1 Падишалар 8 - Мукъаддес Китап

Халкъ Смаилден падиша истей

¹ Смаил къартайгъандан сонъ, о, озь огъулларыны Исраильге къадылар япты.

² Биринджи догъгъан огълунынъ ады Ёэль, экинджисининъ ады Авия эди. Олар Беэр-Шева шеэринде къадылар олды.

³ Лякин олар догъру ёлдан урулдылар, озь файдасыны къыдырып, бахшышлар алдылар ве янълыш суд эттилер.

⁴ Исраильнинъ эписи акъсакъаллары топлашып, Рамагъа Смаилге кельдилер

⁵ ве онъа: – Мына сен энди къартайдынъ, огъулларынъ исе догъру ёлдан урулдылар. Бойлеликнен, бизге падиша бер. Башкъа халкъларда олгъаны киби, о, бизге ёлбашчылыкъ япсын, – дедилер.

⁶ Смаил оларнынъ «Бизге падиша бер, о бизге ёлбашчылыкъ этсин», деген сёзлерини пек бегенмеди ве РАББИге дувалар окъуп башлады.

⁷ РАББИ Смаилге: – Халкъ санъа не десе де, оларны динъле. Олар сени дегиль де, Меним падишалыгъымны ред эттилер.

⁸ Мен оларны Мысырдан чыкъаргъан куньден берли япкъан ишлерини шу куньге къадар япып келелер, Мени къалдырып, башкъа аллаларгъа хызмет этелер. Санъа да бойле япалар.

⁹ Бойлеликнен, оларны динъле, лякин сакъындыр, идаре этеджек падишанынъ оларгъа бутюн япаджакъларыны беян эт.

¹⁰ Смаил, «бизге падиша бер», деп талап эткен халкъкъа РАББИнинъ эписи сёзлерини текрарлап,

¹¹ бойле деди: – Сизлерге падишалыкъ этеджек падиша бойле шейлер япаджакъ: огъулларынъызны алып, озь дженк арабаларына ве атлылары арасында къояджакъ, ве олар къаравул оларакъ онынъ дженк арабалары огюнде чападжакълар.

¹² Бир къач огъулларынъызны озюне бинъбашы ве эллибашы этип къояджакъ. Дигер огъулларынъыз онынъ тарлаларыны сюреджеклер ве ашлыкъларыны ораджакълар. Башкъаларыны исе, аскер силяларыны ве дженк араба алетлерини япсынлар деп, къояджакъ.

¹³ Къызларынъызны да, мельэм япсын, аш ве отьмек пиширсинлер деп, аладжакъ.

¹⁴ Сизинъ энъ яхшы тарла, юзюм багъча ве зейтюн багъчаларынъызны алып, озь хызметчилерине береджек.

¹⁵ Сизинъ джыйгъан ашлыкъ ве юзюм махсулларынъызнынъ он пайда бир пайыны озюне аладжакъ да, озь хызметчи ве везирлерине береджек.

¹⁶ Къулларынъызны, энъ яхшы йигитлеринъизни де алып, озь ишлеринде ишлетеджек.

¹⁷ Къой-эчкилеринъизнинъ он пайда бир пайыны озюне аладжакъ, озьлеринъиз де онъа хызметчи оладжакъсынъыз.

¹⁸ Сонъра озюнъизге сечип алгъан падишанынъ зорбалыгъындан инъильдеп башларсынъыз. РАББИ исе шу куню сизге джевап бермез.

¹⁹ Халкъ Смаилнинъ сёзлерини динълемеге разы олмады ве: – Ёкъ, бизим падишамыз олсун, – деди.

²⁰ – Биз де башкъа миллетлер киби олайыкъ: падишамыз бизни суд этсин, огюмизде юрсюн, бизим дженклеримизде башлыкъ япсын, – дедилер.

²¹ Смаил халкънынъ эписи сёзлерини динълеп, оларны РАББИге айтып берди.

²² РАББИ Смаилге: – Оларны динъле ве оларгъа падиша къой, – деди. Смаил исраиллилерге: – Эпинъиз озь шеэрлеринъизге къайтынъыз, – деди.