2 Тимотейге 2 - Мукъаддес Китап

Иса Месихнинъ яхшы аскери

¹ Огълум, Иса Месихте тапкъан эйиликнен къавийлеш.

² Чокъ шаатларнынъ огюнде менден эшиткен бутюн шейлерни ишанчлы адамларгъа айтып бер. О вакъыт олар да башкъаларны огретип олур.

³ Иса Месихнинъ яхшы бир аскери киби, азапларгъа даян.

⁴ Башлыгъынынъ разылыгъыны къазанмакъ ичюн, ич бир аскер куньделик ишлернен огърашмаз.

⁵ Спорт ярышларына къошулгъан адам къанунларны бозса, енъиш таджыны киймез.

⁶ Чалышкъан койлю берекеттен озь пайыны биринджи олып алмакъ керек.

⁷ Айткъанларымны яхшы анъла. Рабби эр шейни санъа анълатыр.

⁸ Давутнынъ союндан олгъан, Мен даркъатаяткъан Къуванчлы Хаберге коре олюлерден тирильген Иса Месихни акълынъда тут.

⁹ Бу Къуванчлы Хабер ичюн мен, яманлыкъ япкъан адам киби, зынджырларгъа багъланып, азап чекем. Амма Алланынъ Сёзюни зынджырларнен багъламагъа мумкюн дегиль!

¹⁰ Шу себептен, сайлагъан адамлар ичюн эр шейге даянам, олар да Иса Месихте олгъан къуртулышны ве эбедий шуретни алсынлар.

¹¹ Бу сёзлер догърудыр: Эгер Онен берабер ольген олсакъ, Онен берабер яшайджакъмыз.

¹² Эгер сабыр этсек, Онен берабер падишалыкъ япаджакъмыз. Эгер Оны инкяр этсек, О да бизни инкяр этеджек.

¹³ Эгер ишанчлы олмасакъ, О ишанчлы олып къаладжакъ, чюнки О Озюни инкяр этип оламай.

Яхшы ишке ляйыкъ

¹⁴ Бу шейлерни хатырлатып тур, адамларны Раббининъ огюнде тенбиеле, олар сёзлер акъкъында даваларны башламасынлар. Бойле даваларнынъ файдасы ёкъ, олар тек динълейиджилерни ёкъ этелер.

¹⁵ Алланынъ козю огюнде ляйыкъ олмагъа гъайретнен тырыш, утанмайып чалышкъан ишчи ол, акъикъат сёзюни догъру къулланып огрет.

¹⁶ Бош, алласыз лафлардан узакълаш. Бу лафларгъа берильгенлер баргъан сайын алласыз олалар.

¹⁷ Оларнынъ лафлары гангрена киби даркъала. Мына, Хименай ве Филит бойле адамлардандыр.

¹⁸ Тирилиш куню энди кельди, деп, олар акъикъат ёлундан урулып, базыларнынъ иманыны бозалар.

¹⁹ Лякин Алла къойгъан темель къавийдир, онда бойле сёзлер печат киби къоюлгъан: «Рабби ким Онынъки олгъаныны биле» ве «Раббининъ Адыны тилине алгъан эр бир адам яманлыкътан узакълашсын!»

²⁰ Буюк бир эвде тек алтындан ве кумюштен япылгъан савутлар дегиль, олардан гъайры агъачтан ве балчыкътан ясалгъан савутлар да олур. Оларнынъ базылары айры къулланув ичюн, башкъалары адий къулланув ичюндир.

²¹ Озюни мен айткъан шейлерден темизлеген адам яхшы савут киби олур, элялланыр ве эр бир яхшы ишке ярар, ве Эфендиси онен файдалана билир.

²² Яшлыкънынъ истеклеринден къач. Раббини чагъыргъан бутюн адамларнен берабер темиз юректен инсафлыкъ, иман, севги ве тынчлыкъ-аманлыкъкъа ынтыл.

²³ Ахмакъ ве джаиль давалардан узакълаш. Олар тек къавгъагъа себеп олгъаныны билесинъ.

²⁴ Алланынъ къулуна къавгъалашмагъа мумкюн дегиль. Аксине, Алланынъ къулу эписинен мераметли, огретмеге азыр, сабырлы олмакъ керек.

²⁵ О, озюне къаршы тургъанларгъа йымшакълыкънен огют-насиат бермек керек. Бельки, Алла бойле адамларгъа тёвбе этмеге ёл ачар, ве олар акъикъатны билир,

²⁶ озюне келирлер ве оларны эсирге алгъан, озь истегенини япмагъа меджбур эткен Шейтаннынъ къапкъанындан къуртулырлар.