TITO 1 - Chatino Tataltepec

¹ Pablo laca na'. Ndya'a̱ na' lo cña ji'i̱ ycui' Ndyosi, lo'o jua'a̱ ngua'a̱ lo Jesucristo cña 'na cha' tsa'a̱ chcui' na' cha' tso'o ji'i̱ Jesús lo'o xa' ñati̱; nga'a̱ cha' chcui' na' lo'o ñati̱ nu cua laca ngusubi ycui' Ndyosi ji'i̱ cha' caca ngu' ñati̱ ji'i̱ ycui' Ni, cha' jlya tso'o la ti' ngu' bi' ji'i̱ Ni li'. Cua nda Jesucristo 'na lijya̱a̱ cha' ca cuayá' ti' ngu' lcaa cha' liñi ji'i̱ Ni, cha' taca cua'ni tlyu lcaa na ji'i̱ ycui' Ndyosi,

² lo'o jua'a̱ taca jatya na ji'i̱ chalyuu nu ná nga'a̱ cha' tye ji'na li'. Ná cuiñi ycui' Ndyosi. Sa'ni tsa nchcui' Ni cha' caja chalyuu bi' ji'na, tya lo'o ngüiñá Ni chalyuu; tya li' nda Ni cha' lo'o ñati̱ ji'i̱ Ni nde chalyuu cha' taca tyi'i̱ ngu' slo Ni.

³ Lo'o juani cua nti' Ni cha' tso'o tsa tyempo cha' cañi tyijyu' cha' ji'i̱ ycui' Ndyosi nu ndyu'ni lyaá ji'na, lo'o jua'a̱ cua ngulo Ni cña jna' cha' culu'u na' cha' tso'o bi' ji'i̱ xa' ñati̱.

⁴ Nscua na' quityi re cha' ca̱a̱ slo nu'u̱, Tito, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' stu'ba ti ngusñi na cha' ji'i̱ ycui' Ndyosi. Ndi'ya̱ nti' na' cha' ña'a̱ ti cua'ni ycui' Ndyosi Sti na cha' tso'o lo'o nu'u̱, jua'a̱ Jesucristo nu ngua'ni lyaá ji'na; cua'ni Ni cha' ti̱ ti tyi'i̱ tyiquee nu'u̱ li'.

Cña nu ndyu'ni Tito ca loyuu Creta

⁵ Nguxtyanu na' jinu'u̱ ca loyuu Creta bi', cha' cua'ni lyiji nu'u̱ cña nu nga'a̱ cha' cua'ni nu'u̱, cha' subi nu'u̱ ji'i̱ ngu' cusu' nu caca loo ji'i̱ taju ñati̱ tya'a ngusñi na cha' ji'i̱ Jesús lcaa quichi̱ cajua; subi nu'u̱ ji'i̱ ngu' cusu' bi' ñi'ya̱ nu nacui̱ na' jinu'u̱ tya tsubi' la.

⁶ Xcui' tso'o ti nga'a̱ cha' cua'ni ngu' cusu' bi', cha' ná taca sta ñati̱ qui'ya ji'i̱ ngu'. Caja clyo'o ngu' bi' lo'o sca ti nu cuna'a̱, ni ná tso'o tyu'u cha' ji'i̱ ngu' bi' lo'o xa' nu cuna'a̱. Ntsu'u cha' xñi sñi' ngu' cusu' bi' cha' ji'i̱ Jesucristo, lo'o jua'a̱ ná cua'ni suba' sñi' ngu' lo'o xa' ñati̱; ntsu'u cha' taquiya' sñi' ngu' ji'i̱ cha' nu nchcui' ngu' cusu'.

⁷ Lo'o jua'a̱ ngu' nu caca loo ji'i̱ taju ñati̱ tya'a na ni, ná tso'o si ntsu'u cha' sta ñati̱ qui'ya ji'i̱ ngu' bi', cha' cña ji'i̱ ycui' Ndyosi ndyu'ni ngu' bi'. Bi' cha' clyana nu'u̱ ji'i̱ ngu' nu ná ndu'ni tyucuaa ti' ji'i̱ tya'a ngu', ngu' nu ná ñasi̱', ngu' nu ná cu'bi, ngu' nu ná ntsu'u cha' cusu̱u̱ lo'o tya'a ñati̱, ngu' nu ná ndacui tsa ti' ji'i̱ cñi;

⁸ clyana nu'u̱ ji'i̱ ngu' nu nda su tyi'i̱ ñati̱ nu lijya̱ tyijyu', ngu' nu ndiya ti' cua'ni xcui' cha' tso'o, ngu' nu tso'o ti nchcui' lo'o ñati̱, ngu' nu sca ti cha' ji'i̱ Jesús ntsu'u tyiquee ngu', nu ndu'ni cua ña'a̱ ca cha' nu nti' ycui' Ndyosi cha' cua'ni na, ngu' nu nchca ji'i̱ cua'a ji'i̱ ycui' ca ngu'.

⁹ Tso'o tsa ñati̱ nu cua ngui'i̱ tsa ji'i̱ cha' liñi nu ngulu'u na ji'i̱, ñati̱ nu nchca ji'i̱ culu'u cha' liñi bi' ji'i̱ tya'a ñati̱, ñati̱ nu nchca ji'i̱ tacu̱' tsiya' ti cha' ji'i̱ ngu' cuiñi.

¹⁰ Cua ntsu'u tyu̱u̱ tya'a ngu' nu ná ntaja'a̱ taquiya' ngu' ji'i̱ cha' nu nchcui' ngu' nu laca loo, ntsu'u quiña'a̱ tsa ngu' judío nu ndyu'ni jua'a̱; cuiñi tsa cha' nu nchcui' ngu' bi', cha' jua'a̱ cñilo'o ngu' ji'i̱ tya'a ngu'.

¹¹ Nga'a̱ cha' tacu̱' ma̱ tu'ba ngu' cuiñi bi', cha' ná tacu̱' ngu' cha' ji'i̱ quiña'a̱ ñati̱, ña'a̱ tya'a nga'a̱ ni'i̱ ti ngu' nu cua ngusñi cha' liñi bi'. Nclyu'u ngu' cuiñi bi' cha' ji'i̱ tya'a na; pana na cuiñi ngu' bi', cha' cua nti' ngu' caja cñi ji'i̱ ngu'.

¹² Cha' liñi nchcui' sca jyo'o cusu' tya'a quichi̱ tyi ngu' Creta su ndi'i̱ nu'u̱, nu ngua tu'ba ji'i̱ jo'ó ji'i̱ ngu' cua sa'ni. Ndi'ya̱ nchcui' bi': “Cuiñi tsa lcaa ngu' Creta tya'a na', xña'a̱ tsa ngu'. Lo'o jua'a̱ ndacu tsa ngu', pana ná ntaja'a̱ ngu' cua'ni ngu' cña tsiya' ti”, nacui̱ jyo'o cusu' bi'.

¹³ Chañi cha' nu nchcui' jyo'o bi'; bi' cha' lye chcui' nu'u̱ lo'o ngu' bi', cha' tso'o ti xñi ngu' lcaa cha' ji'i̱ Jesús nu nchcui' na lo'o ngu',

¹⁴ cha' nga'aa cua'a̱ jyaca̱ ngu' ji'i̱ cuentyu nu nchcui' ngu' judío, cha' nga'aa taquiya' ngu' ji'i̱ cha' nu nchcui' ñati̱ chalyuu ti nu cua ngulochu̱' ji'i̱ lcaa cha' liñi.

¹⁵ Lubii tsa laca lcaa lo na, jua'a̱ nti' sca ngu' nu lubii cresiya ji'i̱ cuentya ji'i̱ ycui' Ndyosi; pana ná ntsu'u na lubii tsiya' ti nti' ngu' nu cuxi tyiquee, cha' ná jlya ti' ngu' bi' ji'i̱ cha' liñi. Lo'o cua'ni ngu' nu cuxi tyiquee cha' cuxi, li' nga'aa nda ngu' bi' cuentya cha' xcui' cha' cuxi laca nu ndu'ni ngu'.

¹⁶ Ñati̱ ji'i̱ ycui' Ndyosi laca ngu' bi', nacui̱ ycui' ngu', pana ná ndyu'ni ngu' tsiya' ti ñi'ya̱ nu nti' ycui' Ndyosi; bi' cha' caca cuayá' ti' na cha' cuiñi ngu' bi'. Cuxi tsa ndyu'ni ngu' bi', cha' ná ntaja'a̱ ngu' taquiya' ngu' ji'i̱ cha' nu liñi ca; ni sca cha' tso'o ná ca cua'ni ngu' bi' tsiya' ti.