1 Коринтлилерге 12 - Мукъаддес Китап

Рух берген бахшышлар

¹ Дин къардашлар, Рухнынъ бахшышлары акъкъында хаберсиз къалгъанынъызны истемейим.

² Билесинъиз ки, сизлер Алланы бильмегенде, тильсиз путлар, не де олса, сизни ёлдан ура эдилер.

³ Шунынъ ичюн сизлерге бильдирмеге истейим: Алланынъ Рухунен айткъан ич кимсе Исаны къаргъамаз. Ве Исаны Рабби деп адландырмакъ адам тек Мукъаддес Рухнен мумкюн.

⁴ Бахшышлар чешит тюрлю ола, Рух исе бирден-бир.

⁵ Хызметлер де чешит тюрлю ола, Рабби исе бирден-бир.

⁶ Арекетлер де чешит тюрлю ола, амма эписинде эр бир арекетни яраткъан бирден-бир Алладыр.

⁷ Рух эписининъ файдасы ичюн эр кимде арекет косьтере.

⁸ Бири Рухнен акъыллы сёзлер айта, башкъасы айны шу Рухнен бильги даркъата.

⁹ Айны шу Рухнен бирине иман бериле, ве айны шу Рух башкъа адамгъа хасталарны тедавийлемеге кучь бере.

¹⁰ Биревге аджайип ишлер этмеге, башкъасына пейгъамберлик япмагъа, даа башкъасына рухларнынъ фаркъына бармагъа, бирине чешит тиллерде лаф этмеге, башкъасына бу тиллерни терджиме этмеге къабилиетини бере.

¹¹ Буларнынъ эписи – айны шу Рухнынъ ишидир. О, бу къабилиетлерни истегенине коре айры-айры багъышлай.

¹² Бир беденде чокъ мучелер бар. Беденнинъ мучелери чокъ олса да, оларнынъ эписи – бир беден. Месих де ойле.

¹³ Биз ким олмасакъ да – еудийми, юнанмы, къулмы, азатмы – эпимиз бир Рухнынъ ярдымынен бир беденде бирлештик, ве эпимиз бир Рухны къабул эттик.

¹⁴ Эр беденде бир муче дегиль, чокъ муче бар.

¹⁵ Эгер аякъ: «Мен къол дегилим, шунынъ ичюн беденнинъ къысмы да дегилим», – десе, о, беденден айры олурмы?

¹⁶ Эгер къулакъ: «Мен козь дегилим, шунынъ ичюн беденнинъ къысмы да дегилим», – десе, о, беденден айры олурмы?

¹⁷ Эгер бутюн беден козь олса, адам насыл этип эшитир? Эгер бутюн беден къулакъ олса, насыл этип къокълар?

¹⁸ Алла мучелернинъ эр бирини беденде Озь истегенине коре ерлештирди.

¹⁹ Эгер эписи бир муче олса эди, беден къайда къалыр эди?

²⁰ Сонъ шимди мучелер чокъ, беден исе бир дане.

²¹ Козь къолгъа: «Сен манъа керекмейсинъ», – я да баш аякъларгъа: «Сизлер манъа керекмейсинъиз», – деп оламайлар.

²² Аксине, беденнинъ зайыфча корюнген мучелери пек кереклидир.

²³ Биздже беденнинъ урьметсиз корюнген мучелерине айры урьмет беремиз ве корюмсиз аврет ерлеримизни буюк къайгъырувнен къапатамыз.

²⁴ Амма корюмли мучелеримизнен буны япмакъ керекмей. Алла Озю беденни бойле этип яратты ве урьмети олмагъан мучелерге урьмет берди.

²⁵ Шунынъ ичюн беденде болюнюв олмасын, ве эписи мучелер бири-бирини бакъсын.

²⁶ Эгер бир муче азап чексе, бутюн мучелер онен берабер азап чеке. Эгер бир муче макътав къазанса, бутюн мучелер онен берабер къувана.

²⁷ Сизлер – Месихнинъ беденисинъиз, ве эр биринъиз – беденнинъ мучесисинъиз.

²⁸ Алла иманлылар джемиетине биринджиден эльчилерни сайлады, экинджиден пейгъамберлерни, учюнджиден оджаларны сайлап къойды. Сонъ базыларгъа аджайип ишлер япмакъ, хасталарны тедавийлемек, ярдым этмек, башлыкъ этмек, чешит тиллерде лаф этмек къабилиетини багъышлады.

²⁹ Эписи эльчилерми? Эписи пейгъамберлерми? Эписи оджалармы? Эписи аджайип ишлер япамы?

³⁰ Эписине хасталарны тедавийлемек къабилиети багъышландымы? Эписи чешит тиллерде лаф этеми? Эписи бу тиллерни чевирмеге билеми?

³¹ Сизлер даа буюк къабилиетлерни бахшыш оларакъ алмагъа ынтылынъыз. Энди мен сизлерге энъ яхшы ёлны косьтереджегим.