2 Падишалар 17 - Мукъаддес Китап

Ахитофел ве Хушай Авишаломгъа меслеат берелер

¹ Ахитофел Авишаломгъа даа: – 12 000 адам сайлап алайым да, бу гедже Давутнынъ пешинден къувалайым.

² О, болдурып кучьсюз къалгъан вакъытта оны къоркъузайым. Онен берабер олгъан адамлар къачарлар да, олар къачкъан сонъ, мен ялынъыз къалгъан падишаны ольдюририм.

³ Бир вакъыт олар эписи сен ольдюрмеге истеген инсангъа къайтып кельдилер. Шимди де тыпкъы ойле оладжакъ: мен оларнынъ эписини санъа къайтарып берерим, ве бутюн халкъ сагъ-селямет къалыр, – деди.

⁴ Авишалом ве эписи Исраиль акъсакъаллары бу сёзлерни пек бегендилер.

⁵ Авишалом: – Аркълы Хушайны чагъырынъыз, не айтаджагъыны динълейик, – деди.

⁶ Хушай Авишаломгъа кельди, Авишалом: – Ахитофел мына нелер айта, онынъ айткъаныны япайыкъмы? Эгер ёкъ десенъ, не япмакъ кереклигини озюнъ огрет, – деди.

⁷ Хушай Авишаломгъа: – Ахитофелнинъ бу сефер берген насиаты яхшы дегиль, – деди ве

⁸ сёзлерини девам этип: – Сен бабанъны ве аскерлерини билесинъ. Олар джесюр адамлар, чёльде баласындан марум олгъан аюв киби ачувландылар. Бабанъ – теджрибели аскер, гедже халкъынен берабер геджелемез.

⁹ Шимди я бир къобада, я да башкъа бир ерде гизлене. Эгер биринджи уджюмде аскерлеринънинъ базылары ольдюрильсе, башкъалары шашмалап: «Давут Авишаломгъа къошулгъанларнынъ эписини къыра», – деп къычырышаджакълар.

¹⁰ О заман юреги арслан юреги киби джесюр олгъанлар да рухтан тюшерлер. Бабанънынъ джесюрлиги ве аскерлерининъ джесаретлиги акъкъында бутюн Исраиль биле.

¹¹ Шунынъ ичюн меним насиатым бойле: Дандан Беэр-Шевагъа къадар бутюн Исраиль топлашсын, адамлар денъиздеки къум киби чокъ олсун, сен де оларнынъ ортасында дженкке кет.

¹² Биз Давуткъа къаршы чыкъармыз. О, къайда олмаса да, онъа чыкъ тюшкени киби уджюм этермиз. Онынъ янында олгъан адамлардан бириси сагъ къалмаз.

¹³ Эгер о, бирде-бир шеэрге кирсе, бутюн Исраиль шу шеэрге аркъанлар кетирир, ве биз шеэрни вадийге сюйреклермиз, шеэрде таш устюнде таш биле къалдырмамыз, – деди.

¹⁴ Авишалом ве бутюн Исраиль: – Аркълы Хушайнынъ насиаты Ахитофел берген насиатындан яхшы, – дедилер. Мына бойле этип, РАББИ, Авишаломгъа беля кетирмек ичюн, Ахитофелнинъ яхшы насиатыны бозмагъа ниет этти.

Хушайнынъ меслеаты Давут эвини сакълап къала

¹⁵ Хушай руханий Цадокъкъа ве Авиатаргъа: – Ахитофел Авишаломгъа ве Исраиль акъсакъалларына бойле-бойле насиат берди, мен исе бойле-бойле насиат бердим.

¹⁶ Энди Давуткъа аджеле хабер йиберинъиз, онъа: «Бу гедже сахра вадийинде къалма. Сен, падиша, ве адамларынъ сагъ-селямет къалмасы ичюн, андан тез-тез кет», – денъиз, – деди.

¹⁷ Ехонатан ве Ахимаац Эн-Рогель янында эдилер, чюнки озьлерине шеэрде корюнмеге чарелери ёкъ эди. Бир хызметчи къыз оларгъа келип, эр шейни айтып бере эди. Олар исе Давут падишагъа хабер эте эдилер.

¹⁸ Амма бир йигит оларны корип, Авишаломгъа айтты. Олар аджеле къачып кетип, Бахурим шеэрине, бир адамнынъ эвине кельдилер. Онынъ азбарында къуюсы бар эди, ве олар бу къуюгъа тюштилер.

¹⁹ Адамнынъ апайы, къуюнынъ агъзыны орьтюнен къапатып, устюне курьпе септи. Бойлеликнен, бир шей корюнмей къалды.

²⁰ Авишаломнынъ къуллары къадыннынъ эвине келип: – Ахимаац ве Ехонатан къайда? – деп сорадылар. Къадын оларгъа: – Олар озенни кечип кеттилер, – деди. Олар къыдыра-къыдыра, бир шей тапмайып, Ерусалимге къайттылар.

²¹ Олар кеткен сонъ, Ахимаац ве Ехонатан къуюдан чыкъты ве, Давут падишагъа келип: – Турунъыз, тез-тез сувдан кечинъиз. Ахитофел бойле-бойле деди, – деп хабер эттилер.

²² Давут ве онен олгъан адамлар Иордан озенини тез-тез кечтилер. Сабагъадже Иордан озенини кечмеген бир адам биле къалмады.

²³ Ахитофел, насиаты беджерильмегенини корип, эшегини екти, азырланып ёлгъа чыкъты, шеэрине, эвине кельди, къорантасына сонъки эмирлерини берди, сонъ озь-озюни асып ольдюрди. Оны бабасынынъ къабринде дефн эттилер.

²⁴ Давут Маханаим шеэрине кельди. Авишалом ве исраиллилернинъ эписи исе Иорданны кечтилер.

²⁵ Авишалом Ёавнынъ ерине орду башлыгъы оларакъ Амасаны къойды. Амаса – Йитра адлы йизреэлли бир адамнынъ огълу эди. Онынъ анасы – Авигаил, Нахашнынъ къызы ве Церуянынъ къызкъардашы эди. Церуя – Ёавнынъ анасы эди.

²⁶ Авишалом исраиллилернинъ ордусынен Гилад топрагъында ерлешти.

²⁷ Давут Маханаим шеэрине кельгенде, аммонлы Рабба шеэринден олгъан Нахашнынъ огълу Шовий, Ло-Девар шеэринден Аммиэл огълу Макир ве Рогелим шеэринден олгъан гиладлы Барзиллай

²⁸ тёшеклер, легенлер ве чамурдан япылгъан савутлар, богъдай, арпа, ун, къавурылгъан богъдай данелерини, бакъла, берджимек,

²⁹ бал, сюзюльген иримчик, сыгъыр сютюнден ясалгъан пенир ве къой-эчки кетирип: – Халкъ ач, ёрулгъан, сахрада сувсузлыкъкъа чыдагъан, – деп, Давут ве адамларына аш бердилер.