1 Падишалар 4 - Мукъаддес Китап

Васиет Сандыгъыны запт этелер

¹ Смаил бутюн исраиллилерге мураджаат этти. Шу заман исраиллилер фелестинлилерге къаршы дженк этмеге чыкътылар ве ордуларыны Эвен-Хаэзерде ерлештирдилер, фелестинлилер исе Афекнинъ янында ерлештилер.

² Фелестинлилер исраиллилернинъ къаршысында сырагъа тизильдилер. Сонъ дженк олды. Фелестинлилер исраиллилерни енъип, уруш мейданында дёрт бинъге якъын адам ольдюрдилер.

³ Аскерлер ордугъа къайтып, Исраиль акъсакъаллары: – РАББИ бугунь бизни фелестинлилерге не ичюн енъдирди? Шилодан озюмизге РАББИнинъ Васиет Сандыгъыны алайыкъ да, о бизнен олсун ве душманларымызнынъ къолундан къуртарсын, – дедилер.

⁴ Аскерлер Шилогъа адамлар йибердилер ве андан Керувлар Устюнде Отургъан РАББИнинъ, Ордулар Алласынынъ Васиет Сандыгъыны кетирдилер. Элийнинъ эки огълу Пинехас ве Хофний де Алла Сандыгъынынъ янында эдилер.

⁵ РАББИнинъ Васиет Сандыгъы ордугъа кетирильген сонъ, исраиллилер ойле къычырышып башладылар ки, атта ер титреди.

⁶ Фелестинлилер оларнынъ къычырышкъанларыны эшитти ве: – Еудийлернинъ ордусында не о къадар къычыра экенлер? – дедилер. Сонъ РАББИнинъ Сандыгъы ордугъа кельгени акъкъында хабер алдылар.

⁷ Фелестинлилер къоркъты ве: – Оларнынъ ордуларына Алла кельди, – дедилер. Ве даа: – Башымызгъа беля тюшти! Ич бир вакъыт ойле шей олгъаны ёкъ.

⁸ Бу кучьлю Алланынъ къолундан бизни ким къуртараджакъ? Бу – мысырлыларны сахрада чешит беляларгъа огъраткъан Алладыр.

⁹ Эй, фелестинлилер, еудийлер бизим къолумызда къул олгъанлары киби, оларнынъ къуллары олмамакъ ичюн, къудрет ве джесаретинъизни топланъыз! Джесаретли олунъыз ве оларнен дженк этинъиз! – дедилер.

¹⁰ Фелестинлилер дженк эттилер ве исраиллилерни енъдилер. Эр исраилли озь чадырына къачты. Магълюбиет пек буюк олды, исраиллилернинъ 30 000 пияде аскерлери ольдюрильди.

¹¹ Алланынъ Сандыгъы алынды, Элийнинъ эки огълу да, Хофний ве Пинехас ольдилер.

Элийнинъ олюми

¹² Дженк мейданындан Биньямин къабилесинден бир адам къачып, шу куню Шилогъа етип кельди, урбалары йыртыкъ, устю-башы топракъ эди.

¹³ О кельгенде, Элий ёл кенарында отургъычта отура, чюнки онынъ юреги Алланынъ Сандыгъы ичюн сыкъыла эди. О адам келип, шеэрде хаберни беян эткен сонъ, бутюн шеэр фигъан къопарды.

¹⁴ Элий шу яйгъара сеслерини эшитип: – Не ичюн ойле къычырышалар? – деп сорады. Шу заман о адам янына келип, эр шейни айтты.

¹⁵ Элий о вакъыт докъсан секиз яшында эди, козьлери сёнип, коралмай къалгъан эди.

¹⁶ О адам Элийге: – Мен дженктен кельдим, бугунь уруш мейданындан къачып кельдим, – деди. Элий онъа: – Огълум, не олды? – деди.

¹⁷ Хаберджи онъа: – Исраиллилер фелестинлилерден къачты, халкъ буюк магълюбиетке огърады, пек чокъ аскер эляк олды. Эки огълунъ Хофний ве Пинехас ольдилер. Алланынъ Сандыгъы алынды, – деди.

¹⁸ Хаберджи Алланынъ Сандыгъыны анъгъанда, Элий къапунынъ янындаки отургъычтан аркъасына йыкъылды, бойнуны сындырды ве ольди, чюнки о, пек агъыр ве къарт эди. О, къыркъ йыл девамында Исраильнинъ къадысы олды.

Пинехастан тул къалгъан къадыннынъ олюми

¹⁹ Элийнинъ келини, Пинехаснынъ къадыны, юклю ве мына-мына бала тападжакъ эди. Алланынъ Сандыгъы алынгъаны, къайнатасы ве акъайынынъ олюми акъкъында хаберни эшитип, бирден догъурмагъа башлады, тизлерине йыкъылды ве догъурды.

²⁰ Олюм алында яткъанда, янындаки къадынлар онъа: – Къоркъма, сен огъул таптынъ, – дедилер. О исе кимсеге джевап бермей, къулакъ асмай эди.

²¹ Алланынъ Сандыгъы алынгъаны ве къайнатасынен акъайы ольгени ичюн, Исраильнинъ шаны-шурети гъайып олды, деп, сабийнинъ адыны Икъавод къойды.

²² О: – Алланынъ Сандыгъы алынгъаны ичюн, Исраильнинъ шаны-шурети гъайып олды, – деди.