1 Коринтлилерге 15 - Мукъаддес Китап

Павел Къуванчлы Хабер акъкъында

¹ Дин къардашлар, мен сизлерге бильдирген Къуванчлы Хаберни акълынъызгъа кетирмеге истейим. Сизлер оны къабул этип, онъа къатты инандынъыз,

² ве, эгер меним сёзлеримни бутюнлей тутсанъыз, оларнынъ ярдымынен къуртулыш тапарсыз. Акис алда иманынъыз бошуна олур.

³ Биринджиден мен къабул эткен хаберимни сизлерге айттым: Языда язылгъаны киби, Месих бизим гуналарымыз ичюн ольди,

⁴ дефн этильди ве, Языда язылгъаны киби, учюнджи куню тирильди.

⁵ Бундан сонъ Кифагъа, сонъра он эки эльчиге корюнди.

⁶ Ондан сонъ бир вакъытта беш юзден зияде дин къардашлар Оны корьди. Олардан чокъусы шимдиге къадар тири, базылары исе дюньядан козь юмып кеттилер.

⁷ Ондан сонъ Якъуп, сонъра эписи эльчилер Оны корьди.

⁸ Эписинден сонъ исе, вакътындан эвель догъгъан балагъа ошагъан мен де Оны корьдим.

⁹ Мен эльчилернинъ энъ кичкенесим, эльчи адыны ташымагъа ляйыкъ дегилим, чюнки мен Алланынъ джемиетини къувалай эдим.

¹⁰ Энди не олгъан олсам, Алланынъ эйилигинен олдым. Онынъ манъа косьтерген эйилиги бошуна чыкъмады, чюнки мен эльчилернинъ эписинден чокъ чалыштым. Даа догърусы чалышкъаным озюм дегиль, манъа берильген Алланынъ эйилиги чалышты.

¹¹ Не де олса, мен бильдирдимми я да олар бильдиргенлерми, биз эпимиз айны шу хаберни бильдирдик, ве сиз онъа инандынъыз.

Олюлернинъ тирилюви

¹² Месих олюлерден тирильгени акъкъында хабер бильдириле. Айса базыларынъыз не ичюн: «Олюлер тирильмез», – дейсинъиз?

¹³ Эгер олюлер тирильмесе, Месих де тирильмеген.

¹⁴ Сонъ эгер Месих тирильмеген олса, бизим хаберимиз боштыр, сизинъ иманынъыз да бошуна.

¹⁵ Бойле алда биз Алла акъкъында ялан айтамыз, чюнки биз: «Алла Месихни тирильтти», – деп шаатлыкъ этип юремиз. Эгер олюлер керчектен де тирильмесе, о вакъыт Алла Месихни де тирильтмеген.

¹⁶ Эгер олюлер тирильмесе, о вакъыт Месих де тирильмеген.

¹⁷ Эгер Месих тирильмеген олса, сизинъ иманынъыз файдасыздыр ве Алла сизинъ гуналарынъызны даа багъышламады,

¹⁸ Месихке инанып козь юмгъанлар да эбедиен гъайып олдылар.

¹⁹ Эгер биз ялынъыз бу омюр ичюн Месихке умют багъласакъ, биз энъ аджыныкълы бир алдамыз.

²⁰ Амма Месих керчектен де олюлерден тирильди! О, олюлерден биринджи олып тирильди.

²¹ Олюм бир адамнен дюньягъа кирди. Олюлернинъ тирилюви де бир инсаннен кельди.

²² Адемге къошулып, эр бир адам оле. Ойле де, Месихке къошулып, эр бир адам тириледжек.

²³ Эр ким озь невбетинде тириле: биринджи – Месих, сонъра, О келеджек сонъ, Месихке инангъанлар тириледжек.

²⁴ Бундан сонъ ахыр заман келеджек. О вакъыт Месих эр бир башлыкъны, эр бир акимиетни ве кучьни кучьтен кестиреджек ве Падишалыкъны Алла Бабагъа береджек.

²⁵ Алла бутюн душманларыны Месихнинъ аякълары астына ташлагъандже, Месих падишалыкъ япмакъ керек.

²⁶ Сонъки йыкъыладжакъ душман исе – олюмдир.

²⁷ Алла Месихнинъ аякълары астына бутюн барлыкъны ташлады. Амма «бутюн барлыкъны ташлады» дегенде, белли ки, бутюн барлыкъны Месихке бойсундыргъан Алланы козьде тутмай.

²⁸ Алла эр шейни Месихке бойсундыргъан сонъ, Онъа эр шейни бойсундыргъан Аллагъа Огъул Озю де бойсунаджакъ, ве Алла эр бир шейнинъ башлыгъы олур.

²⁹ Эгер тирилюв олмаса, олюлер ичюн сувгъа батырылып чыкъкъанлар насыл файда беклейлер? Эгер олюлер ич тирильмесе, олар ичюн сувгъа батырылып чыкъмакъ керекми?

³⁰ Не ичюн бизлер эр бир саатте озюмизни беляларгъа огъратамыз?

³¹ Мен эр кунь олюм панджасы астында олам, амма дин къардашларым, мен Раббимиз Иса Месихнинъ огюнде сизлер ичюн макътанам.

³² Инсанларнынъ тюшюнджесине коре, эгер олюлер тирильмесе, не ичюн мен Эфес шеэринде айван олгъанларнен курештим? Ойле олса, айдынъыз, ашап-ичейик, ярын оледжекмиз де!

³³ Амма алданманъыз: «Яман ёлдашлар яхшы адамны бозар».

³⁴ Энди кереги киби, озюнъизни къолгъа алынъыз ве гуна япманъыз! Сизинъ айыбынъызгъа, сизлерден базыларынъыз Алланы бильмейлер.

Ер ве кок беденлери

³⁵ Амма бириси: «Олюлер насыл тириледжек экен? Насыл беденде пейда оладжакъ экенлер?» – дер.

³⁶ Эй, акъылсыз! Сенинъ сачкъан урлугъынъ ольмесе, тирильмейджек.

³⁷ Сен сачкъанда, оладжакъ осюмликни дегиль, тек богъдай я да башкъа бир урлукъны сачасынъ.

³⁸ Алла урлукъкъа Озю истеген беденни бере, эр бир урлукътан башкъа беден ярата.

³⁹ Эр бир беден бир дегиль, амма адамларнынъ бедени башкъа, айванларнынъ башкъа, къушларнынъ башкъа ве балыкъларнынъ да башкъа бедени бар.

⁴⁰ Коклердеки беденлер ве дюньядаки беденлер бар. Амма коклердеки беденлер дюльберлигининъ дюньядаки беденлер дюльберлигинден фаркъы бар.

⁴¹ Кунешнинъ шурети башкъа, айнынъ шурети башкъа, йылдызларнынъ шурети де башкъадыр. Шуретине коре йылдыз йылдыздан фаркъ эте.

⁴² Олюлернинъ тирилюви де бунъа ошай: чюрюк оладжакъ беден сачыла ве ольмейджек алда тириле.

⁴³ Урьметсизликте сачыла, шуретте тириле; зайыф олып сачыла, къудретли олып тириле.

⁴⁴ Эти ве къаны олгъан беден сачыла, рухий беден тириле. Эти ве къаны олгъан беден олса, рухий беден де бар.

⁴⁵ Язылгъанына коре, биринджи адам Адем тири джан олды. Сонъки Адем исе омюр берген рух олды.

⁴⁶ Биринджи олып, рухий дегиль, эти ве къаны олгъан беден келе. Рухий беден сонъ келе.

⁴⁷ Биринджи адам ерден, топракъ тозундан пейда олды. Экинджи адам исе коктен кельди.

⁴⁸ Топракътан яратылгъан биринджи адам насыл олса, башкъа адамлар да ойледир. Коклердеки адам насыл олса, коклердекилер де ойледир.

⁴⁹ Шимди биз топракътан яратылгъан адамлармыз, келеджекте исе коклердеки адамлар олурмыз.

⁵⁰ Дин къардашлар, сизлерге шуны айтам: эти ве къаны олгъанлар Алланынъ Падишалыгъыны мирас этип аламаз. Оледжек беден ольмейджек мирасны аламаз.

⁵¹ Мына, мен сизлерге бир сыр айтайым: эпимиз ольмемиз, амма эпимиз денъиширмиз.

⁵² Бир аньде, козь ачып юмгъандже, сонъки боразан вакътында, боразан чалынгъанда, олюлер ольмейджек беденлерде тириледжеклер, биз исе денъишеджекмиз.

⁵³ Чюрюйджек беден чюрюмейджек беденге чевирильмек керек, ве оледжек беден ольмейджек беденге чевирильмек керектир.

⁵⁴ Бу чюрюйджек беден чюрюмейджек беденге чевирильген сонъ, ве оледжек беден ольмейджек беденге чевирильген сонъ, Языда айтылгъан сёзлер ерине келеджек: Олюм енъильди ве ёкъ олды!

⁵⁵ Эй, олюм, сенинъ енъгенинъ къайда? Эй, олюм, сен берген азапларынъ къаерде?

⁵⁶ Олюм азабы – гунадыр. Гунанынъ къувети исе Къанундан келе.

⁵⁷ Амма Аллагъа шукюр! О, Раббимиз Иса Месихнен бизге гъалебени багъышлады.

⁵⁸ Шунынъ ичюн, севимли дин къардашларым, къатты ве къавий олунъыз. Раббининъ хызметинде олып, эр вакъыт гъайретнен чалышынъыз ве буны билинъиз: Рабби ёлунда япкъан ишинъиз файдасыз олмаз.