TITO 3 - Chatino Tataltepec

Ñi'ya̱ nu nga'a̱ cha' cua'ni na si laca na ñati̱ ji'i̱ Jesús

¹ Culu'u nu'u̱ ji'i̱ ngu' cha' taquiya' ngu' ji'i̱ lcaa ngu' nu laca loo, ji'i̱ lcaa ngu' tisiya; nga'a̱ cha' cua'ni ngu' lcaa lo cña tso'o nu culo ngu' bi' ji'i̱ ngu' cha' cua'ni ngu'.

² Ná tso'o chcui' ngu' cuentyu ji'i̱ xa' ñati̱, ni ná tso'o xu̱u̱ tya'a ngu' lo'o ñati̱; ntsu'u cha' cube ti' ngu' ji'i̱ xa' ñati̱, cha' tso'o ti chcui' ngu' lo'o lcaa ñati̱.

³ Cua sa'ni la ná nda na cuentya tsiya' ti ñi'ya̱ ntsu'u cha' ji'i̱ ycui' Ndyosi; ná ndaquiya' na ji'i̱ Ni li', cha' cua ngüiñilo'o nu xña'a̱ ji'na cha' cua'ni na lcaa cha' cuxi nu ndijña cresiya ji'na cha' cua'ni na. Ngua chaa ti' na lo'o ndyu'ni na cha' cuxi bi' li', masi ngua'ni lya' ti' na ji'i̱ ñati̱, masi ngua liye' ti' na ña'a̱ na ji'i̱ ngu', masi ngua ti'í ti' na ña'a̱ na ji'i̱ tya'a na; lo'o jua'a̱ ngu' tya'a na, ngua ti'í ti' ngu' ña'a̱ ngu' ji'na.

⁴ Lo'o li' ngua tsa'a̱ na cha' nti' tsa ycui' Ndyosi cua'ni lyaá Ni ji'na, cha' ntsu'u tsa tyiquee Ni ña'a̱ Ni ji'na, ñati̱ chalyuu na.

⁵ Lo'o li' ngua'ni lyaá Ni ji'na cha' tya'na tsa ti' Ni ña'a̱ Ni ji'na; pana si'i cha' ngua'ni na sca cha' tso'o, sca cña tacati, lo'o li' xqui'ya bi' ngua'ni tya'na ti' Ni ji'na. Si'i jua'a̱. Na cua ngua'ni lubii Ni ji'i̱ cresiya ji'na, bi' cha' caca chcui' na cha' cua ngula na chaca quiya'; cua ngua cucui cresiya ji'na xqui'ya cña nu cua ngua'ni Xtyi'i ycui' Ndyosi lo'o na.

⁶ Tso'o tsa nda Ni Xtyi'i ycui' Ni cha' tyanu ne' cresiya ji'na chacuayá' ji'i̱ Jesucristo nu ngua'ni lyaá ji'na;

⁷ tlyu tsa cha' tso'o nu ngua'ni ycui' Ndyosi lo'o na jua'a̱, cha' caca na ñi'ya̱ si laca na sñi' ycui' Ni, nu ndu̱ ti' na cha' caja chalyuu cucui nu ná nga'a̱ cha' tye ji'na.

⁸ Nga'a̱ cha' jlya tso'o ti' ma̱ cha' liñi nu nscua na' re, bi' cha' lye chcui' nu'u̱ cha' bi' lo'o lcaa ñati̱ nu ngusñi cha' ji'i̱ ycui' Ndyosi ca bi', cha' xcui' cha' tso'o cua'ni ma̱ li'. Tso'o tsa laca cha' liñi, taca xtyucua cha' bi' ji'i̱ cua ña'a̱ ca ñati̱;

⁹ pana ná tso'o chcui' ma̱ cha' laja ti, jua'a̱ ná tso'o si xlyú ma̱ cha' hichu̱' tya'a ma̱ xqui'ya jyo'o cusu' ji'na, masi xqui'ya sca cha' nu nguscua jyo'o Moisés nu ngua sa'ni la. Ná sca cha' tso'o ná taca cua'ni ma̱ jua'a̱. Chcuna' tyempo ji'i̱ ma̱ jua'a̱, cha' xcui' cha' nu ndacui lo cui'i̱ ti nchcui' ma̱ li'.

¹⁰ Tucua quiya' chcui' nu'u̱ lo'o ngu' cha' cua'a nu'u̱ ji'i̱ ngu' nu nti' xu'ba cha' cusu̱u̱ laja cu'ma̱ nu laca ma̱ ñati̱ ji'i̱ Jesucristo. Si ná cuna ngu' bi', li' xtyanu ma̱ ji'i̱ ngu' bi'.

¹¹ Cua ngunu'u̱ tsiya' ti cha' nu ntsu'u hique ngu', lo'o jua'a̱ ntsu'u qui'ya ji'i̱ ngu' bi'; hasta ycui' ngu' bi' jlo ti' ngu' cha' ntsu'u qui'ya ji'i̱ ngu'.

Ngusalya' Pablo lo'o Tito

¹² Nu lo'o tyalaa ti masi Artemas, masi Tíquico, nu cua nda na' ji'i̱ cha' ca̱a̱ slo nu'u̱, li' yala ti tsaa nu'u̱ ca quichi̱ Nicópolis si caca jinu'u̱; tyacua tya'a na cajua li', cha' tyi'i̱ na' ca quichi̱ bi' tyempo tlya' nta̱'.

¹³ Xtyucua nu'u̱ ji'i̱ Zenas, nu yu nu laca tu'ba bi', lo'o ji'i̱ Apolos. Li' cui'ya nu'u̱ cuentya cha' nga'aa ntsu'u na nu lyiji ji'i̱ ngu' lo'o tya tsaa la ngu' tyucui̱i̱.

¹⁴ Ntsu'u cha' ca tsa'a̱ ca ta'a ñati̱ ji'i̱ Jesucristo tya'a na cha' cua'ni ngu' lcaa lo cha' tso'o, cha' taca xtyucua ngu' ji'i̱ tya'a ñati̱ ngu' nu lyiji xi ji'i̱; ná tso'o si taja ti ndi'i̱ ngu' chalyuu.

¹⁵ Lcaa ngu' ca nde lo'o na' nchcui' ya xlyo ni'i̱ jinu'u̱. Tso'o ti chcui' nu'u̱ lo'o lcaa ngu' nu tso'o ti ntsu'u tyiquee ña'a̱ ngu' ji'i̱ cua cha' laca ngu' tya'a ngusñi na cha' ji'i̱ Jesús. Ña'a̱ ti cua'ni ycui' Ndyosi cha' tso'o lo'o lcaa cu'ma̱. Jua'a̱ caca cha' lacua.