1 Падишалар 21 - Мукъаддес Китап

Давут къачып кете

¹ Давут Нов шеэрине руханий Ахимелекке кельди. Ахимелек Давутны корип, къоркъты ве Давуттан: – Не ичюн бир озюнъсинъ? Янынъда не ичюн кимсе ёкъ? – деп сорады.

² Давут руханий Ахимелекке: – Падиша манъа бир иш буюрды. «Мен сени не ичюн йибергенимни ве насыл иш буюргъанымны кимсе бильмесин», – деди. Адамларыма мени къайда къаршыламагъа кереклигини анълаттым, – деди.

³ – Энди манъа бир шейлер бер, беш дане отьмек, я да не тапылса, шуны бер, – деди.

⁴ Руханий Давуткъа: – Шимди менде адий отьмек ёкъ, тек азиз отьмегим бар. Эгер акъайларынъ озьлерини къадынлардан узакъ туткъан олсалар, оны ашамагъа мумкюнлер, – деди.

⁵ Давут Руханийге: – Мен эр заман дженкке чыкъкъаным киби, бу кере де янымызда къадынларымыз ёкъ эди. Ёлумыз адий олгъан олса да, генчлеримизнинъ беденлери элял олып къалалар. Бойле бир куньде исе олар даа да зияде темизлигини сакълайлар, – деди.

⁶ Руханий онъа азиз отьмеклерни берди, чюнки РАББИнинъ булунувыны косьтерген пителерден башкъа отьмек ёкъ эди. Олар РАББИнинъ огюнден алынгъан эдилер, оларнынъ ерине исе энди сыджакъ отьмеклер къоюлгъан эди.

⁷ Шу куню о ерде РАББИнинъ огюнде олгъан эдомлы Доэг адлы Шаулнынъ бир хызметчиси, чобанларнынъ башлыгъы бар эди.

⁸ Давут Ахимелекке: – Мында сенде мызракъ я да къылыч ёкъмы экен? Падишанынъ буйругъы аджеле олды, мен озюме не къылыч, не де башкъа бир силя алмадым, – деди.

⁹ Руханий исе: – Мына сен Эла вадийинде ольдюрген фелестинли Гольятнынъ къылычы бар, эфоднынъ артында, кийимге сарылгъандыр. Истесенъ, шуны ал, мында башкъасы ёкъ, – деди. Давут онъа: – Онъа етерли сою ёкътыр, оны манъа бер, – деди.

¹⁰ Давут шу куню Шаулдан къачып, Гъат падишасы Акишке кельди.

¹¹ Акишке онынъ хызметчилери: – Бу Давут анавы топрагъынынъ падишасы дегильми? «Шаул бинълерни енъди, Давут исе – он бинълерни», – деп йырлагъан ве ойнагъанда, Давут акъкъында дегильми экен? – деп сорадылар.

¹² Давут бу сёзлерге дикъкъат этти ве Гъат падишасы Акиштен пек къоркъты.

¹³ Оларнынъ огюнде бетини къыйыштырды, озюни дели киби косьтереджек олып, къапуларда бир шейлер сызды, агъзындан силекейини акъызды.

¹⁴ Акиш хызметчилерине: – Корьмейсизми, о акълыны джойгъан, оны не ичюн манъа кетирдинъиз? – деди.

¹⁵ – Огюмде озюни дели, акъылсыз киби косьтерсин деп, кетирдинъизми? Манъа озюмнинъ делилерим етмегенми? Буны да кетирдинъизми? Оны меним эвиме къойманъыз! – деп айтты.