2 Коринтлилерге 8 - Мукъаддес Китап

Гонъюльден бахшыш

¹ Шимди, дин къардашларымыз, сизлерге Македониядаки иманлыларнынъ джемиетлерине Алла берген эйилик акъкъында бильдирмеге истеймиз.

² Олар агъыр сынавлардан кечкен олсалар да, буюк къуванчкъа толып ташалар, терен фукъареликте олсалар да, буюк бахшышларны бермеге истегини косьтерелер.

³ Олар озь истеклеринен къолларындан кельгени къадар, атта имкянларындан да зияде ярдым эткенлерине мен шаатым.

⁴ Олар бизден Алланынъ азиз халкъына ярдым бермеге чокъ ялварып сорадылар.

⁵ Олар биз ишангъанымыздан зияде яптылар ве озьлерини башта Раббиге, сонъ, Алланынъ истегинен, бизге багъышладылар.

⁶ Шунынъ ичюн сизинъ аранъызда бу яхшы ишни битирмеге биз Титке риджа эттик, чюнки о озю оны башлагъан эди.

⁷ Сизлер эр шейде бай оласынъыз – эм иманда, эм лафкъа усталыкъта, эм бильгиде, эм эр тюрлю гъайретте, эм де бизни севгенинъизде. Бу хайырлы иште де устюн олунъыз.

⁸ Буны япмагъа сизге буюрмайым, лякин башкъаларнынъ гъайрети ярдымынен севгинъизнинъ акъикъийлигини сынайым.

⁹ Сизлер Раббимиз Иса Месихнинъ эйилигини билесиз: О, зенгин олса да, сизлер ичюн фукъаре олды, ве шунынъ ичюн сиз онынъ фукъарелиги ярдымынен зенгин олдынъыз.

¹⁰ Бу акъта меним фикирим бойле, ве мен айткъан ишни битирсенъиз, сизге файда олур. Кечкен йылы сиз биринджи олып, бу ишни башладынъыз, бундан гъайры биринджи олып оны япмагъа истединъиз.

¹¹ Энди бу ишни битиринъиз. Бойле этип, буюк истегинъизнен къолунъыздан кельгенине коре беджеринъиз.

¹² Эгер керчектен ярдым этмеге истесенъиз, бахшышы къабул этильсин деп, эр бир адам озь бахшышыны къолунда олгъанына коре берсин.

¹³ Башкъаларына енгиллик, сизлерге исе агъырлыкъ тюшеджеги керекмей, эр шей тенъ олсун.

¹⁴ Шимди сизлердеки боллукъ оларнынъ къытлыгъыны толдурсын, башкъа вакъытта олардаки боллукъ сизинъ къытлыгъынъызны толдурыр. Бойлеликнен, эр шей тенъ олур.

¹⁵ Язылгъаны киби: «Эм чокъ джыйгъан союнда арткъач ёкъ эди, эм аз джыйгъан союнда да эксиклиги олмады».

Тит ве онынъ ишдешлери

¹⁶ Сизлер ичюн Титнинъ юрегине бойле гъайретни берген Аллагъа шукюр олсун!

¹⁷ Мен онъа риджа эткен олсам да, о озь истегинен ве буюк гъайретнен сизинъ янынъызгъа кетти.

¹⁸ Онен берабер бир дин къардашымызны да ёлладыкъ. Оны Къуванчлы Хаберни даркъаткъаны ичюн бутюн иманлыларнынъ джемиетлеринде макътайлар.

¹⁹ Бундан гъайры, иманлылар джемиетлери озьлери оны сайладылар. О, бу хайырлы иште бизге ярдым эте. Раббини шуретлемек ичюн, биз бирликте бу ишни озь истегимизнен япамыз

²⁰ ве, бизге ишанып берильген бу бахшышларнен не япкъанымызда ич кимсе бизни къабаатламасын деп, мукъайт оламыз.

²¹ Биз тек Раббининъ огюнде дегиль, адамларнынъ огюнде де догъру ишлер япмагъа арекет этемиз.

²² Оларнен берабер биз даа бир къардашымызны ёлладыкъ. О, чокъ кере тюрлю алларда сыналды ве гъайретини косьтерди. Шимди онынъ гъайрети даа зияде, чюнки сизлерге пек буюк ишанчы бар.

²³ Тит акъкъында айткъанда, о меним достум ве сизинъ аранъызда чалышкъан ишдешим. Башкъа къардашларымыз – иманлылар джемиетлерининъ эльчилери ве Месихнинъ шуретидир.

²⁴ Шунынъ ичюн, джемиетлер огюнде севгинъизни ве сизни макътагъанымызны керчек олгъаныны косьтеринъиз.