1 Тимотейге 5 - Мукъаддес Китап

Иманлылар джемиети огюнде вазифелер акъкъында

¹ Акъсакъалны сёгме, онъа, бабанъа киби, насиат бер. Яшларгъа – къардашынъа киби,

² къарт апайларгъа – ананъа киби, яш къызларгъа – къызкъардашынъа киби, бутюн темизликнен насиат бер.

³ Акъикъий тул къадынларны урьмет эт.

⁴ Амма тул къадыннынъ балалары я да торунлары олса, олар башта озь къорантасыны урьмет этмеге ве ана-бабасыны саймагъа огренсинлер. Буны Алла истей.

⁵ Акъикъий тул ве ялынъыз къалгъан къадын Аллагъа ишана, гедже-куньдюз дува окъуй ве ялвара.

⁶ Амма кейф чатып яшагъан тул къадын тири олгъанда биле олюдир.

⁷ Туллар къабаатсыз олсунлар деп, оларгъа буны буюр.

⁸ Ким исе озь сой-сопларыны, хусусан къоранта азаларыны бакъмаса, о, имандан вазгечкен, имансыздан да бетердир.

⁹ Ярдымны алмакъ ичюн сайланаджакъ тул къадын тек бир кере эвленген, озь акъайына садыкъ ве алтмыш яшындан буюк олсун.

¹⁰ Бу къадын яхшы ишлеринен белли, балаларны осьтюрген, мусафирлерни къабул эткен, азизлернинъ аякъларыны ювгъан, белягъа огърагъанларгъа ярдым эткен эм де хайырлы ишлерде гъайрет косьтерген къадын олмакъ керек.

¹¹ Яш тул къадынларны сайлама. Оларнынъ беден истеклери оларны Месихтен узакълаштыргъанда, олар акъайгъа чыкъмагъа истейлер.

¹² Бойле этип, олар эвельден берген вадесини бозалар ве къабаатлы олалар.

¹³ Бундан гъайры эвден эвге кезгенде, тенбель олмагъа огренелер. Олар тек тенбель дегиль, даа ошекчи олып, башкъаларнынъ ишине киришип, керек олмагъан шейлерни айталар.

¹⁴ Шу себептен мен буны истейим: яш тул къадынлар акъайгъа чыкъсынлар, бала тапсынлар, эвлерини бакъсынлар, бойле этип, душмангъа яман лаф айтмагъа ич бир фырсат бермесинлер.

¹⁵ Базылары энди ёлдан урулып, Шейтаннынъ артындан кеттилер.

¹⁶ Эгер бир иманлы адамнынъ тул къалгъан сой-соплары олса, оларгъа озю ярдым этсин, оларны иманлылар джемиетине юклемесинлер. О вакъыт иманлылар джемиети керчектен тул къалгъан къадынларгъа ярдым этип олур.

¹⁷ Иманлылар джемиетине яхшы башлыкъ олгъан адамлар, хусусан Сёзни даркъаткъан ве огреткен акъсакъаллар эки къат урьметке ляйыкъ олсунлар.

¹⁸ Языда: «Арман баскъан бугъанынъ агъзыны къапатма» ве «Ишчи озь къазанчына ляйыкътыр», – деп язылгъан.

¹⁹ Эки я да учь шаат олмаса, акъсакъалгъа къоюлгъан ич бир къабаатны къабул этме.

²⁰ Гунада яшагъанларны эписининъ огюнде къабаатла, башкъалар да къоркъсун.

²¹ Алланынъ огюнде, Иса Месихнинъ ве сайлангъан мелеклернинъ огюнде сени тенбиелейим: фаркъ этмейип, буларны бутюнлей сакъла, ич бир шейни айырмайып, эписини яп.

²² Бирде-бир адамнынъ башына къол къоймагъа (ве бойле этип, оны джемиетнинъ бакъыджысы я да хызметчиси япмагъа) ашыкъма, башкъаларнынъ гуналарына къошулма, озюнъни темиз-пак сакъла.

²³ Сувдан гъайры, ашкъазанынъ ве сыкъ хасталыкъларынъ ичюн бираз шарап ич.

²⁴ Базыларнынъ гуналары белли олып, адамларны къабаатланувгъа алып баралар. Башкъаларынынъ гуналары исе сонъунда белли олур.

²⁵ Хайырлы ишлер де беллидир, белли олмагъан сойлары да гизли къалмаз.