3 Падишалар 20 - Мукъаддес Китап

Арам мемлекетинен олгъан дженк

¹ Арамнынъ падишасы Бен-Хадад бутюн ордусыны топлады. Онъа 32 падиша озь атлары ве дженк арабаларынен берабер къошулгъан эди. Бен-Хадад кетип, Самарие шеэрини алкъагъа алды ве онъа къаршы уджюм этти.

² О, шеэрге, Исраиль падишасы Ахавгъа хаберджилер йиберип:

³ – Бен-Хадад бойле дей: «Сенинъ бутюн алтын ве кумюшинъ – менимки, сенинъ энъ яхшы къадынларынъ ве огъулларынъ да – менимки», – деди.

⁴ Исраиль падишасы джевап берип: – Падиша-эфендимнинъ дегени киби олсун. Мен ве меним эписи шейлерим – сенинъки, – деди.

⁵ Кене хаберджилер кельдилер ве бойле дедилер: – Бен-Хадад бойле дей: «Мен санъа: “Алтын-кумюшинъни, къадынларынъны, огъулларынъны манъа бер”, – дедим.

⁶ Шунынъ ичюн ярын санъа къулларымны йибереджегим. Олар сенинъ эвинъни ве хызметчилеринънинъ эвлерини тинтеджеклер ве санъа къыйметли олгъан эр бир шейни алып кетеджеклер».

⁷ Исраиль падишасы топракънынъ эписи акъсакъалларыны чагъыртып: – Ана бакъынъыз ве буны билинъиз: Бен-Хадад ярамай шей тюшюнип чыкъаргъан. О, меним къадынларым ве огъулларымны, алтын-кумюшимни алмакъ ичюн, адамларыны ёллады, ве мен онъа ёкъ демедим, – деди.

⁸ Эписи акъсакъаллар ве халкъ онъа: – Оны динълеме, разы олма, – дедилер.

⁹ Ахав Бен-Хададнынъ хаберджилерине: – Падиша-эфендиме бойле айтынъыз: менден, къулунъдан биринджи кере сорагъан шейлеринъни япмагъа азырым. Амма бу сонъки шейни япалмам, – деди. Хаберджилер къайтып, бу джевапны айтып бердилер.

¹⁰ Бен-Хадад даа бир хабер ёллап: – Мен Самарие шеэрининъ кулюни кокке савурарым. Джаяв аскерлериме бирер авуч куль биле тийсе, аллалар бойнумны урып, мени пек къатты джезаласынлар! – деди.

¹¹ Исраиль падишасы онъа джевап берип: – Онъа айтынъыз: «Дженкни башламагъан адам дженкте енъген адам киби макътанмасын», – деди.

¹² Бу хаберни кетирген вакъытта Бен-Хадад падишаларнен берабер чадырларда отурып иче эди. Буны эшитип къулларына: – Шеэрге уджюм этинъиз! – деди. Олар шеэрге уджюм этмеге кеттилер.

¹³ Бир пейгъамбер Исраиль падишасы Ахавнынъ янына келип: – РАББИ бойле дей: «Шу буюк ордуны коресинъми? Мен бугунь шуны сенинъ къолларынъа береджегим. Сонъ сен Мен РАББИ олгъанымны биледжексинъ», – деди.

¹⁴ Ахав: – Шуны ким япаджакъ? – деп сорады. Пейгъамбер: – РАББИ бойле дей: «Виляетлер башлыкъларынынъ хызметчилери шуны япаджакълар», – деди. Ахав кене: – Дженкни ким башлайджакъ? – деп сорады. – Сен башлайджакъсынъ, – деп джевап берди.

¹⁵ Ахав виляет башлыкъларынынъ хызметчилерини сайып чыкъты, олар 232 киши эди. Олардан сонъ бутюн халкъны, Исраильнинъ огъулларыны сайып чыкъты, олар 7 000 киши эди.

¹⁶ Уйле вакътында ёлгъа чыкътылар. Бен-Хадад онъа ярдым эткен 32 падишанен берабер ичип, зиль сархош олды.

¹⁷ Башта виляет башлыкъларынынъ хызметчилери чыкътылар. Бен-Хадад хаберджилерини ёллап, олар онъа: – Аскерлер Самариеден чыкътылар, – деген хабер еткиздилер.

¹⁸ Бен-Хадад: – Эгер олар муаббетликнен кельсе, оларны тири якъаланъыз, эгер дженкнен кельген олсалар, эписи бир тири якъаланъыз, – деди.

¹⁹ Башта виляет башлыкъларынынъ хызметчилери шеэрден чыкъты, оларнынъ артындан орду чыкъты.

²⁰ Эр кес озь душманыны урды. Арамлылар къачып башлады, исраиллилер исе оларнынъ артындан къуваладылар. Арам падишасы Бен-Хадад исе атына минип, атлыларынен бирликте къачып кетти.

²¹ Исраиль падишасы чыкъып, арамлыларнынъ атлыларына ве дженк арабаларына уджюм этип, оларны буюк магълюбиетке огъратты.

²² Пейгъамбер Исраиль падишасы янына келип, онъа: – Энди бар да, яхшы этип къуветинъни джый. Не япаджагъынъны яхшы тюшюн. Бир йылдан сонъ Арам падишасы кене санъа къаршы дженкке чыкъаджакъ, – деди.

Арамлы Бен-Хадад исраиллилернен дженк эте

²³ Арам падишасынынъ хызметчилери онъа: – Оларнынъ аллалары – дагъларнынъ аллаларыдыр, шунынъ ичюн олар бизни енъди. Эгер биз оларнен тегиз ерде дженклешсек, оларны мытлакъа енъермиз.

²⁴ Шимди, падиша, бойле яп: падишаларны озь еринден алып ташла да, оларнынъ ерине башлыкъларны къой.

²⁵ Ордунъда не къадар аскер эляк олгъан олса, шу къадар аскер ал, не къадар ат ольген олса, шу къадар ат ал, не къадар дженк арабасы олгъан олса, шу къадар дженк арабасы да ал. О вакъыт исраиллилернен тегиз ерде дженклешип, оларны мытлакъа енъермиз, – дедилер. Падиша оларны динълеп, оларнынъ дегени киби япты.

²⁶ Бир йыл кечкен сонъ, Бен-Хадад эписи арамлыларны топлады ве исраиллилернен дженклешмек ичюн Афекнинъ янына кельди.

²⁷ Исраиль огъуллары да топланып, аш-сув алып, арамлыларнынъ къаршысына чыкътылар. Исраиль огъуллары ордуларыны арамлыларнынъ огюнде ерлештирдилер. Исраильнинъ ордусы эки уфакъ эчки сюрюси киби эди, арамлылар исе бутюн орталыкъны толдурдылар.

²⁸ Алланынъ адамы Исраиль падишасы янына келип: – РАББИ бойле дей: «Арамлылар: “РАББИ – дагъларнынъ Алласыдыр, О, вадийлернинъ Алласы дегиль”, – дейлер. Шунынъ ичюн Мен бутюн шу буюк ордуны сенинъ къолларынъа береджегим. Сонъ сиз Мен РАББИ олгъанымны билирсинъиз», – деди.

²⁹ Эки орду бири-бирининъ къаршысында еди кунь девамында турдылар. Единджи куню дженк башланды. Бир кунь ичинде Исраиль огъуллары 100 000 арамлы джаяв аскерни урып ольдюрди.

³⁰ Сагъ къалгъанлар Афек шеэрине къачып кеттилер. Анда сагъ къалгъан 27 000 кишининъ устюне дивар йыкъылды. Бен-Хадад шеэрге къачып, бир ичери одагъа кирип, анда сакъланды.

³¹ Хызметчилери онъа: – Бизим эшиткенимизге коре, Исраиль сюлялесининъ падишалары мераметли падишалардыр. Сен бизге белимизни къаба токъулгъан къумачнен, башларымызны аркъанларнен сарып, Исраиль падишасынынъ огюнде тиз чёкмеге рухсет бер. Бельки о сенинъ джанынъны сакълар, – дедилер.

³² Сонъ беллерини къаба токъулгъан къумачнен, башларыны аркъанларнен сарып, Исраиль падишасына кельдилер ве онъа: – Къулунъ Бен-Хадад санъа: «Меним джанымны сакъла!» – деп ялвара, – дедилер. Ахав исе: – Бен-Хадад даа сагъмы? О, меним къардашым олсун! – деди.

³³ Бен-Хададнынъ адамлары буны бельги деп сайып, тез-тез онынъ сёзлерини агъзындан алып: – Эбет, Бен-Хадад сенинъ къардашынъ олсун! – дедилер. Ахав оларгъа: – Барынъыз, оны кетиринъиз, – деди. Бен-Хадад чыкъып, онынъ огюне кельди. Падиша оны озюнинъ арабасына отуртты.

³⁴ Сонъ Бен-Хадад онъа: – Бабам сенинъ бабанъдан тартып алгъан шеэрлерни санъа къайтарырым. Бабам Самариеде озюне базарлар япкъан киби, сен де Дамаскта озюнъе базарлар япа билирсинъ, – деди. – Анълашма тизгенимизден сонъ, мен сени азат этерим, – деди Ахав. Анълашма тизгенлеринден сонъ, Ахав оны йиберди.

Пейгъамбер Ахав падишаны къабаатлай

³⁵ Бундан сонъ пейгъамберлерден бириси РАББИнинъ айткъанына коре башкъасына: – Мени ур! – деди, лякин башкъа пейгъамбер оны урмагъа разы олмады.

³⁶ Биринджиси онъа: – Сен РАББИнинъ сесини динълемейсинъ! Шунынъ ичюн сен мындан кеткенде, сени арслан ольдюреджек, – деди. Адам кетти, ве арслан оны расткетирип ольдюрди.

³⁷ Пейгъамбер башкъа бир адамны тапты, онъа да: – Мени ур! – деди. О адам оны урып пек яралады.

³⁸ Пейгъамбер кетти ве, падишаны беклеп, ёлнынъ кенарында турды. Танымасынлар деп, козьлерини орьтюнен къапатты.

³⁹ Падиша янындан кечеяткъанда, о, къычырып: – Мен, къулунъ, дженкнинъ къайнагъан еринде эдим. Бир адам четке чыкъып, манъа бир адамны кетирди ве: «Шу адамны къаравулла. Эгер о къачып кетсе, сенинъ джанынъ онынъ джаны ерине кечеджек, я да бир чувал кумюш тёлейджексинъ», – деди.

⁴⁰ Амма мен башкъа шейлернен огърашкъанда, шу адам къачып кетти, – деди. Исраиль падишасы онъа джевап къайтарып: – Сен озюнъ озюнъе къарар чыкъардынъ, – деди.

⁴¹ Шу заман пейгъамбер бетиндеки орьтюни алып ташлады, ве Исраильнинъ падишасы онынъ пейгъамберлернинъ бириси олгъаныны таныды.

⁴² Пейгъамбер онъа: – РАББИ бойле дей: «Мен олюмге махкюм эткен адамны азат эткенинъ ичюн, сенинъ джанынъ онынъ джаны ерине алынаджакъ, сенинъ халкъынъ онынъ халкъы ерине къыйналаджакъ», – деди.

⁴³ Падиша буны эшиткен сонъ, буюк къасеветке далып ве ачувланып, Самариеге къайтып кельди.