1 Коринтлилерге 9 - Мукъаддес Китап

Эльчининъ акъ-укъукълары

¹ Мен азат дегилимми? Мен эльчи дегилимми? Раббимиз Иса Месихни корьмедимми? Рабби ёлунда япкъан ишимнинъ махсуллары сизлер дегильсинъизми?

² Эгер башкъалары ичюн эльчи олмасам, керчектен де, сизлер ичюн мен эльчидирим. Сизлернинъ Раббиге иманнен яшайышынъыз меним эльчи олгъанымны тасдыкълай.

³ Мени соргъу япкъанларгъа бойле джевап берерим.

⁴ Бизим ишимиз ичюн аш ве сув алмагъа акъкъымыз ёкъмы?

⁵ Башкъа эльчилер, Раббининъ къардашлары ве Кифа ёлгъа чыкъып, озь иманлы апайларыны янларына алалар. Бизим де бойле акъкъымыз ёкъмы?

⁶ Я да тек мен ве Барнаба ашымызны чалышып къазанмакъ керекмизми?

⁷ Аскерге хызмети ичюн керек шейни берелер. Юзюм сачкъан адам юзюм ашай. Сюрю отлаткъан адам исе сют иче.

⁸ Бельки мен буны тек адам тюшюнджесине коре айтаммы? Лякин Къанун да шуны айта!

⁹ Мына, Мусанынъ Къанунында: «Арман баскъан бугъанынъ агъзыны къапатма», – деп язылгъан. Мында Алланынъ къасевети бугъалар акъкъындамы?

¹⁰ Эльбетте, бу шейлернинъ эписи бизлер ичюн айтылгъан! Булар биз ичюн язылгъан. Тарланы сюрген адам умютнен сюрмек керек, арман чеккен адам да озь акъкъыны алмакъ умютнен чалышмакъ керек.

¹¹ Биз аранъызда Рухнынъ урлукъларыны сачкъан сонъ, сизлерден беден ичюн берекет алсакъ, адалетсиз олурмы?

¹² Эгер башкъаларнынъ сизлерден файдаланмакъ акъкъы олса, бизим акъкъымыз даа чокъча дегильми? Амма биз бу акътан файдаланмадыкъ. Аксине, Месихнинъ Къуванчлы Хаберине кедер этмесин деп, эр шейге сабыр этип юремиз.

¹³ Алланынъ Сарайында хызмет эткен руханийлер андан аш алып ашагъанларыны бильмейсинъизми? Къурбан еринде хызмет эткенлер къурбанлардан бир пайыны алгъанларыны бильмейсинъизми?

¹⁴ Бойлеликнен, Рабби бойле буюрды: Къуванчлы Хаберни даркъаткъанлар ондан алгъан берекетинен яшасынлар.

¹⁵ Амма мен бу акъларнынъ ич биринден файдаланмадым. Эм манъа бойле япылсын деп, буны язмадым. Бедава огреткенимден макътанмагъа чарем олмаса, ольгеним яхшыдыр!

¹⁶ Амма мен Къуванчлы Хаберни даркъаткъанымнен макътанмагъа акъкъым ёкъ, чюнки буны япмагъа – меним борджумдыр. Эгер Къуванчлы Хаберни даркъатмасам, меним алым беля!

¹⁷ Бу ишни озь истегимнен япсам, мукяфат алырым. Амма буны истексиз япсам, демек, мен тек берильген вазифени япам.

¹⁸ Шунынъ ичюн манъа насыл мукяфат бар? Месихнинъ Къуванчлы Хаберини бедава даркъатып, ондан кельген акъкъымдан файдаланмасам, бу меним мукяфатым олур.

¹⁹ Мен эписинден азат олсам да, чокъ адамны Аллагъа алып кельмек ичюн, озюмни эписине къул эттим.

²⁰ Еудийлерни Аллагъа алып кельмек ичюн, мен еудийлерге еудий киби олдым. Озюм Къанунгъа коре яшамасам да, Къанунгъа коре яшагъанлар ичюн мен Къанунгъа бойсунгъан киби олдым.

²¹ Алланынъ огюнде къанунсыз олмасам да, Месихнинъ Къанунына бойсунам. Амма Къанунны бильмегенлерни Аллагъа алып кельмек ичюн, Къанунны бильмеген адам киби олдым.

²² Къуветсиз адамларны Аллагъа алып кельмек ичюн, мен къуветсиз олдым. Мумкюн олгъаны къадар базыларны къуртармакъ ичюн, эр кеске эр шей олдым.

²³ Буларнынъ эписини Къуванчлы Хабер ичюн япам, онда меним къысметим де олсун.

²⁴ Ярыш мейданында эписи чапа, амма тек бир адам мукяфат алгъаныны бильмейсизми? Сизлер де мукяфат алмакъ ичюн, чапынъыз!

²⁵ Ярышта иштирак эткен эр бир адам эр шейде озь беденини дикъкъатнен тертипте тута. О, буны соладжакъ бош бир тадж алмакъ ичюн япа. Биз исе солмайджакъ тадж алмагъа арекет этемиз.

²⁶ Шунынъ ичюн, ойле чапам ки, чапкъаным макъсатсыз олмасын. Ойле котеклешем ки, юмругъым авагъа урмасын.

²⁷ Беденимни къыйнайым, оны озюме къул япам, башкъаларыны огреткенимнен, озюм ляйыкъсыз олып къалмайым.