1 Падишалар 14 - Мукъаддес Китап

Ёнатаннынъ къараманлыгъы

¹ Шаулнынъ огълу Ёнатан озюнинъ силя ташыгъан хызметчисине: – Айды, о тарафтаки фелестинлилернинъ отрядына кечейик, – деди. Бабасына исе бир шей айтмады.

² Шаул шу вакъыт Гиванынъ четинде, Мигрондаки нар терегининъ тюбюнде эди. Онынънен берабер 600 адам бар эди.

³ Анда эфод кийип юрген Ахия да бар эди. Онынъ бабасы Ахитув, эмджеси Икъавод, къартбабасы Пинехас эди. Пинехаснынъ бабасы исе Элий, Шилода РАББИге руханийлик япкъан адам эди. Халкъ Ёнатаннынъ кеткенини бильмей къалды.

⁴ Фелестинлилернинъ отрядына якъынлашмакъ ичюн, Ёнатангъа бир кечюв ёлуны алмакъ керек эди, онда бир тарафта къая, экинджи тарафта да къая бар эди. Бирисининъ ады Парылдагъан, экинджисининъ ады Когемли эди.

⁵ Бир къая шимальден Микмас тарафкъа, экинджиси дженюптен Гевагъа бакъа эди.

⁶ Ёнатан озь силя ташыйыджысына: – Айды, шу сюннетсизлернинъ отрядына кечейик. Бельки РАББИ бизге ярдымджы олур. РАББИ эм чокъ адам ярдымынен, эм аз адам ярдымынен къуртара билир, – деди.

⁷ Силя ташыйыджысы онъа: – Санъа не догъру олып корюнсе, шуны яп. Къайда кетеджек олсанъ, мен де сеннен кетерим, – деди.

⁸ Ёнатан исе: – Шимди биз оларнынъ янына кечип, козь оглеринде токътармыз.

⁹ Эгер олар: «Биз сизге якъынлашмагъандже, токътап турунъыз», – деселер, биз еримизде токътап, оларгъа котерильмемиз.

¹⁰ Эгер де олар: «Бизге котерилинъиз», – деселер, биз котерилирмиз. Бу – РАББИ оларны бизим къолумызгъа теслим эткенининъ алямети олур, – деди.

¹¹ Олар экиси фелестинлилернинъ козю огюнде тургъанда, фелестинлилер: – Мына еудийлер сакъланып отургъан чукъурлардан чыкъалар, – дедилер.

¹² Отряддакилер Ёнатан ве силя ташыйыджысына: – Бизге котерилинъиз, сизге бир шей айтаджакъмыз, – деп къычырдылар. Ёнатан силя ташыйыджысына: – Айды, кеттик, РАББИ оларны Исраиль къолуна теслим этти, – деди.

¹³ Сонъ Ёнатан тырмашып башлады, силя ташыйыджысы да онынъ артындан тырмашты. Ёнатан фелестинлилерни йыкъып башлады, силя ташыйыджысы да оларны ольдюре башлады.

¹⁴ Эки бугъа бир куньде сюрип олгъан тарланынъ ярысында Ёнатан ве онынъ силя ташыйыджысы шу биринджи уджюмде йигирмиге якъын адам ольдюрди.

¹⁵ Тарладаки Фелестин ордусыны шиддетли къоркъу сарып алды. Илери болюклер ве эр ерни дарма-дагъын эткен адамлары къалтырап башлады, бутюн ер титреди, ве эписини Алладан кельген буюк къоркъу къаплады.

Фелестинлилерге къаршы дженк

¹⁶ Биньяминнинъ Гивасындаки Шаулнынъ сакъчылары, фелестинлилернинъ анда-мында къалабалыкъ ичинде дагъылып чапкъаныны корьдилер.

¹⁷ Шаул халкъына: – Адамларымызны топлап, бизнен ким олмагъаныны бакъынъыз, – деди. Бакъып чыкъсалар, Ёнатан ве онынъ силя ташыйыджысы ёкъ.

¹⁸ Шаул Ахиягъа: – Алланынъ Сандыгъыны кетир, – деди. Алланынъ Сандыгъы о вакъыт Исраиль огъулларында эди.

¹⁹ Шаул руханийнен лаф этип тургъанда, фелестинлилернинъ ордусындаки къалабалыкъ даа да артты. Шаул руханийге: – Айды, ишинъни токътат! – деди.

²⁰ Шаул ве онынънен берабер олгъан халкъ къычырып, дженк мейданына кельдилер. Анда фелестинлилер къылычларынен бир-бирлерини ольдюре эдилер; къалабалыкъ пек буюк эди.

²¹ О заман, эвеллери фелестинлилерге къошулгъан ве ордунен берабер эр ерде юрген еудийлер Шаул ве Ёнатаннен олгъан исраиллилерге къошулды.

²² Эфраимлилернинъ дагълы топрагъында сакъланып отургъан исраиллилер, фелестинлилернинъ къачкъаны акъкъында эшитип, дженкке кириштилер.

²³ Шу куню РАББИ исраиллилерни къуртарды, дженк исе Бет-Авенгедже узанды.

²⁴ Исраиль халкъы о куню пек ёрулды. Шаул исе: – Ким бугунь кунеш батмаздан эвель ве мен душманларымдан акъкъымны алмаздан эвель бир шей ашаса, лянет олсун, – деп, халкъны емин эттирди. Ве кимсе бир шей ашамады.

Дженктен сонъ олып кечкен вакъиалар

²⁵ Бутюн халкъ ормангъа кетти. Анда бир аланчыкъта бал бар эди.

²⁶ Халкъ ормангъа киргенде: – Мына, бал акъа, – деди. Лякин кимсе къолуны биле узатмады, чюнки халкъ еминден къоркъа эди.

²⁷ Ёнатан исе бабасынынъ сёзлерини эшитмеген эди. Элиндеки таягъыны узатып, балгъа тыкъты, агъзына узатты ве къапты, шу ань такъаты кельди.

²⁸ Халкътан бириси онъа: – Бабанъ: «Ким бугунь аш ашаса, лянет олсун», – деди, шунынъ ичюн халкъ пек ёрулды, – деди.

²⁹ Ёнатан: – Бабам эр кеске беля кетирди. Бакъынъыз, шу балдан бир парча ашагъан сонъ, такъатым кельди.

³⁰ Эгер халкъ бугунь душманларындан не тапып ашагъан олса, фелестинлилернинъ магълюбиети даа да бетер олмаз эдими? – деди.

³¹ О куню халкъ фелестинлилерни Микмастан Аялонгъа къадар къувып ольдюрди ве зияде ёрулды.

³² Бундан сонъ халкъ дженктен тюшкен авгъа атылып, къой-эчкилер, туварлар, бузав-таналарны алып, ерге серип соя ве къанынен берабер ашай башладылар.

³³ Буны Шаулгъа еткиздилер: – Мына, халкъ РАББИ огюнде гуна къазана, этни къанынен берабер ашай, – дедилер. Шаул: – Сиз Аллагъа къаршы джинает яптынъыз. Манъа шу дакъкъасы бир балабан таш юварлатып кетиринъиз, – деди.

³⁴ Сонъ Шаул: – Халкъ арасында юрип беян этинъиз: эр кес озь бугъасыны, озь къоюны мында кетирип, ташта сойсун ве ашасын. РАББИнинъ огюнде гуна къазанмасын, къанынен берабер ашамасын, – деди. Геджеси эр кес озь бугъасыны кетирип, озь къолунен сойды.

³⁵ Шаул исе РАББИге къурбан чалгъан ерни къурды. Бу онынъ тарафындан РАББИге къурулгъан биринджи къурбан ери олды.

³⁶ Шаул: – Геджеси фелестинлилернинъ пешинден къувайыкъ, сабагъадже оларнынъ эр бир шейини тартып алайыкъ, бирисини сагъ къалдырмайыкъ, – деди. Онъа: – Санъа не яхшы олып корюнсе, шуны яп, – дедилер. Руханий исе: – Аллагъа мураджаат этейик, – деди.

³⁷ Шаул Алладан: – Фелестинлилернинъ пешинден къувайыкъмы? Оларны Исраиль къолуна теслим этеджексинъми? – деп сорады. Амма Алла шу куню онъа джевап бермеди.

³⁸ О заман Шаул: – Халкънынъ бутюн ёлбашчылары мында кельсин ве гуна кимнинъ устюнде олгъаныны сорап бильсин.

³⁹ Исраильни къуртаргъан Алланен ант этем! Гуна огълум Ёнатаннынъ устюнде олса биле, о да мытлакъа олер, – деди. Лякин халкънынъ арасындан онъа кимсе джевап бермеди.

⁴⁰ Сонъ Шаул бутюн исраиллилерге: – Сизлер бир тарафта тизилинъиз, мен ве огълум Ёнатан исе дигер тарафта турайыкъ, – деди. Халкъ онъа: – Санъа не догъру олып корюнсе, шуны яп, – деди.

⁴¹ Шаул: – Я РАББИ! Исраильнинъ Алласы! Догъру джевап бер, – деди. Къабаат Шаулнен Ёнатангъа косьтерильди, халкъ исе гунасыз олып чыкъты.

⁴² Шаул: – Меним я да огълум Ёнатаннынъ къабаатыны косьтер, – деди. Къабаат Ёнатангъа костерильди.

⁴³ Шаул Ёнатангъа: – Айт, не яптынъ? – деди. Ёнатан эр шейни айтып берди: – Мына, элимдеки таякънен бираз бал ашадым. Энди ольмек кереким, – деди.

⁴⁴ Шаул: – Ёнатан, эгер сен бугунь ольмесенъ, Алла бойнумны урсун, – деди.

⁴⁵ Лякин халкъ Шаулгъа: – Исраильге бойле буюк къуртулыш кетирген Ёнатан не ичюн оледжек? Олмайджакъ шей! Тири Алланен ант этемиз: онынъ башындан бир сач биле тюшмейджек, чюнки о, Алланынъ ярдымынен иш тутты, – деди. Шу куню халкъ Ёнатанны къорчалады, ве о ольмеди.

⁴⁶ Сонъ Шаул фелестинлилернинъ пешинден къувмады, ве фелестинлилер озь ерлерине къайттылар.

Шаулнынъ дженк къараманлыгъы

⁴⁷ Шаул Исраильнинъ падишасы олгъан сонъ, эр тарафтаки душманларынен дженклешти: Моавнен, аммонлыларнен, Эдомнен, Цова падишаларынен, фелестинлилернен де дженклешти. Кимге къаршы чыкъмасын, эписини енъди.

⁴⁸ Шаул джесаретли дженклешти, амалеклилерни енъди ве Исраильни дарма-дагъын эткен адамлардан къуртарды.

⁴⁹ Шаулнынъ огъуллары Ёнатан, Йишвий ве Малкий-Шуа эдилер. Онынъ даа эки къызы бар эди: буюги – Мерав ве кичиги – Микъал.

⁵⁰ Шаулнынъ апайы – Ахимаац къызы Ахиноам, ордусынынъ башы – Шаулнынъ эмджеси Нернинъ огълу Авнер эди.

⁵¹ Шаулнынъ бабасы Киш ве Авнернинъ бабасы Нер Авиэлнинъ огъуллары эдилер.

⁵² Шаулнынъ бутюн падишалыгъы заманында фелестинлилерге къаршы токътамадан дженк кетти. Шаул бирде-бир къараман ве джесаретли адам корьсе, оны озюне алды.