3 Падишалар 7 - Мукъаддес Китап

Сулейманнынъ сарайы

¹ Озюнинъ сарайыны Сулейман он учь йыл девамында къурып битирди.

² Эвни Ливан тереклеринден къурды. Эвнинъ узунлыгъы – 50 метр, кенълиги – 25 метр, юксеклиги – 15 метр эди. Эв дёрт сыра кедр диреклеринде, оларнынъ тёпесинде, ёнулгъан кедр тереклеринде ерлешкен эди.

³ Оларнынъ устюнде 45 дирек бар эди, бир сыра 15 директен ибарет эди. Диреклернинъ устю дамда кедр тахталарынен къаплангъан эди.

⁴ Пенджерелери учь сыра этип яптырылды. Эр бир пенджеренинъ къаршысына пенджере бакъа эди.

⁵ Къапулар ве къапуларнынъ первазлары дёрт коше эди. Учь сыра пенджерелери къаршы къаршыгъа бакъа эди.

⁶ Бундан гъайры, 25 метр узунлыгъында, 15 метр кенълигинде бир эйван диреклерден яптырды. Эйваннынъ огюнде бир босагъа япылды, босагъанынъ огюнде – диреклер ве асылгъан бир таван яптырылгъан эди.

⁷ Сулейман къарар чыкъармакъ ичюн тахт эйваныны, Укюм Эйваныны къурды. Бу Эйван бир башындан дигер башынадже кедр тахталарынен къаплангъан эди.

⁸ Сулейман озю отураджакъ эвде эйван янындаки азбар тыпкъы ойле къурулгъан эди. Озюне къадын оларакъ алгъан фыравун къызынынъ эви де тыпкъы ойле япылгъан эди.

⁹ Бу биналарнынъ эписи, тышындан башлап буюк азбаргъа баргъандже, темелинден таванына къадар паалы ташлардан япылгъан эди. Ташлар бир ольчюде кесильген, эки тарафындан пычкъыларнен тегизленген эди.

¹⁰ Эвнинъ темелине буюк паалы ташлар къоюлгъан эди. Базы бир ташлар беш метр эди, базылары дёрт метрге ете эди.

¹¹ Устюнде паалы, ольчюсине коре кесильген ташлар ве кедр агъачлары къоюлгъан эди.

¹² Балабан азбар учь сыра тегизленген ташларнен ве бир сыра кедр тереклеринен къоралангъан эди. РАББИ Сарайынынъ ич азбары тыпкъы ойле къоралангъан эди.

Хирамнынъ аджайип иши

¹³ Сулейман падиша адамларны ёллап, Тир шеэринден Хирам адлы адамны чагъыртты.

¹⁴ Хирамнынъ анасы Нафталий къабилесинден эди, онынъ кечинген бабасы Тир шеэринден эди, о, тунч устасы эди. Хирам акъыллы ве эписини анълагъан, бакъырдан чешит тюрлю шейлер япкъан теджрибели уста эди. Хирам Сулейман падишагъа келип, онынъ берген ишлерини беджерди.

Эки бакъыр колонна

¹⁵ Хирам эки бакъыр колонна япты. Эр бирининъ юксеклиги докъуз метр, чевресининъ узунлыгъы алты метр эди.

¹⁶ Колонналарнынъ тёпесине къоймакъ ичюн эки бакъыр капитель япты. Эр бир капительнинъ юксеклиги эки бучукъ метр эди.

¹⁷ Капителлернинъ устюне орюльген агълар ве едишер орюльген зынджырлар, еди данеси бир капительге, еди данесини экинджи капительге япты.

¹⁸ Бойле этип о, колонналарны япты ве капителлернинъ устюндеки таджларнынъ тёпесини къапаткъан агънынъ чевре-четине эки сыра нар япты. Экинджи капительнинъ устюни де тыпкъы ойле япты.

¹⁹ Эйваннынъ диреклерине капителлер лейля чечеклери киби япылгъан эди. Оларнынъ юксеклиги эки метр эди.

²⁰ Эки дирекнинъ устюнде тадж япты. Олар тамам агънынъ устюнде ерлешкен чанакънынъ тёпесине къоюлды. Эки капительнинъ чевре-четинде 200 нар сыралангъан эди.

²¹ Хирам бу диреклерни Буюк Оданынъ огюнде олгъан Эйванда къойды. Бирисини дженюбий тарафтан къойды ве Якин деп адландырды, экинджисини шималий тарафтан къойып, Боаз деп адландырды.

²² Диреклернинъ устю занбакъ чечеклери киби эди. Бойлеликнен, колонналар битирильди.

«Денъиз» деп адландырылгъан бакъыр хавуз

²³ Сонъра Хирам къуюлгъан бакъырдан «Денъиз» адландырылгъан бир хавуз ясады. Хавуз бир тарафындан экинджи тарафына къадар беш метр эди, эки бучукъ метр юксекликте ве чевреси 15 метр эди.

²⁴ Хавузнынъ кенарларына эки сыра бакъыр къабакъ япты. Эр ярым метр месафеде онар къабакъ ерлештирильген эди. Къабакълар хавузнен бирликте къуюлгъан эди.

²⁵ Хавуз он эки бугъанынъ устюнде ерлештирильген эди. Бугъаларнынъ учю шимальге бакъа, учю гъарпкъа, учю дженюпке ве учю шаркъкъа бакъа эди. Хавуз бугъаларнынъ устюнде ерлешкен, бугъаларнынъ арт къысымлары ичине бакъа эди.

²⁶ Хавуз бир авуч къалынлыкъта эди. Онынъ четлери чанакънынъ четлери киби олып, ачылгъан занбакъкъа бенъзей эди. Хавуз ичине 2 000 буюк къопкъа сув сыгъа эди.

Бакъыр аякълар

²⁷ Хирам бундан гъайры эки метр узунлыгъында, эки метр кенълигинде ве бир бучукъ метр юксеклигинде он дане бакъыр аякъ япты.

²⁸ Олар бойле япылгъан эди: черчивеге диварчыкъларнен къоюлгъан эдилер.

²⁹ Диварчыкъларда ве черчивелеринде арслан, бугъа ве Керувларнынъ ресимлери япылгъан эди. Арслан ве бугъанынъ тёпесинде ве ашасында урулып япылгъан гульчемберлер бар эди.

³⁰ Эр бир аякънынъ дёрдер бакъыр копчеги ве бакъыр кочерлери бар эди. Дёрт кошесинде, леген тутмакъ ичюн, меснетлер япылгъан эди. Меснетлернинъ эр бир тарафында гульчемберлер къуюлгъан эди.

³¹ Меснетнинъ ичинде ярым метр теренликте бир бошлукъ бар эди. Бошлукъ тёгерек, черчивесинен кенълиги метрнинъ дёртте учю эди. Бошлукънынъ чевресинде оюлып япылгъан ресимлер бар эди. Аякъларнынъ диварчыкълары тёгерек дегиль, дёрт коше эди.

³² Диварчыкъларнынъ тюбюнде копчеклери бар эди, копчеклернинъ кочерлери аякъкъа къошулгъан эди. Эр бир копчекнинъ юксеклиги метрнинъ дёртте учю эди.

³³ Копчеклер араба копчеклери киби япылгъан эди. Кочерлери, къыршавлары, пармакълары ве кобеклери бакъырдан къуюлгъан эди.

³⁴ Аякънынъ дёрт кошесинде дёрт меснет бар эди. Эр бир меснет аякъкъа къошулып къуюлгъан эди.

³⁵ Аякънынъ тёпесинде метрнинъ дёртте бири юксеклигинде бирер алкъа бар эди. Черчиве ве диварчыкълар аякънынъ устюне къошулгъан эди.

³⁶ Хирам меснетлернинъ янларында ве четлеринде, ве башкъа бош ерлерде Керувлар, арсланлар, пальма тереклери ве гульчемберлерни урып чыкъты.

³⁷ Бойле этип он дане аякъ япты. Эписи бакъырдан къуюлып, бир ольчюде ве бир шекильде эдилер.

³⁸ Бундан гъайры, ювмакъ ичюн Хирам он дане бакъыр леген япты. Эр бирининъ ичине 40 буюк къопкъа сув сыгъа эди. Эр бир леген экишер метр кенълигинде эди. Эр леген аякъларнынъ биринде ерлеше эди.

³⁹ Хирам легенлернинъ беш данесини Сарайнынъ дженюбий тарафындан, беш данесини Сарайнынъ шималий тарафындан къойды. Хавузны дженюбий тарафындан, Сарайнынъ дженюп-шаркъий кошесине къойды.

Раббининъ Сарайы ичюн япылгъан шейлернинъ джедвели

⁴⁰ Хирам легенлер, куреклер, чанакълар япты. Бойлеликнен, Хирам Сулейман падиша РАББИнинъ Сарайы ичюн буюргъан ишини битирди. Мына онынъ япкъан шейлери:

⁴¹ эки колонна, колонналарнынъ устюндеки чанакъкъа ошагъан эки капитель, колонналарнынъ устюнде чанакъкъа ошагъан эки капительни къапаткъан эки орюльген агълар,

⁴² эки колоннанынъ устюндеки чанакъкъа ошагъан капителлерни безеткен эки сыра орюльген агълар ичюн 400 дане нар,

⁴³ он дане аякъ ве он дане аякънынъ устюне къоюлгъан легенлер,

⁴⁴ «Денъиз» адландырылгъан хавуз ве тюбюндеки он эки бугъа,

⁴⁵ къопкъалар, куречиклер ве чанакълар. Хирамнынъ Сулейман падишагъа РАББИнинъ Сарайы ичюн ясалгъан шейлерининъ эписи йылтыраткъан бакъырдан эди.

⁴⁶ Падиша бу шейлерни Иорданнынъ тарафында, Сукъкъот ве Царетан арасында, балчыкълы топракъта къуймагъа буюрды.

⁴⁷ Шейлер о къадар чокъ эди ки, Сулейман оларны чекмеди, ве бакъырнынъ агъырлыгъы белли дегиль эди.

⁴⁸ Сулейман РАББИнинъ Сарайы ичюн даа пек чокъ шейлер яптырды: алтын къурбан ери, РАББИнинъ булунувыны косьтерген пителер ичюн алтын маса,

⁴⁹ Сарайнынъ Энъ Азиз Одасынынъ алдында беши сагъда, беши солда къоюладжакъ алтын къандиллер, чечеклер, чырачыкълар, алтын машачыкълар,

⁵⁰ темиз алтындан япылгъан легенчиклер, макъасчыкълар, легенлер, чанакълар ве комюр табакълары. Сарайнынъ Энъ Мукъаддес Ери къапуларынынъ ильгичлери ве Буюк Одасы къапуларынынъ ильгичлери де алтындан ясалгъан эди.

⁵¹ Бойлеликнен, Сулейман падиша РАББИге багъышлангъан Сарайнынъ къурулышыны битирди. Анда бабасы Давут тарафындан РАББИге багъышлангъан шейлерни кетирди ве алтын, кумюш ве эписи шейлерни РАББИнинъ Сарайы хазинесине къойды.