3 Падишалар 11 - Мукъаддес Китап

Сулейман Раббиден юзь чевире

¹ Сулейман падиша ябанджы олгъан чокъ апайларны севди: фыравуннынъ къызыны ве башкъа моавлы, аммонлы, эдомлы, сидонлы ве хитли апайларны.

² РАББИ Исраиль огъулларына бу халкълар акъкъында: «Сиз оларгъа кирменъиз, олар да сизге кирмесинлер, чюнки олар мытлакъа сизлернинъ юрегинъизни башкъа аллаларгъа бойсундыраджакълар», – деген эди. Лякин Сулейман оларны пек севди.

³ Онынъ 700 падишалар къызлары олгъан къадыны ве 300 джариеси бар эди. Олар Сулейманнынъ юрегини ёлдан урдылар.

⁴ Сулейман къартайгъанында, олар юрегини башкъа аллаларгъа бойсундырдылар. Давут бабасынынъ юреги бутюнлей РАББИге берильген эди, амма Сулейманнынъ юреги шимди Алласына бутюнлей берильмеген эди.

⁵ Сулейман сидонлыларнынъ алласы Ашторетке ве аммонлыларнынъ арам путу Милкъомгъа табынып башлады.

⁶ Сулейман РАББИ ярамай сайгъан шейлерни япып башлады ве бабасы Давут киби япмады, РАББИнинъ пешинден джан-юрекнен бармады.

⁷ Сонъ Сулейман Ерусалимнинъ огюндеки дагъда моавлыларнынъ арам путу Кемошкъа ве аммонлыларнынъ арам путу Молекке ибадет тёпесини къурды.

⁸ О, эписи ябанджы апайлары ичюн бойле япты, ве олар озь аллаларына къурбанлар чалып, къокъулы отлар якъа эдилер.

^9-10 Сулейман озь юрегини Исраильнинъ Алласындан, РАББИден чевиргени ичюн, РАББИ Сулеймангъа пек гъазапланды. РАББИ Сулеймангъа эки кере корюнип: «Башкъа аллаларнынъ пешинден барма», – деп буюргъан олса да, Сулейман РАББИ буюргъан шейни беджермеди.

¹¹ О заман РАББИ Сулеймангъа: – Бойле шейлер япкъанынъ ичюн, Меним васиетимни ве Мен санъа буюргъан низамнамелеримни сакъламагъанынъ ичюн, Мен мытлакъа падишалыкъны сенден тартып алып, сенинъ къулунъа береджегим.

¹² Лякин бабанъ Давут хатири ичюн буны сенинъ яшайышынъда япмам. Падишалыкъны сенинъ огълунънынъ къолундан тартып алырым.

¹³ Бутюн падишалыкъны мытлакъа тартып алмам, сенинъ бабанънынъ, Меним къулум Давутнынъ хатири ичюн ве Мен сайлап алгъан Ерусалим ичюн сенинъ огълунъа тек бир къабилени къалдырырым, – деди.

Сулейманнынъ душманлары

¹⁴ Сонъ РАББИ Сулеймангъа къаршы Эдом падиша сюлялесинден олгъан эдомлы Хададны алып кетирди.

¹⁵ Эвеллери Давут Эдомда олгъанда, орду башы Ёав олюлерни дефн этмек ичюн келип, Эдомдаки эписи акъайларны ольдюрген эди.

¹⁶ Ёав ве эписи исраиллилер Эдомдаки бутюн акъайларны ёкъ этмегендже, анда алты ай девамында турдылар.

¹⁷ О вакъыт бу Хадад ве бир къач дане бабасына хызмет эткен эдомлылар Мысыргъа къачып къуртулгъан эдилер. Хадад о маальде кичкене бала эди.

¹⁸ Мидьяндан чыкъып, олар Паран топрагъына кельдилер. Парандан адамлар алып, Мысыргъа, Мысыр фыравунына кельдилер. Фыравун онъа эв берди, аш тайинледи ве топракъ берди.

¹⁹ Хадад фыравуннынъ буюк мемнюниетини къазанды, ве фыравун оны апайынынъ, къыраличе Тахпенеснинъ къызкъардашына эвлендирди.

²⁰ Тахпенеснинъ къызкъардашы онъа огълан Генуватны тапты. Тахпенес оны фыравуннынъ эвинде тербиеледи. Генуват фыравуннынъ эвинде фыравуннынъ огъулларынен берабер яшады.

²¹ Хадад Мысырда олгъанда, Давутнынъ баба-деделерине къошулгъаны ве орду башы Ёавнынъ ольгени акъкъында хабер алып, фыравунгъа: «Мени йибер, озь ерлериме кетейим», – деди.

²² Фыравун ондан: «Не ичюн озь ерлеринъе кетеджек оласынъ? Менде бир шейге мухтаджсынъмы ёкъса?» – деп сорады. О исе: «Ёкъ, лякин эписи бир мени йибер!» – деди.

²³ Алла Сулеймангъа къаршы даа бир душманны чыкъарды. Бу – Эльяда огълу Резон эди. О, озюнинъ эфендиси Цова падишасы Хададезерден къачкъан эди.

²⁴ Резон, янында бир къач адам топлап, айдутлар башлыгъы олды. Давут оларгъа уджюм эткен сонъ, олар Дамаск шеэрине келип, анда ерлештилер ве падишалыкъ яптылар.

²⁵ Резон Сулейманнынъ бутюн яшайышы девамында Исраильнинъ душманы эди. Хададнынъ япкъан яманлыгъындан гъайры, о, Исраильге зарар кетире эди ве Арамгъа падишалыкъ япа эди.

Алланынъ Еровоамгъа берген вадеси

²⁶ Цереда шеэрден, Эфраим къабилесинден, Сулейманнынъ къулу олгъан Неват огълу Еровоам падишагъа къаршы чыкъты. Онынъ тул къалгъан анасынынъ ады Церуа эди.

²⁷ Онынъ Сулейман падишагъа къол котергенининъ себеби шунда эди: Сулейман Миллоны къура эди, бабасы Давут Шеэринде тар-мар этильген ерлерни гъайрыдан тиклей эди.

²⁸ Еровоам джесаретли аскер эди. Сулейман, бу адам ишини анълагъаныны корип, оны Юсуфнынъ эвиндеки зорлап чалыштырылгъан ишчилерге козетиджи этип къойды.

²⁹ Бир кунь Еровоам Ерусалимден чыкъып кетти. Ёлда оны шилолы Ахия пейгъамбер расткетирди. Устюнде янъы урбасы бар эди. Тарлада ялынъыз экиси эдилер.

³⁰ Ахия устюндеки янъы урбасына япышып, он эки парчагъа йыртты.

³¹ Сонъ Еровоамгъа берип: – Озюнъе он парчасыны ал, чюнки РАББИ, Исраильнинъ Алласы шойле деди: «Мына Мен Сулейманнынъ элинден падишалыкъны тартып алам ве санъа он къабилени берем.

³² Бир къабиле исе къулум Давут хатири ве Исраильнинъ эписи къабилелеринден Мен сайлап алгъан Ерусалим шеэри ичюн онда къалсын.

³³ Бу – олар Мени ташлап, сидонлыларнынъ алласы Ашторетке, Моав алласы Кемошкъа, Аммон огъулларынынъ алласы Милкъомгъа табынгъанлары, Меним ёлларымдан урулгъанлары, бабасы Давуткъа ошамайып, Меним низамнамелеримни ве къарарларымны тутмагъанлары ве Меним огюмде догъру ишлер япмагъанлары ичюндир.

³⁴ Мен онынъ элинден бутюн падишалыкъны тартып алмайым. Амма Давутнынъ хатири, Меним эмирлеримни ве низамнамелеримни сакълап юрген ве Мен сайлап алгъан къулум хатири ичюн бутюн яшайышы девамында о, падиша къаладжакъ.

³⁵ Лякин падишалыкъны онынъ огълундан тартып аладжагъым ве онынъ он къабилесини санъа береджегим.

³⁶ Къулум Давутнынъ къандили Меним огюмде, Намым даима булунаджакъ деп сайлап алгъан Ерусалим шеэринде сёнмейип янсын деп, онынъ огълуна бир къабиле къалдырырым.

³⁷ Мен сени сайлап аладжагъым, ве сен джанынъ истеген шейге укюмдарлыкъ япаджакъсынъ ве Исраильнинъ падишасы оладжакъсынъ.

³⁸ Эгер Мен санъа буюргъан эписи шейлерни беджерсенъ, Меним ёлларымдан юрсенъ, къулум Давут япкъан киби, Меним низамнамелеримни ве эмирлеримни тутып, Меним огюмде догъру ишлер япсанъ, Мен сенинъ янынъда оладжагъым ве, къулум Давуткъа япкъаным киби, сенинъ сюляленъни де къавий этеджегим, санъа Исраильни береджегим.

³⁹ Давутнынъ союны боюн эгдиреджегим. Амма омюрбилля дегиль», – деди.

⁴⁰ Сулейман Еровоамны ольдюрмеге истеди. Лякин Еровоам Мысыргъа, Мысыр падишасы Шишакъкъа къачып кетти ве анда Сулейманнынъ олюминедже яшады.

Сулейманнынъ олюми

⁴¹ Сулейманнынъ яшайышы акъкъындаки башкъа малюматлар, Сулейманнынъ ишлери ве онынъ икмети акъкъында Сулейманнынъ ишлери китабында язылгъандыр.

⁴² Сулейманнынъ Ерусалимде Исраильге падишалыкъ эткен бутюн вакъты 40 йылдыр.

⁴³ Сулейман баба-деделерине къошулды ве бабасы Давут Шеэринде дефн этильди. Онынъ ерине огълу Реховоам падиша олды.