2 Падишалар 22 - Мукъаддес Китап

Давут Раббиге шурет йыры йырлай

¹ РАББИ Давутны эписи душманларындан ве Шаулдан къуртаргъан куню Давут РАББИге бу йырны йырлады:

² РАББИ – меним къаям, меним къалем ве меним Къуртарыджымдыр,

³ Аллам – меним къаям, меним къорунгъан еримдир. О – меним къалкъаным, къуртулышымнынъ къувети, юксек енъильмез керменим, сакълангъан еримдир, меним Къуртарыджымдыр. Сен мени зорбалыкълардан къорчалайсынъ!

⁴ Макътавгъа ляйыкъ РАББИмни чагъыраджагъым, ве О, мени душманларымдан къуртараджакъ.

⁵ Олюм далгъалары мени сарып алды, акъсызлыкънынъ чокълугъы зияде къоркъузды.

⁶ Джеэннем зынджыры мени багълады, олюм озю козьлериме бакъты.

⁷ Башым беляда къалгъанда, РАББИмни чагъырдым, Аллама ялвардым! Сарайындан О, сесимни эшитти, яйгъаргъаным Онынъ къулагъына барып етти.

⁸ Ер юзю тепренип титреди, коклернинъ темеллери титреп, еринден къыбырдады, чюнки О, ачувланды.

⁹ Бурнундан тютюн чыкъты, агъзындан эр шейни ёкъ этиджи атеш фышкъырды, алевленген комюр сепильди.

¹⁰ О, коклерни ачып, ашагъы тюшти, аякъларынынъ тюбюнде къаранлыкъ эди.

¹¹ Керувнынъ устюне отурып, учты, ельнинъ къанатларында учып кетти.

¹² Озюни къаранлыкънен орьтти, къара, сувдан агъырлашкъан булутларгъа сарылды.

¹³ Онынъ огюнде йылтырагъан нур джайылды, Ондан эр шей комюр киби алевленди.

¹⁴ РАББИ коклерден гудюрдеди, Юдже Алланынъ сеси котерильди.

¹⁵ Окълар атып, душманларыны дагъытты, йылдырымнен оларны шашмалатты.

¹⁶ РАББИнинъ къоркъунчлы сесинден, Онынъ ачувлы нефесинден денъизнинъ сув башы ачылды, ер юзюнинъ темеллери корюнди.

¹⁷ Юкъарыдан элини узатып, О, мени алды, терен сувлардан чыкъарды,

¹⁸ кучьлю душмандан сакълады, мени кореджек козю олмагъанлардан, менден кучьлю душманларымдан къорчалады.

¹⁹ Башыма беля тюшкенде, олар манъа уджюм эттилер, лякин РАББИ манъа ярдым этти.

²⁰ О, мени чаресиз алдан чыкъарды, менден разы олгъаны ичюн, мени къуртарды.

²¹ РАББИ инсафлыгъыма коре манъа мукяфат берди, эллеримнинъ темизлигине коре къайтарды.

²² Мен РАББИнинъ эмирлерини туттым, Алламнынъ огюнде яманлыкъ япмадым.

²³ Къарарларынынъ эписи – козюм огюнде, низамнамелеринден чекильмедим мен.

²⁴ Онынъ огюнде къабаатсыз эдим, гуна япмакътан сакъындым.

²⁵ РАББИ инсафлыгъыма коре манъа мукяфат берди, Онынъ огюнде темизлигиме коре къайтарды.

²⁶ Ишанчлы адамнен Сен ишанчлысынъ, къабаатсыз адамнен – бутюнлей догърусынъ.

²⁷ Темиз адамнен – темизсинъ, яланджыгъа яланына коре бересинъ.

²⁸ Алчакъгонъюллини къуртарасынъ, макътангъан адамны корип, алчакълатасынъ.

²⁹ Сен, РАББИ, – меним нурумсынъ! РАББИ къаранлыгъымны айдынлата.

³⁰ Сенинъ къуветинънен ордуларны къырам, Алламнен берабер диварларгъа чыкъам.

³¹ Алланынъ ёлу къусурсыздыр! РАББИнинъ сёзю къавийдир! Онъа умют багълагъанларнынъ эписини О, къорчалай!

³² РАББИден гъайры, башкъа Алла бармы? Алламыздан гъайры, башкъа сарсылмаз къая бармы?

³³ Алла манъа кучь бере, догъру ёлны косьтере.

³⁴ Аякъларымны джейран киби тез япа, мени юксеклерге къоя.

³⁵ Къолларымны дженк этмеге азырлай, эллеримни тунч яйны тартмагъа огрете.

³⁶ Манъа берильген къуртарувынъ – къалкъан кибидир, мераметинъ мени къуветлештире.

³⁷ Аякъ тюбюмдеки ёлны кениш япасынъ, аякъларыма таймагъа ёл бермейсинъ.

³⁸ Душмаларымнынъ пешинден къувалайым, оларны ёкъ этем. Олар тамамынен гъайып олмагъандже, артыма къайтмайым.

³⁹ Мен оларны енъем, агъыр яралайым. Олар бир даа котерильмейлер, аягъым астына йыкъылалар.

⁴⁰ Манъа дженк этмек ичюн кучь бересинъ, манъа къаршы исьян котергенлерни огюмде ерге йыкъасынъ.

⁴¹ Душманларымны менден къачмагъа меджбур этесинъ, менден нефретленгенлерни ёкъ этем.

⁴² Олар ярдым истейлер, амма оларны къуртаргъан кимсе ёкъ. РАББИни чагъыралар, амма О, оларны эшитмей.

⁴³ Мен оларны тозгъа айландырам, ердеки топракъ киби япам, сокъакъ чамурыны киби таптап эзем.

⁴⁴ Сен мени халкъымнынъ исьянындан къорчаладынъ, тюрлю миллетлерге башлыкъ этмек ичюн, сакъладынъ. Мен бильмеген халкъ манъа хызмет эте,

⁴⁵ ябанджылар манъа ялтакъланып бойсуналар, эмирлеримни эшитип, шу ань беджерелер.

⁴⁶ Ябанджыларнынъ отьлери патлай, къалтырап, сакълангъан ерлеринден чыкъалар.

⁴⁷ РАББИ яшай! Онъа, меним къаяма, шукюрлер олсун! Меним Алламны, Къуртарыджымны, къаямны шуретленъиз!

⁴⁸ Алла, Сен меним ичюн интикъам аласынъ, халкъларны манъа бойсундырасынъ,

⁴⁹ мени душманларымдан къуртарасынъ. Сен мени манъа къаршы чыкъкъанлардан юксельттинъ, мераметсиз адамлардан къуртардынъ!

⁵⁰ Шунынъ ичюн, РАББИ, чешит тюрлю миллетлернинъ огюнде Санъа шукюрлер этеджегим, Адынъа шан йырларыны йырлайджагъым!

⁵¹ Сен Озь падишанъны къуртарасынъ, Озь Месихинъе Давуткъа ве эвлятларына эбедиен севгинъни косьтересинъ!