1 Падишалар 5 - Мукъаддес Китап

Васиет Сандыгъы – фелестинлилер ичюн лянет

¹ Фелестинлилер Алланынъ Сандыгъыны алдылар ве оны Эвен-Хаэзерден Ашдодгъа кетирдилер.

² Алланынъ Сандыгъыны алып, Дагон путханесине кирсетти ве оны Дагон путнынъ янына къойдылар.

³ Эртеси куню ашдодлылар саба турып, бакъсалар, Дагон ерге авдарылып, РАББИнинъ Сандыгъы огюнде ята. Олар Дагонны алып, кене озь ерине къойдылар.

⁴ Эртеси куню кене саба турып, бакъсалар, Дагон ерде бети устюнде РАББИнинъ Сандыгъы огюнде авдарылып ята. Дагоннынъ башы ве къоллары парчаланып, босагъада айры-айры яталар, Дагоннынъ тек кевдеси къалгъан.

⁵ Шунынъ ичюн Дагонгъа табынгъан руханийлер ве Ашдод путханесине кельгенлер бугуньге къадар Дагон путханесининъ босагъасыны басмайлар.

⁶ РАББИ ашдодлыларгъа пек гъазапланды. Ашдодда ве этрафларында яшагъанларны къырып, оларны азап кетирген шишиклернен джезалады.

⁷ Ашдодлылар бойле шей олгъаныны корип: – Исраиль Алласынынъ Сандыгъы бизде къалмасын, чюнки Онынъ гъазабы бизге де, бизим алламыз Дагонгъа да пек къатты тие, – дедилер.

⁸ Бутюн Фелестин башлыкъларыны чагъыртып топладылар ве: – Исраиль Алласынынъ Сандыгъына не япайыкъ? – деп сорадылар. – Исраиль Алласынынъ Сандыгъы Гъаткъа кечсин, – деп джевап бердилер олар. Сонъ Исраиль Алласынынъ Сандыгъыны алып, Гъаткъа кетирдилер.

⁹ Оны анда кетирген сонъ, РАББИ Гъат шеэрине пек гъазапланды – дешетли къоркъунен къоркъузды, ве Гъат сакинлерининъ, кучюк олсун, буюк олсун эписининъ беденлеринде азаплы шишиклер пейда олды.

¹⁰ Олар Алланынъ Сандыгъыны Экронгъа йибердилер. Алланынъ Сандыгъы Экронгъа кельген сонъ, экронлылар яйгъара къопарды ве: – Исраиль Алласынынъ Сандыгъыны мында кетирип, бизни ве бизим халкъымызны ольдюрмек истейлер, – дедилер.

¹¹ Бутюн Фелестин башлыкъларыны чагъыртып топладылар ве: – Исраиль Алласынынъ Сандыгъыны къайтарып йиберинъиз. Алла бизни ве халкъымызны ольдюрмесин деп, Сандыкъ озь ерине къайтсын, – дедилер. Шеэрни олюм къоркъусы сарды. РАББИнинъ гъазабы пек къатты эди.

¹² Ольмегенлернинъ беденлерини шишик басты, яйгъаралары тап коклерге барып етти.