3 Падишалар 6 - Мукъаддес Китап

Сулейман Раббининъ Сарайыны къура

¹ Исраиль огъуллары Мысыр топрагъандан 480 йыл кечкенинден сонъра, Сулейманнынъ Исраильде падишалыгъынынъ дёртюнджи йылы, йылнынъ экинджи Зив айында, Сулейман РАББИге Сарай къурып башлады.

² Сулейман РАББИге къургъан Сарайнынъ узунлыгъы – 30 метр, кенълиги – 10 метр ве юксеклиги – 15 метр эди.

³ Сарайнынъ Буюк Одасы огюнде Эйван къурдылар. Онынъ узунлыгъы – 10 метр, Сарайнынъ кенълигине уя эди. Кенълиги беш метр эди.

⁴ Эвнинъ тышындан къапалы пенджерелерини яптырды.

⁵ Эвнинъ чевресинде диварларына къошып одалар яптырды, бутюн бинанынъ чевре-четинде, шу джумледен, Буюк Ода ве Энъ Азиз Оданынъ чевре-четинде де одалар яптырды. Бойлеликнен, бутюн бинанынъ чевресинде одалар яптырды.

⁶ Ашагъы къатнынъ кенълиги – эки бучукъ метр, орта къатынынъ – учь метр ве усть къатынынъ – учь бучукъ метр эди. Къошма одалар Сарайнынъ диварына тиймесин деп, Сарайнынъ тышындан басамакълар япылгъан эди.

⁷ Сарайнынъ къурулышына тегизленген ташлар ишлетильди. Сарайны къураяткъанда я чёкюч, я балта я да башкъа бир демир алетнинъ давушы чыкъмай эди.

⁸ Орта къатнынъ кириши Сарайнынъ дженюбий тарафында эди. Айланчыкъ бир мердивенден башта орта къаткъа, андан юкъары къаткъа чыкъа эдилер.

⁹ Сулейман Сарайны къурып битирди, онынъ тышыны кедр тахталарынен къаплады.

¹⁰ Сарайнынъ бутюн янларына одалар къурдурып къошты. Одаларнынъ юксеклиги эки бучукъ метр эди. Шу одалар Сарайнынъ диварларына кедр агъачлары ярдымынен къошулгъан эди.

¹¹ РАББИ Сулеймангъа:

¹² – Мына сен шимди бу Сарайны къурмакътасынъ. Эгер сен Меним низамнамелеримни, укюмлеримни эда этип, эписи эмирлеримни тутып, оларгъа коре яшасанъ, Мен Давут бабанъа берген сёзюмни сенинъ ярдымынънен беджеририм

¹³ ве Исраиль огъуллары арасында яшарым, халкъым Исраильни бир вакъыт къалдырмам, – деди.

¹⁴ Мына Сулейман Сарайны тамамынен къурып битирди.

Сарайнынъ ичери одалары

¹⁵ Сулейман Сарайнынъ диварларыны ичинден кедр тахталарынен къаплады. Ичерисини табандан тавангъадже кедр тахталарынен къаплады, табанына кипарис агъачларыны тёшеди.

¹⁶ Сарайнынъ арт къысмында, четинден он метр узакълыгъында ода къурды. Оданы астындан устюнедже кедр тахталарынен къаплады. Бу Энъ Азиз Ода – Энъ Мукъаддес Ер эди.

¹⁷ Сарайнынъ Буюк Одасы йигирми метр узунлыгъында эди.

¹⁸ Сарайнынъ ичиндеки кедр тахталарында хыяргъа бенъзеген ве ачылаяткъан чечеклернинъ ресимлери оюлып япылгъан эди. Сарайнынъ эр бир ери кедрнен къаплангъан эди. Бир ерде таш корюнмей эди.

¹⁹ Сарайнынъ ичиндеки Энъ Азиз Оданы Сулейман РАББИнинъ Васиет Сандыгъыны къоймакъ ичюн къургъан эди.

²⁰ Энъ Азиз Оданынъ узунлыгъы он метр, кенълиги он метр ве юксеклиги де он метр эди. Бу оданы темиз алтыннен къаплады. Бундан гъайры кедр терегинден япылгъан къурбан чалгъан ерни де темиз алтыннен къаплады.

²¹ Сулейман Сарайнынъ ичини темиз алтыннен къаплады, Энъ Азиз Оданынъ огюнден алтын зынджырлар асты; о, алтыннен къаплангъан эди.

²² Бутюн Сарайны алтыннен бойле къаплап битирди. Энъ Азиз Оданынъ огюнде олгъан къурбан ерини де бутюнлей алтыннен къаплады.

²³ Энъ Азиз Одада зейтюн терегинден эки Керув яптырды. Керувларнынъ бою беш метр эди.

²⁴ Керувнынъ бир къанаты эки бучукъ метр, экинджи къанаты да эки бучукъ метр эди. Къанатларынынъ бир уджундан башкъа уджуна къадар беш метр эди.

²⁵ Экинджи Керувнынъ бою да беш метр эди. Экиси де бир бойда, бир къыяфетте эдилер.

²⁶ Биринджи Керувнынъ бою беш метр эди. Экинджи Керувнынъ бою да бойле эди.

²⁷ Сулейман Керувларны Сарайнынъ ич одасында ерлештирди. Керувларнынъ къанатлары керильген, бир Керувнынъ къанаты бир диваргъа, экинджи Керувнынъ къанаты дигер диваргъа тие эди. Башкъа къанатлары оданынъ ортасында бири-бирине тие эди.

²⁸ Керувларны темиз алтыннен къаплады.

²⁹ Керувларнынъ ресимлерини, пальма тереклерини, ачылаяткъан чечеклернинъ ресимлерини эки одада, огдеки одада ве ичтеки одада, Сарайнынъ эписи диварларында ойып яптырды.

³⁰ Сарайнынъ эм огдеки одасынынъ, эм ичтеки оданынъ табаныны темиз алтыннен тёшеди.

³¹ Энъ Азиз Оданынъ киришинде зейтюн терегинден къапу яптырды. Къапу первазыны беш кошели яптырды.

³² Къапунынъ эки къанатында Керувларнынъ ресимлерини, пальма тереклерининъ ве ачылаяткъан чечеклернинъ ресимлерини ойып яптырды. Эм Керувларны, эм пальма тереклерни алтыннен къаплады.

³³ Буюк Оданынъ киришине зейтюн терегинден дёрт кошели первазлар яптырды.

³⁴ Бундан гъайры кипарис терегинден эки къапу ясатты. Къапунынъ эки къанаты ачылып-къапала эди. Башкъа къапунынъ къанатлары тыпкъы ойле эди.

³⁵ Къапуларнынъ устюнде Керувларнынъ ресимлерини, пальма тереклерини ве ачылаяткъан чечеклернинъ ресимлерини ойып яптырды. Оюлгъан ерлерини алтыннен къаплады.

³⁶ Сарайнынъ азбарыны учь къат тегизленген ташлардан яптырды, бир къатыны кедр тереклеринден яптырды.

³⁷ Дёртюнджи йылы, Зив айында, РАББИ Сарайынынъ темели къоюлды.

³⁸ Он биринджи йылы, Бул айында, йылнынъ секизинджи айында, бу Сарайнынъ къурулышы бутюн такъымларынен ве бутюн планлаштырылгъан шейлернен битирильди. Сулейман бу Сарайны еди йыл девамында къурды.