1 Коринтлилерге 16 - Мукъаддес Китап

Ерусалим джемиети ичюн топлангъан акъча акъкъында

¹ Энди азизлер ичюн акъча топланмасына кельсек, сизлер Галатиядаки иманлылар джемиетлерине буюргъанымны япынъыз.

² Афтанынъ биринджи кунюнде эр биринъиз озь барлыгъына коре бир къысым акъчаны айырып сакъланъыз. Сонъ мен сизге кельгенде, акъча топламагъа керек олмаз.

³ Алдынъызгъа кельгенде, сизлер сайлагъан адамларгъа мектюплер берерим ве бахшышынъызны Ерусалимге ёлларым.

⁴ Эгер меним бараджагъым да керек олса, мен де оларнен берабер кетерим.

⁵ Мен бутюн Македонияны доланып чыкъкъан сонъ, сизге бараджагъым. Македонияны доланып чыкъмагъа истейим.

⁶ Бельки янынъызда бираз вакъыткъа къалырым, я да къышны кечиририм, сонъ сизлерге мени кетеджек ериме озгъармакъ мумкюн олур.

⁷ Сизлернен аз корюшип кетмеге истемейим. Рабби ёл ачса, янынъызда чокъча къалмагъа умют этем.

⁸ Берекет Байрамына къадар мен Эфес шеэринде къаладжагъым.

⁹ Манъа къаршы чыкъкъанлар чокъ олса да, о ерде буюк ве гъайретли хызмет ичюн манъа кенъ бир къапу ачылды.

¹⁰ Эгер Тимотей алдынъызгъа кельсе, о, аранъызда ич бир шейден къоркъмайып яшагъанына дикъкъат этинъиз. О, мен киби, Раббининъ хызметинде булуна.

¹¹ Кимсе онъа юкъарыдан бакъмасын. О, манъа кельсин деп, оны аманлыкънен озгъарынъыз; мен оны дин къардашларнен берабер беклейим.

¹² Дин къардашымыз Аполлоскъа, озь достларынен берабер сизге кельмеге ялвардым, амма шимди бармагъа ич истеги ёкъ. Къолай бир вакъыт тапса келеджек.

¹³ Юкъламанъыз, иманда къатты турунъыз, джесюр ве кучьлю олунъыз.

¹⁴ Бутюн ишлеринъизни севгинен беджеринъиз.

¹⁵ Дин къардашлар, Стефанаснынъ эвдекилерини билесинъиз: Ахаяда биринджи иман эткенлер олар эди, озьлери азизлерге хызмет этювге берильдилер. Энди сизлерге ялварам:

¹⁶ бойле адамларгъа, оларнынъ ярдымджыларына ве чокъ чалышкъан эр бир инсангъа бойсунынъыз.

¹⁷ Стефанас, Фортунат ве Ахаикнинъ кельгенине къувандым; сизинъ еринъизге олар меним янымда эдилер.

¹⁸ Олар эм мени, эм сизни юреклендирдилер. Бойле адамларны урьмет этинъиз.

¹⁹ Кучюк Асиядаки иманлылар джемиетлери сизлерге селям ёллайлар. Акиланен Приска ве оларнынъ эвинде топлангъан джемиет Раббиден сизлерге чокъ селямлар ёллайлар.

²⁰ Бутюн дин къардашлар сизлерге селям ёллайлар. Азиз опюшнен селямлашынъыз.

²¹ Мен, Павел, озь къолумнен бу селямны язам.

²² Ким Раббини севмесе, онъа лянет олсун! Марана та – я Рабби, кель!

²³ Рабби Исанынъ эйилиги сизлернен олсун!

²⁴ Иса Месихнен мен эпинъизни севем!