2 Коринтлилерге 11 - Мукъаддес Китап

Павел ве яланджы эльчилер

¹ Умют этем ки, сиз бир къач акъылсыз сёзлериме сабыр этерсиз! Бираз сабыр этинъиз.

² Мен сизлер акъкъынъызда Алла киби къасевет этем, чюнки мен сизлерни Месихке, бир акъайгъа киби, нишанладым ве сизни Онъа темиз къыз оларакъ бермеге истейим.

³ Амма къоркъам ки, йылан айнеджиликнен Аваны алдаткъаны киби, сизинъ фикирлеринъиз де бозулып, Месихнинъ артындан адийликнен ве темизликнен юрмектен вазгечеджексинъиз.

⁴ Адамлар сизге келип, Иса акъкъында башкъа шейлерни, биз сизге бильдирмеген шейлерни икяе эткенде, я да сизлер алгъан Рухтан башкъа бир рухны алгъанда, я да къабул эткен Къуванчлы Хаберден башкъа бир хаберни эшиткенде, сиз шуны, яхшы шейни киби, къабул этесинъиз!

⁵ Мен ойле «буюк эльчилер»ден ич бир шейде къалмайым, деп тюшюнем.

⁶ Мен сёзге уста олмасам да, бильгиде джаиль дегилим. Буны биз сизлерге эр тарафтан ачыкъ косьтердик.

⁷ Алланынъ Къуванчлы Хаберини сизлерге бедава огреткенимде, сизлерни юксельтмек ичюн озюмни алчакълаштыргъанымда, бельки мен гуна япкъандырым?

⁸ Сизлерге хызмет этмек ичюн, башкъа иманлыларнынъ джемиетлеринден акъча ярдымыны ала эдим.

⁹ Аранъызда олып, мухтадж олгъанымда да, ич кимсеге юк олмадым. Манъа керекли эр шейни Македониядан кельген дин къардашлар бердилер. Ич бир шейде сизлерге юк олмамагъа тырыша эдим ве даа тырышырым.

¹⁰ Озюмдеки Месихнинъ акъикъаты иле айтам: Ахая мемлекетинде ич кимсе бу макътавны менден тутып аламаз.

¹¹ Не ичюн ойле япам? Сизлерни севмегенимденми? Алла биле ки, мен сизни севем!

¹² Лякин бизнен бир олгъанына макътанмагъа ёл къыдыргъан адамларгъа имкян бермемек ичюн, мен не япкъан олсам, шуны келеджекте де япаджагъым.

¹³ Бойле адамлар – яланджы эльчилер, алдатыджы хызметчилер, озьлерине Месих эльчилери деп, яландан косьтерелер.

¹⁴ Бунынъ шашыладжакъ шейи ёкъ: Шейтаннынъ озю ярыкъ мелегининъ къыяфетини ала.

¹⁵ Демек, Шейтаннынъ хызметчилери акъикъат хызметчилерининъ къыяфетини алсалар, шашмагъа керекмей. Лякин оларнынъ сонъу япкъанларына коре оладжакъ.

Павел чеккен азаплар

¹⁶ Даа шуны айтам: ич бир адам мени акъылсыз деп саймасын. Эгер ойле сайсанъыз, ич олмадым, мени, акъылсызны къабул эткенлер киби, къабул этинъиз, бираз макътанайым!

¹⁷ Шимди айтаджакъ сёзлерим Раббининъ айткъаны дегиль. Макътанчакълыкъ ниетинде, акъылсыз бир адам киби айтаджагъым.

¹⁸ Чокъусы бу дюньяда макътаналар, шунынъ ичюн мен де макътанырым.

¹⁹ Сизлер акъыллы олып, акъылсызларгъа къатланасынъыз!

²⁰ Бирде-бири сизни къул япкъанда, акъкъынъызны ашагъанда, мал-мулькюнъизни чайпап алгъанда, озюни юксек туткъанда, сизлер бунъа даянасыз.

²¹ Утанып айтам, бизим бойле ишлерге кучюмиз етмез эди! Бойлеликнен, эгер бир адам бир шейде макътанмагъа истесе – акъылсыз адам киби айтам – о вакъытта мен де макътанырым.

²² Олар еудийми? Мен де еудийим. Олар исраиллими? Мен де исраиллим. Олар Ибраим несилинденми? Мен де Ибраим несилинденим.

²³ Олар Месихнинъ хызметчилерими? Мен акълымны джойгъан киби айтам: мен олардан буюгим! Иш десенъиз, мен олардан чокъ чалыштым. Зиндан десенъиз, олардан чокъ зинданда яттым. Котек десенъиз, мен олардан чокъ котек ашадым, атта чокъ кере олюмге якъын олдым.

²⁴ Еудийлер тарафындан беш кере отуз докъузар къамчы ашадым.

²⁵ Мени учь кере таякънен, бир кере ташнен котекледилер, учь кере гемиде къазагъа огърадым, бир гедже ве бир кунь ачыкъ денъизде къалдым.

²⁶ Чокъ кере ёлгъа чыкъа эдим. Озенлерде, айдутлардан, сойдашларымдан да, башкъа миллетлерден де телюкеде къалдым. Шеэрде телюке, сахрада телюке, денъизде телюке, ялан агъа-къардашлар арасында телюкеге огърадым!

²⁷ Агъыр иш яптым ве чокъ чекиштим, чокъ юкъусыз гедже корьдим, ачлыкъ ве сувсузлыкъ чектим, чокъ кере аштан-сувдан вазгечтим, сувукъ авада индже урбада юрдим.

²⁸ Бундан гъайры мен айтмагъан башкъа шейлерге бакъмадан, мени бутюн иманлылар джемиетине олгъан куньделик къасеветим баса.

²⁹ Эгер бир адам такъаттан тюшсе, мен де такъаттан тюшем! Бирев ёлдан урулса, юрегим яна!

³⁰ Эгер макътанмакъ манъа керек олса, озь къуветсизлигимнен макътанам.

³¹ Эбедиен шуретли Алла, Рабби Исанынъ Бабасы биле ки, мен ялан айтмайым.

³² Мына, Дамаскта виляет башлыгъы Аретас падиша, мени якъаламакъ ичюн, шеэр къапусына къаравул къойды. Амма мени сепет ичинде дивардаки пенджереден тюшюрдилер, ве мен онынъ къолундан къачып къуртулдым.