3 Падишалар 3 - Мукъаддес Китап

Сулейманнынъ дувасы

¹ Сулейман фыравуннынъ къызына эвленип, шу эвленювинен Мысыр падишасы фыравуннен анълашма тизди. Сонъ къадыныны Давут Шеэрине алып кельди. Озюне эвни, РАББИнинъ Сарайыны ве Ерусалимнинъ чевре-четинде диварны къургъандже, анда булунды.

² Халкъ аля даа ибадет тёпелеринде къурбан чала эди. О вакъыт РАББИнинъ Сарайы даа къурулмагъан эди.

³ Сулейман, бабасы Давутнынъ низамнамелерине коре яшап, РАББИни пек севе эди. Лякин ибадет тёпелеринде къокъулы отларны якъа ве къурбан чала эди.

⁴ Бир кунь падиша Гивон шеэрине къурбан чалмагъа кетти. Шу ибадет тёпеси энъ буюк эди. Сулейман шу къурбан еринде бир бинъ бутюнлей якъыладжакъ къурбанлар чалды.

⁵ Гедже Гивон шеэринде Сулеймангъа тюшюнде РАББИ корюнди. Алла онъа: – Санъа не берейим, сора, – деди.

⁶ Сулейман: – Сен къулунъ олгъан Давут бабама буюк мерамет эйлединъ, чюнки о, Сенинъ огюнъде ишанчлы олып, инсафлыкънен ве ачыкъ юрекнен юре эди. Сен бу буюк мераметинъни сакъладынъ ве онъа тахтында отураджакъ огъулны бердинъ. Шимди ойле де олды.

⁷ РАББИ, Аллам, Сен мени, къулунъны, Давут бабамнынъ ерине падиша оларакъ къойдынъ, – деди. – Амма мен даа яш балам. Эр шейни догъру япмакъ ичюн, акълым етмей.

⁸ Мен, Сенинъ къулунъ, Сен сайлап алгъан халкънынъ арасындам. Халкъынъ о къадар чокъ ки, не саймакъ, не де эсапламакънынъ чареси ёкъ.

⁹ Сенинъ халкъынъа укюмдарлыкъ этмек ичюн, яхшылыкъны яманлыкътан айырмакъ ичюн, манъа, Сенинъ къулунъа, анълагъан юрек бер. Сенинъ бойле бир буюк халкъынъа ким укюмдарлыкъ этип оладжакъ?

¹⁰ РАББИ Сулейманнынъ акъыл сорагъанындан пек разы олды.

¹¹ Алла онъа: – Сен озюнъе узун омюр ве зенгинлик сорамадынъ, амма акъыл сорадынъ, душманларынънынъ джанларыны сорамадынъ, лякин укюмдарлыкъ этмек ичюн зекя ве анълайыш сорадынъ.

¹² Бунынъ ичюн сен дегенинъ киби яптым. Санъа икметли ве анълагъан юрек бердим. Сен киби сою сенден эвель ёкъ эди, сенден сонъра да сен киби олмаз.

¹³ Сенинъ сорамагъан шейлеринъни де: зенгинлик ве шан-шуретни санъа бердим. Сен яшагъан эписи куньлерде санъа ошагъан падиша олмаз.

¹⁴ Эгер Давут бабанъ юргени киби, Меним низамнамелеримни ве эмирлеримни беджерип, Мен косьтерген ёлумдан юрсенъ, Мен омрюнъни узун этерим, – деди.

¹⁵ Сонъ Сулейман уянды. Бу, онынъ тюшю эди. О, Ерусалимге келип, РАББИнинъ Васиет Сандыгъы огюнде турып, бутюнлей якъыладжакъ къурбанлар чалды, аманлыкъ къурбанларыны да кетирди. Сонъ хызметкярларына буюк той япты.

Сулейманнынъ икмети

¹⁶ Бир кунь падишагъа эки ороспу къадын кельди ве онынъ огюнде турдылар.

¹⁷ Бириси: – Эфендим! Мен ве шу къадын бир эвде яшаймыз. Шу къадын эвде олгъанда, мен бала таптым.

¹⁸ Мен баламны тапкъанымдан учюнджи кунюне, о къадын да бала тапты. Биз экимиз эдик. Экимизден башкъа эвде кимсе ёкъ эди. Эвде ялынъыз экимиз эдик.

¹⁹ Гедже шу къадыннынъ огълу ольди, чюнки о оны юкъусында басты.

²⁰ Яры геджеде турып, мен, сенинъ къулунъ, юкълагъанымда, о, огълумны янымдан алып, озюнинъ кокюсине къойды, озюнинъ олю огълуны исе меним кокюсиме къойды.

²¹ Танъда огълумны эмиздирмеге тургъанымда, онынъ ольгенини корьдим. Амма саба балагъа яхшыджа бакъып, бу бала меним тапкъан огълум олмагъаныны корьдим! – деди.

²² Экинджи къадын: – Ёкъ, меним огълум сагъ, сенинъки исе олю, – деди. – Ёкъ, сенинъ огълунъ олю, менимки сагъ, – деди биринджи къадын. Бойле этип, падишанынъ огюнде давалаштылар.

²³ Падиша тюшюнип: – Бу: «Меним огълум сагъ, сенинъки олю», – дей. О исе: «Ёкъ, сенинъ огълунъ олю, менимки сагъ», – дей! – деди.

²⁴ Сонъ падиша: – Манъа къылыч беринъиз, – деди. Падишагъа къылыч кетирдилер.

²⁵ – Тири баланы къылычнен экиге болюнъиз. Ярысыны биринджисине, ярысыны экинджисине беринъиз, – деди падиша.

²⁶ Огълу сагъ олгъан къадын, баласыны аджыгъанындан ичеклери къалтырап, падишагъа: – Эфендим! Бу баланы о къадынгъа тири беринъиз, сакъын-сакъын ольдюрменъиз оны, – деди. – Кесинъиз, не манъа, не де санъа олсун, – деди исе экинджи къадын.

²⁷ Падиша джевап берип: – Бу тири баланы биринджисине беринъиз, ольдюрменъиз оны. О, онынъ анасыдыр, – деди.

²⁸ Эписи исраиллилер, падишанынъ чыкъаргъан къарары акъкъында эшитип, падишадан къоркъып башладылар, бойле укюм этмек ичюн, онъа Алла икмет бергенини корьдилер.