4 Падишалар 1 - Мукъаддес Китап

Ильяс пейгъамбер ве Ахазья падиша

¹ Ахавнынъ олюминден сонъ, Моав Исраильге къаршы котерильди.

² Ахазья исе Самариедеки эвининъ юкъары одасынынъ пармакълыгъындан йыкъылып яраланды. Эльчилерине эмир берип: «Барынъыз, Экрон шеэрининъ алласы олгъан Баал-Зевувдан соранъыз ки, Мен ярамдан тедавийленир экенимми?» – деп, оларны ёллады.

³ РАББИнинъ Мелеги тишбели Ильяскъа бойле деди: – Тур, Самарие падишасынынъ эльчилерини къаршыламагъа чыкъ да, оларгъа бойле айт: «Не? Исраильнинъ Алласы ёкъмы ёкъса? Экрон алласы олгъан Баал-Зевувдан сорамагъа кетесинъизми?

⁴ Шунынъ ичюн РАББИ бойле дей: “Яткъан тёшегинъден турмайджакъсынъ, мытлакъа оледжексинъ!”» Бундан сонъ Ильяс кетти.

⁵ Эльчилер къайтып кельдилер. Ахазья олардан: – Нечюн къайтып кельдинъиз? – деп сорады.

⁶ Олар: – Бир адам бизни къаршыламагъа чыкъты ве бойле айтты: «Барынъыз, сизни йиберген падишагъа къайтып кетинъиз, онъа бу сёзлерни айтынъыз: “РАББИ бойле дей: Не? Исраильнинъ Алласы ёкъмы ёкъса? Экрон алласы олгъан Баал-Зевувдан сорамагъа кетесинъизми? Шунынъ ичюн, яткъан тёшегинъден турмайджакъсынъ, мытлакъа оледжексинъ!”» – дедилер.

⁷ Ахазья: – Сизни къаршыламагъа чыкъып, бу сёзлерни айткъан адамнынъ корюниши насыл эди? – деп сорады.

⁸ Олар: – Шу адам пек юньлю, белиндеки къушагъы териден эди, – дедилер. Ахазья исе: – Бу – тишбели Ильяс, – деди.

⁹ Сонъра падиша эллибашыны элли аскеринен бирликте Ильяскъа йиберди. Эллибашы онъа барды. Ильяс исе дагънынъ тёпесинде отурмакъта эди. Эллибашы онъа: – Эй, Алланынъ адамы! Падиша санъа ашагъы тюшмеге риджа эте, – деди.

¹⁰ Ильяс эллибашына джевап берип: – Эгер мен Алланынъ адамы олсам, коктен атеш энсин де, сени де, аскерлеринъни де якъсын, – деди. Шу дакъкъасы коктен атеш энип, эллибашыны ве онынъ аскерлерини якъты.

¹¹ Падиша башкъа эллибашы ве элли аскерини ёллады. О да: – Эй, Алланынъ адамы! Падиша санъа айта: «Тез тюш мында!» – деди.

¹² Ильяс кене джевап берип: – Эгер мен Алланынъ адамы олсам, коктен атеш энсин де, сени де, аскерлеринъни де якъсын, – деди. Шу дакъкъасы коктен Алланынъ атеши энип, эллибашыны ве онынъ аскерлерини якъты.

¹³ Падиша озь учюнджи эллибашыны ве элли аскерини йиберди. Учюнджи эллибашы келип, Ильяснынъ огюнде тизлерине йыкъылып, мераметини тилеп: – Эй, Алланынъ адамы! Меним джанымны ве бу сенинъ къулларынъ олгъан элли аскернинъ джанларыны аджы!

¹⁴ Мына коктен атеш энди де, менден эвель кельген эки эллибашыны ве оларнынъ эллишер аскерини якъты. Лякин меним джанымны аджы! – деди.

¹⁵ РАББИнинъ Мелеги Ильяскъа: – Ондан къоркъма, тюшип онен бар, – деди, ве Ильяс турып падишагъа кетти.

¹⁶ О, падишагъа: – РАББИ бойле дей: «Сен Экрон алласы олгъан Баал-Зевувдан сорамагъа эльчилер йибердинъ. Исраильнинъ Алласы ёкъмы ёкъса? Онынъ сёзюни сорамагъа мумкюн дегильми? Шунынъ ичюн яткъан тёшегинъден турмайджакъсынъ, мытлакъа оледжексинъ!» – деди.

¹⁷ Ильяскъа айтылгъан РАББИнинъ сёзлерине коре олды: Ахазья ольди. Онынъ ерине къардашы Ёрам тахткъа кечти, чюнки Ахазьянынъ огълу ёкъ эди. Бу вакъиа Ехуда падишасы олгъан Ехошафат огълу Ехорамнынъ падишалыгъынынъ экинджи йылында олып кечти.

¹⁸ Ахазьянынъ башкъа ишлери акъкъында Исраиль падишаларынынъ тарихы китабында язылгъандыр.