2 Коринтлилерге 9 - Мукъаддес Китап

Месихке инангъан дин къардашларгъа ярдым

¹ Азизлерге ярдым этмек акъкъында сизлерге язмакъ мен ичюн арткъачтыр.

² Ярдым этмеге истегинъизни билем, шунынъ ичюн македониялылар огюнде сизлернен макътанып юрем ве Ахаяда яшагъанлар былтырдан берли ярдым этмеге азыр олгъаныны айтам. Сизинъ гъайретинъиз себебинден чокъусы арекетке кельди.

³ Энди сизинъ акъкъынъызда макътавым бошуна чыкъмасын ве, мен айткъаным киби, сиз азыр олунъыз деп, агъа-къардашларны ёллайым.

⁴ Эгер македониялылар меннен берабер барып, сизлерни азыр олмагъан алда корьселер, биз масхара олурмыз. Сизлер исе бу иште даа бетер масхара олурсыз.

⁵ Шунынъ ичюн мен агъа-къардашларгъа, олар сизлерге эвельден барсынлар деп, риджа этмек къарарына кельдим. О вакъыт сизинъ сёз берген бахшышларынъыз эвельден азыр олур, ве бахшышынъыз зорнен берильген бахшыш дегиль, керчектен де бахшыш олур.

⁶ Шуны унутманъыз: къызгъанып сачкъан аз джыяр, бол сачкъан исе бол берекет джыя.

⁷ Эр ким зорланып я да меджбур олып дегиль, юрегинде ниет эткенини берсин. Алла къуванчнен берген адамларны севе.

⁸ Алланынъ сизлерге эр бир эйи шейни бермеге кучю бар. О вакъыт сизлерде эр вакъыт эр керек шей олур, ве сиз эр тюрлю хайырлы ишке азыр олурсынъыз.

⁹ Язылгъаны киби, къолуны ачып, ёкъсулларгъа берген адамнынъ инсафлыгъы эбедий олур.

¹⁰ Сачыджыгъа урлукъ ве ашагъангъа отьмек береяткъан Алла сизинъ сачкъанынъызны бол япаджакъ, инсафлыкъ берекетинъизни де чокълаштыраджакъ.

¹¹ О вакъыт сизлер бай олып, эр шейни боллукънен береджексинъиз, адамлар исе бизден бахшышынъызны къабул этип, Аллагъа шукюрлер айтаджакъ.

¹² Сизинъ хызметинъиз фукъаре азизлерге ярдым эте, бундан да гъайры чокъ адамларгъа Аллагъа чокътан-чокъ шукюр этмеге себеп ола.

¹³ Бу хызметинъизни корип, олар Месихнинъ Къуванчлы Хаберине бойсунгъанынъыз ичюн ве башкъаларгъа берильген бол бахшышларынъыз ичюн Алланы шуретлейджек,

¹⁴ сизлер ичюн дува окъуйджакъ ве, Алла сизге арткъач эйилик бергенине къуванып, сизлерге юрекнен бериледжеклер.

¹⁵ Анълатылмаз бахшышы ичюн Аллагъа шукюр!