2 Падишалар 23 - Мукъаддес Китап

Давутнынъ сонъки сёзлери

¹ Мына Давутнынъ сонъки сёзлери: – Бу – Йишай огълу Давутнынъ сёзлери. РАББИ юксельткен адам, Якъупнынъ Алласынынъ Месихи, Исраильнинъ татлы сес йырджысы бойле айта:

² Ичимден РАББИнинъ Руху айта, Онынъ сёзю даима меним лафымда.

³ Исраиль Алласы, Исраильнинъ Къаясы манъа деди: Адамларгъа адалетли падишалыкъ япкъан адам, Алладан къоркъып падишалыкъ япкъан адам –

⁴ танъда догъгъан кунешнинъ нуру кибидир, булутсыз саба, ягъмурдан, кунештен осип чыкъкъан тазе от кибидир!

⁵ Эльбетте, эвим бойлеликнен Аллада! О манъа там ве яхшы къорулгъан эбедий васиет берди. Бутюн меним къуртулышым, бутюн меним истеклерим Ондан дегильми?

⁶ Ярамай адамлар исе эльнен тутулмаз тикен киби четке атыладжакъ.

⁷ Оны туткъанлар исе элине я демир алет, я мызракънынъ сапыны алалар ве шу ерде бутюнлей атеште якъалар.

Давутнынъ джесюр аскерлери

⁸ Мына Давутнынъ къараманлары: Тахкемонлы Ёшев-Башшевет, Учевинден энъ буюги. О да – эценли Адино. О, 800 адамгъа сюнгюсини котерип, эписини бир кереден ольдюрди.

⁹ Экинджиси – Ахохий союндан Додонынъ огълу Элазар. О, Учь Къараманнынъ бириси эди. Давутнен берабер олар дженклешмеге топлангъан фелестинлилерни дженкке чагъырды. Исраиллилер оларгъа къаршы чыкъкъанда,

¹⁰ Элазар фелестинлилерни о къадар ольдюрди ки, тап къолу болдурып, къылычына япышып къалды. РАББИ оларгъа шу куню буюк гъалебе берди. Халкъ онынъ артындан тек олюлерни топламакъ ичюн кете эди.

¹¹ Учюнджиси – Харар союндан Агенинъ огълу Шамма. Фелестинлилер Лехиде, берджимек тарласынынъ янында дженкке топлашкъанда, исраиллилер олардан къачып башлады.

¹² Шамма тарланынъ ортасында турып, фелестинлилернен дженклешмеге башлады ве тарланы сакълап къалды. О вакъыт РАББИ буюк гъалебе багъышлады.

¹³ Бир кунь оракъ вакътында, Давут Адуллам къобасында отургъанда, фелестинлилернинъ сюрюси Рефаим вадийинде ерлешти. 30 ёлбашчынынъ арасындан шу Учю Давуткъа кельди.

¹⁴ Давут о заман пекитильген бир ерде эди, фелестинлилернинъ отряды исе – Вифлеемде.

¹⁵ Давут сувсады ве: – Манъа бирев шеэр къапусынынъ янындаки Вифлеем къуюсындан сув кетирсе эди! – деди.

¹⁶ О вакъыт бу Учь Къараман фелестинлилернинъ ордусындан кечип, шеэр къапусы янындаки Вифлеем къуюсындан сув алдылар ве Давуткъа кетирдилер. Лякин о, ичмеге истемеди, сувны РАББИге багъышлап, ерге тёкти.

¹⁷ – Буны япмагъа манъа Алла косьтермесин! Бу – озь омюрлерини олюм хавфы алтында къалдырып кеткен адамларнынъ къаны дегильми я? – деп, сувны ичмеге истемеди. Учь Къараманнынъ япкъанлары бойле эди.

¹⁸ Церуянынъ огълу, Ёавнынъ къардашы Авишай Учь Къараманнынъ башлыгъы эди. Бир кунь о, мызрагъынен 300 адам ольдюрди. О, Учь Къараман киби, буюк нам къазанды.

¹⁹ О, Учь Къарамандан энъ намлысы ве оларнынъ башлыгъы олды, лякин Учь Къарамандан бири дегиль эди.

²⁰ Къавцеэл шеэринден Ехояданынъ огълу Беная джесюр эр ве ишлеринен белли олгъан адам эди. О, моавлы Ариэлнинъ эки огълуны ольдюрди. Даа о, къарлы бир вакъытта чукъургъа тюшип, бир арслан ольдюрди.

²¹ О корюмли бир мысырлыны да ольдюрди. Мысырлынынъ къолунда мызрагъы бар эди; Беная исе онынъ къаршысына бир таякъ котерип чыкъты ве оны озюнинъ мызрагъынен ольдюрди.

²² Ехояда огълу Беная мына бойле ишлер япты ве, Учь Къараман киби, буюк нам къазанды.

²³ О, Отуз Аскерден урьметли эди, лякин Учь Къараманнынъ бири дегиль эди. Давут оны озь къаравулларынынъ башлыгъы этип къойды.

²⁴ Ёавнынъ къардашы Асаэл де Отуз Аскернинъ арасында эди. Оларнынъ арасында бойле адамлар бар эди: Вифлеем шеэринден Додонынъ огълу Элханан,

²⁵ хародлы Шамма ве хародлы Эликъа,

²⁶ палетли Хелец, текъоалы Иккешнинъ огълу Ира,

²⁷ анатотлы Авиэзер, хушалы Мебуннай,

²⁸ ахохлы Цалмон, нетофалы Махарай,

²⁹ нетофалы Баананынъ огълу Хелев, биньяминлилернинъ Гива шеэринден Ривай огълу Иттай,

³⁰ пиратонлы Беная, Гъааш вадийлеринден Хиддай,

³¹ аравалы Ави-Албон, бархумлы Азмавет,

³² шаалвонлы Эльяхба, Яшен огъуллары, Ехонатан,

³³ харарлы Шамма, арарлы Шарар огълу Ахиам,

³⁴ Маакъа союндан Ахасбайнынъ огълу Элифелет, гилолы Ахитофел огълу Элиам,

³⁵ къармелли Хецро, аравлы Паарай,

³⁶ Цова шеэринден Натан огълу Игъал, гъадлы Баний,

³⁷ аммонлы Целек, Церуянынъ огълу Ёавнынъ силя ташыйыджысы беэротлы Нахарай,

³⁸ йитрли Ира, йитрли Гъарев

³⁹ ве хитли Урия. Джеми оларакъ отуз еди адамдыр.