэлге Ехугъа ёлладылар.

⁸ Хаберджи келип, Ехугъа: – Падиша огъулларынынъ башларыны кетирдилер, – деди. – Оларны экиге болип обаланъыз. Сабагъадже шеэрнинъ араба къапусы янында турсунлар, – деди Еху.

⁹ Саба чыкъып, анда турды ве бутюн халкъкъа: – Сиз къабаатлы дегильсинъиз. Мына мен эфендиме къаршы фитнеджилик яптым ве оны ольдюрдим. Я буларнынъ эписини ким ольдюрди?

¹⁰ Билинъиз ки, РАББИ Ахавнынъ сою акъкъында айткъан эр бир сёз ерине келир. РАББИ озюнинъ къулу Ильяснен айткъан эр бир шейини япты, – деди.

¹¹ Бундан сонъ Еху Йизреэлдеки Ахав союндан къалгъанларнынъ эписини, мырзалары, якъынлары ве руханийлерининъ эписини ольдюрди, онынъ адамларындан бириси тири къалмады.

Ахазья сой-сопларынынъ ольдюрилюви

¹² Сонъ Еху кетип, Самариеге барды. Чобанларнынъ Бет-Экед шеэри ёлунда олгъанда,

¹³ Еху Ехуда падишасы Ахазьянынъ тувгъанларыны расткетирди. О: – Сиз кимсинъиз? – деп сорады. Олар: – Биз Ахазьянынъ тувгъанларымыз. Падиша огъулларынынъ сагълыгъы ве падиша апайы огъулларынынъ сагълыгъыны ёкъламагъа кетемиз, – дедилер.

¹⁴ Еху: – Оларны якъаланъыз! – деди. Оларны якъаладылар. Сонъ оларнынъ къыркъ эки адамыны Бет-Экед къуюсында ольдюрдилер, бирисини тири къалдырмадылар.

Ахав сой-сопларынынъ ольдюрилюви

¹⁵ Андан кетип, оны къаршыламагъа чыкъкъан Рекъав огълу Ехонадавнен расткельдилер. Ехонадавнен селямлашып: – Меним юрегим санъа яткъаны киби, сенинъ юрегинъ манъа ятамы? – деди. Ехонадав: – Эбет, – деди. – Эгер ойле олса, къолунъны бер, – деди Еху. Ехонадав къолуны берди, ве Еху оны арабасына котерди.

¹⁶ – Меннен кель, РАББИнинъ сёзлерини насыл гъайретнен туткъанымны бакъ, – деди Еху. Бойле этип о оны арабасында алып кетти.

¹⁷ Самариеге келип, Еху Ахавнынъ Самариеде къалгъан бутюн адамларыны, РАББИ Ильяснен айткъаны киби, ольдюрди.

Баалнынъ хызметчилери джезагъа огърайлар

¹⁸ Еху бутюн халкъны топлап: – Ахав Баалгъа аз табынды. Еху исе чокъча табынаджакъ.

¹⁹ Шимди манъа Баалнынъ эписи пейгъамберлерини, эписи хызметчилерини ве эписи руханийлерини чагъырынъыз. Джумлеси мында кельсин. Мен Баалгъа буюктен-буюк къурбан чаладжагъым. Ким кельмесе – сагъ къалмаз, – деди. Еху бу шейлерни аселет япты. О, Баалнынъ эписи хызметчилерини алдатып ёкъ этеджек олды.

²⁰ Сонъ Еху: – Баалнынъ адына буюк байрам топлашувыны илян этинъиз, – деди. Топлашувны илян эттилер.

²¹ Еху бу хаберни бутюн Исраильнинъ топракълары бою даркъатты. Баалнынъ эписи хызметчилери кельди. Кельмеген кимсе къалмады. Эписи Баалнынъ путханесине кирдилер. Эвнинъ эр ери адамгъа толды.

²² Еху урбаларны сакълагъан адамгъа: – Баал хызметчилерининъ эписине урба кетир, – деди. О, урбаларны кетирди.

²³ Сонъ Еху Рекъав огълу Ехонадавнен Баалнынъ путханесине кирди ве Баалнынъ хызметчилерине: – Сорап билинъиз, араларынъызда РАББИнинъ хызметчилери ёкъмы? Мында тек Баалнынъ хызметчилери олмакъ керек, – деди.

²⁴ Сонъра къурбанлар чалмагъа ве бутюнлей якъыладжакъ къурбанлар кетирмеге эвге кирдилер. Еху эвнинъ тышында сексен адам къойып, оларгъа: – Эгер мен сизлернинъ къолунъызгъа берген адамларнынъ бир данеси биле къуртулса, эр биринъиз озь джанынъызнен джевап береджек, – деди.

²⁵ Бутюнлей якъыладжакъ къурбанларны кетирип битиргенде, Еху къаравулларгъа ве башлыкъларгъа: – Киринъиз ве оларны ольдюринъиз. Бириси къачып къуртулмасын, – деди. Къаравуллар ве башлыкълар оларнынъ эписини къылычнен ольдюрдилер ве анда аттылар. Сонъра шеэрдеки Баалнынъ путханесине ёл алдылар.

²⁶ Баалнынъ путханесинден пут ташларыны чыкъарып, оны якътылар.

²⁷ Олар эм Баал путунынъ ташларыны, эм путханесини ёкъ эттилер. Онынъ ерине аякъёл яптылар, шимдиге къадар ойле де къалды.

²⁸ Бойлеликнен, Еху бутюн Исраиль топракъларындан Баалны ёкъ этти.

²⁹ Амма, Исраильни гуналаргъа батыргъан Неват огълу Еровоамнынъ гуналарындан вазгечмеди, Бет-Эльдеки ве Дандаки алтын бузавлардан вазгечмеди.

³⁰ РАББИ Ехугъа: – Меним огюмде догъру иш яптынъ. Ахав сою акъкъында Меним юрегимде олгъан эписи истеклеримни ерине кетирдинъ. Шунынъ ичюн огъулларынъ дёртюнджи несилине къадар Исраиль тахтында отураджакълар, – деди.

³¹ Лякин Еху Исраильнинъ Алласы олгъан РАББИнинъ Къануныны чин юректен тутмады. О, Исраильни гуналаргъа батыргъан Еровоамнынъ гуналарындан вазгечмеди.

Ехунынъ олюми

³² О куньлерде РАББИ Исраиль топрагъыны эксильтип башлады. Хазаэл бутюн Исраиль сынъыры бою исраиллилерге уджюм этти:

³³ Иордандан шаркъта яткъан бутюн Гилад топрагъыны, Гъад, Рубен ве Менашше къабилелерининъ топракъларыны, Арнон вадийи янындаки Ароэрден башлап, Гилад ве Башан ерини запт этти.

³⁴ Еху акъкъында башкъа шейлер, онынъ эписи япкъан ишлери, онынъ къараманий ишлери акъкъында Исраиль падишаларынынъ тарихы китабында язылгъандыр.

³⁵ Еху кечинип, баба-деделерине къошулды ве Самариеде дефн этильди. Онынъ ерине огълу Ехоахаз падиша олды.

³⁶ Еху Исраильде, Самарие шеэринде 28 йыл девамында падишалыкъ этти.