3 Юхан 1 - Мукъаддес Китап

Селямлашув

¹ Акъсакъал – Акъикъатен меним севимли достум Гайгъа:

² Севимли достум, сенинъ рухий сагълыгъынъ яхшы олгъаны киби, эр тарафтан мувафакъиетли ве сагъ-селямет оладжагъынъ ичюн дува окъуйым.

³ Агъа-къардашларымыздан базылары келип, сенинъ ишанчлы къалгъанынъ ве акъикъат ёлунда юргенинъ акъкъында айтып бердилер, бунъа мен пек къувандым.

⁴ Манъа балаларымнынъ акъикъат ёлунда юргенлерини эшитмектен даа буюк бир къуванч ёкъ.

Гайгъа макътав

⁵ Севимли достум, агъа-къардашларгъа, олар ябанджы олсалар да, япкъан хызметлеринъ сенинъ садыкълыгъынъны косьтере.

⁶ Олар иманлылар джемиети алдында сенинъ севгинъ акъкъында айтып бердилер. Сен оларны, Алланынъ огюнде кереги киби, ёлгъа азырласанъ, яхшы иш япарсынъ.

⁷ Олар башкъа халкълардан ич бир ярдым къабул этмейип, Иса Месихнинъ Ады ичюн ёлгъа чыкътылар.

⁸ Бойлеликнен, бизим борджумыз – акъикъат ёлунда хызмет эткенлернинъ ишине къол тутмакъ ичюн, бойле адамларгъа ярдым этмектир.

Диотреф ве Деметрий

⁹ Мен иманлылар джемиетине базы шейлерни язгъан эдим. Амма оларнынъ арасында биринджи олмагъа севген Диотреф бизни къабул этмей.

¹⁰ Шунынъ ичюн, эгер мен кельсем, онынъ япкъанларыны хатырлатырым. О, бизим акъкъымызда яман лафлар даркъатып, адымызны къаралай. Бундан да гъайры башкъа агъа-къардашларны озю къабул этмей, къабул этмеге истегенлерге ёл бермей ве атта оларны джемиеттен къувып чыкъара.

¹¹ Севимли достум, сен яманлыкътан орьнек алма, яхшылыкътан орьнек ал. Яхшылыкъ япкъан адам – Алладандыр. Яманлыкъ япкъан исе Алланы корьмеген.

¹² Деметрий акъкъында эр кес, акъикъатнынъ озю биле яхшы лаф эте. Биз де бунъа къошамыз, бизим шаатлыгъымыз догъру олгъаныны озюнъиз билесинъиз.

Селямлар

¹³ Санъа язаджакъ чокъ шейлерим бар эди, амма мерекеп ве къалемнен язмагъа истемейим.

¹⁴ Якъында сени корьмеге умют этем, о вакъыт козьме-козь лаф этермиз.

¹⁵ Санъа селяметлик тилейим. Достлар санъа селям ёллайлар. Сен де достларгъа эр бирине айры селям эт.