1 Тессалоникелилерге 2 - Мукъаддес Китап

Павелнинъ Тессалоникеде хызмети

¹ Дин къардашларым, бизим сизге кельгенимиз бошуна олмагъаныны озюнъиз билесиз.

² Сиз бильгенинъиз киби, ондан эвель Филиплер шеэринде азап чектик ве акъаретлендик, амма Алланынъ Къуванчлы Хаберини сизлерге буюк къаршылыкъ ичинде бильдирмек ичюн, Алламызда джесарет таптыкъ.

³ Бизим насиатымызда не хата, не яман ниет, не ялан бар,

⁴ амма, Алла бизни сынагъаны ве Къуванчлы Хаберни бизге ишанып бергени ичюн, биз адамларнынъ разылыгъыны дегиль, аксине, бизим юреклеримизни сынагъан Алланынъ разылыгъыны къазанмакъ ичюн хабер этемиз.

⁵ Сиз яхшы билесинъиз: биз ич бир вакъыт ялтакъланмай эдик, ачкозь ниетлеримиз де ёкъ эди. Алла бунъа шааттыр!

⁶ Биз не сизлернинъ, не башкъаларнынъ, – ич бир адамнынъ макътавыны къыдырмай эдик.

⁷ Месихнинъ эльчилери оларакъ, алдынъызгъа озь истеклеримизнен кельмеге акъкъымыз бар эди, амма биз сизинъ аранъызда уфакъ балалар киби ола, озь балаларыны яхшы бакъкъан анагъа ошай эдик.

⁸ Бойле этип, сизлерге о къадар гонъюль багъладыкъ, тек Алланынъ Къуванчлы Хаберини дегиль, озь джанымызны да бермеге бахтлы эдик, чюнки сизлерни пек севдик.

⁹ Агъа-къардашлар, сиз бизим агъыр ишимизни ве къыйынлыкъларымызны мытлакъа унутмадынъыз: сизинъ ич биринъизге агъыр кельмесин деп, биз гедже-куньдюз чалышып, сизге Алланынъ Къуванчлы Хаберини бильдире эдик.

¹⁰ Биз сизнен, иманлыларнен, темиз, инсафлы ве къабаатсыз олып арекет эте эдик. Бунъа сиз де, Алла да шааттыр,

¹¹ чюнки сиз билесиз: баба озь балаларыны киби, биз де эр биринъизни

¹² тенбиелей эдик, Озь Падишалыгъына ве шуретине сизлерни чагъыргъан Алланынъ разылыгъыны къазанмагъа инандыра ве ялвара эдик.

¹³ Шунынъ ичюн биз токътамайып Аллагъа шукюр этемиз ки, сизлер бизден Алланынъ Сёзюни эшиткенинен, оны инсан сёзю киби дегиль, Алланынъ Сёзю оларакъ къабул эттинъиз. Бу хабер акъикъатен Алланынъ Сёзюдир, ве о, сизлерде, инангъанларда, арекет эте.

¹⁴ Бойле этип, сизлер, дин къардашларым, Еудиедеки Иса Месихке инангъан Алланынъ джемиетлерине ошадынъыз. Олар еудийлерден насыл азап чеккен олса, сизлер де озь юртдашларынъыздан шойле азаплар корьдинъиз.

¹⁵ Еудийлер Рабби Исаны ве пейгъамберлерни ольдюрдилер, бизни де къувдылар. Олар Алланынъ разылыгъыны къыдырмайлар ве бутюн адамларгъа къаршы чыкъалар,

¹⁶ бизге башкъа халкъларнен лаф этмеге, шу халкъларгъа къуртулмагъа ёл бермейлер ве, бойледже, озь гуналарынынъ ольчюсини арттыралар. Лякин ахыр-сонъу Алланынъ гъазабы башларына тюшти.

Павелнинъ шурети ве къуванчы

¹⁷ Агъа-къардашлар, къыскъа бир вакъыт ичинде сизлерден – юрегимизнен олмаса да, беденимизнен – айры олгъанымызда, сизинъ бетлеринъизни корьмеге даа чокъ истей эдик.

¹⁸ Шунынъ ичюн сизлерге бармагъа истедик (мен, Павел – бир къач кере истедим), лякин Шейтан бизге ёл ачмады.

¹⁹ Раббимиз Иса къайткъан куню Онынъ огюнде олгъанымызда, сиз олмайып, бизим умютимиз, къуванчымыз ве биз макътайджакъ таджымыз ким оладжакъ?

²⁰ Эбет, бизим шуретимиз ве къуванчымыз – сизлерсинъиз!