1 Коринтлилерге 2 - Мукъаддес Китап

Павелнинъ Коринтке эвельки келюви

¹ Дин къардашларым, мен сизге кельгенде, Алланынъ шаатлыгъыны бильдиргенде, буны лафкъа усталыкънен ве икметнен япмадым.

² Амма аранъызда олгъанда, мен Иса Месихтен ве Онынъ хачкъа мыхлангъанындан башкъа эр шейни унутмагъа къарар эттим.

³ Аранъызда олгъанда, мен къуветсиз эдим, къоркъудан къалтырай эдим.

⁴ Акъыллы, къандыргъан сёзлернен огретмей эдим, лякин Рухнынъ къудретинен огрете эдим,

⁵ иманынъыз адамларнынъ акъылына дегиль, Алланынъ къудретине таянгъаныны истедим.

Алланынъ икмети

⁶ Биз анълагъан адамлар арасында икметли сёзлерни айтамыз, амма бу икмет – дюньянынъ икмети дегиль, дюньядаки кечиджи акимлернинъ икмети де дегиль.

⁷ Биз Алланынъ гизли ве сакълангъан икмети акъкъында айтамыз. Бизге шурет бермек ичюн, О, бу икметни дюнья яратылмаздан эвель азырлады.

⁸ Бу икметни дюнья акимлеринден ич бириси анъламады. Эгер оны анълагъан олсалар, шуретли Раббини хачкъа мыхламаз эдилер.

⁹ Амма Языда язылгъаны киби олды: Алла Оны севгенлерге козь корьмеген, къулакъ эшитмеген, адамнынъ юреги тюшюнмеген шейлерни азырлады.

¹⁰ Бизлерге исе Алла буны Озь Руху ярдымынен бильдирди. Рух бутюн шейлерни, атта Алланынъ терен тюшюнджелерини тешкерип бакъа.

¹¹ Адамнынъ тюшюнджелерини онынъ ичиндеки рухундан башкъа ич кимсе бильмей. Алланынъ тюшюнджелерини де Алланынъ Рухундан башкъа ич кимсе бильмей.

¹² Бизлер исе дюньянынъ рухуны дегиль, Алладан Рухны къабул эттик. Шунынъ ичюн Алла бизге бедава берген шейлерни билип анълаймыз.

¹³ Буны биз адамларнынъ акъыллы сёзлеринен дегиль, Рух огреткен сёзлернен бильдиремиз, Рухкъа толгъан адамларгъа рухий акъикъатны анълатамыз.

¹⁴ Озю ичюн яшагъан адам Алланынъ Руху огреткен шейлерни къабул этип оламай. О, буларны акъылсызлыкъ деп сая ве оларны анъламай, чюнки оларны тек Алланынъ Руху ярдымынен анъламакъ мумкюн.

¹⁵ Шунынъ ичюн Алланынъ Руху олгъан адам эр шейнинъ къыйметини кесмек мумкюн, рухсузларнынъ тарафындан исе онынъ къыймети кесильмез.

¹⁶ Раббининъ акъылыны ич кимсе бильмез, ич кимсе Оны огретмез. Бизде исе Месихнинъ акъылы бар.