1 Юхан 3 - Мукъаддес Китап

¹ Бакъынъыз, биз «Алланынъ балалары» адландырылайыкъ деп, Баба бизге не къадар буюк севги косьтерди! Керчектен де, биз Онынъ балаларымыз! Лякин дюнья бизни танымай, чюнки о, Бабаны танымагъан.

² Севгили достларым, шимди биз Алланынъ балаларымыз! Лякин келеджекте не оладжагъымыз шимди даа белли дегиль. Биз тек шуны билемиз ки, О, пейда олгъанда, биз Онъа ошайджакъмыз, чюнки Оны, О олгъаны киби, кореджекмиз.

³ О, насыл элял олса, Онъа бойле умют багълагъан эр бир адам да эляллана.

⁴ Гуна япкъан эр бир адам Къанунны боза. Гуна – къанунсызлыкъ демектир.

⁵ Сиз билесиз ки, Иса бизим гуналарымызны бойнуна алып кетмек ичюн пейда олды ве Онда ич бир гуна ёкъ.

⁶ Онда булунгъан эр бир адам гуна ичинде яшамай. Гуна ичинде яшагъан эр бир адам исе Оны корьмеген ве Оны бильмеген.

⁷ Балалар, кимсе сизни ёлдан урмасын! О насыл адалетли олса, догъру япкъан адам да о къадар адалетлидир.

⁸ Гуна ичинде яшагъан адам – Шейтандандыр. Шейтан башындан берли гуна япып тура. Алланынъ Огълу исе Шейтаннынъ ишлерини ёкъ этмек ичюн пейда олды.

⁹ Алладан догъулгъан эр ким гуна ичинде яшамай, чюнки онынъ ичинде Алланынъ урлугъы къала. О, гуна ичинде яшап оламай, чюнки о, Алладан догъулгъан.

¹⁰ Алланынъ балалары да, Шейтаннынъ балалары да бундан билине: догъру япмагъан эр ким, эм де озь агъа-къардашыны севмеген эр ким Алладан дегиль.

Бири-биринъизни севинъиз

¹¹ Башындан сиз эшиткен хабер бойледир: бири-биримизни севейик!

¹² Хаинге ошамайыкъ. О, ямандан эди ве озь къардашыны ольдюрди. Къардашыны не ичюн ольдюрди? Чюнки онынъ ишлери яман, къардашынынъ ишлери исе догъру эди.

¹³ Агъа-къардашларым, эгер дюньянынъ сизни кореджек козю олмаса, шашманъыз.

¹⁴ Биз олюмден яшайышкъа кечкенимизни билемиз, чюнки биз агъа-къардашларымызны севемиз. Озь агъа-къардашларыны севмеген адам исе олюмде къалыр.

¹⁵ Озь агъа-къардашыны кореджек козю олмагъан эр бир адам – башкъасыны ольдюрген адамдыр. Башкъасыны ольдюрген ич бир адамда исе эбедий омюр булунмагъаныны билесинъиз.

¹⁶ Иса бизлер ичюн озь джаныны берди, бундан биз севгини бильдик. Биз де агъа-къардашларымыз ичюн джанымызны бермеге борджлумыз.

¹⁷ Эгер бир адамда бу дюньянынъ зенгинликлери олса, ве о, озь агъа-къардашыны ёкъсуллыкъта олгъаныны корип, юрегини таш киби япса, бу адамда Алланынъ севгиси насыл этип ер аладжакъ?

¹⁸ Балалар, севгимизни сёзлернен я да тильнен дегиль, акъикъат ве ишлеримизнен косьтерейик.

Алланынъ огюнде юрегимиз раат

¹⁹ Бойлеликнен, биз акъикъат ичинде олгъанымызны биледжекмиз, ве Онынъ алдында виджданымыз раат оладжакъ.

²⁰ Эгер виджданымыз бизни къабаатласа, виджданымыздан Алла устюндир; О, эр шейни биле.

²¹ Севгили достларым, эгер виджданымыз бизни къабаатламаса, Алланынъ алдында джесюр олурмыз,

²² ве Ондан нени сорасакъ, Ондан алырмыз, чюнки биз Онынъ эмирлерини беджерип, Оны мемнюн эткен ишлерни япамыз.

²³ Онынъ эмири исе – Онынъ Огълу Иса Месихнинъ Адына инанмакъ ве, О бизге буюргъаны киби, бири-биримизни севмектир.

²⁴ Онынъ эмирлерини беджерген адам Аллада булуна, Алла да онда булуна. О, бизге Рухны бергени ичюн, О, ичимизде яшагъаныны билемиз.